SAM 105
Israel hanlan Pachia Lungzinaw
(1Sh16.8-22)
1 Bawipaw kalan lungtuabya ho oh,
a min kha ko oh lah,
a cyipaw kha ccungccaw hae nysah oh.
2 Amaw kalan hlawsah oh,
thehoysahnaw hlawsah oh;
ngaeangthua lan umpaw
a ryalaw balyn kha ho oh.
3 A min thyaapaw kha phu-esah oh;
Bawipaw a ccung hae paw thinlung tuh
a lungtua sah.
4 Bawipaw te a thawzung kha ccungtua;
a mitmae kha ccung zungzae oh.
5-6 Pou a seepaw Abraham ciihan,
a popaw Jakob ccaaw hae,
ngaeang lan umpaw a la cyipaw,
ngaeang lan umpaw a ryalaw hae te
a hopaw byapianaw kha liathui oh.
7 Aning tuh Bawipaw ah Pachia nynh thua;
a byapianaw tuh
laephi pynpi hanlan nynh thua.
8 A byakinnaw kha zungzae peki zah,
kaw a pyapaw kha
she thong kheit cia ning khyh,
9 Abraham kya a raepaw byakinnaw,
Isak kya a kinpyakupaw a byakinnaw,Ref 105.9: Gen 12.7, 17.8, 26.3
10 Jakob kya phungbya lante tynsah zah,
Israel kya zungzae tynpaw
byakinnaw lante a tynsah,Ref 105.10-11: Gen 28.13
11 “Kanaan ram hynh rho lang kae pya cih,”
a la cipaw kha a liathui.
12 Minmin tuh milu beihtaraw kyalya cih hae zah,
ramccang ccungccaw lang tangte
13 ram kheit kyate ram kheit kalan,
pee kheit kyate ccangpaw pee kheit kalan
he a khiavuikuh hae tuh,
14 minmin tungvaw tuaasahnaw rae lan,
aning nynh humhung sanmah ua khyh;
minmin keiccuze siapharan hae kha
pe hae zah,Ref 105.14-15: Gen 20.3-7
15 “Chitui ka thuh hae paw kha ty nan oh;
ka profeh hae kha
vawsaw pya nan oh,” a cipya hae.
16 Bawipaw nynh mih ram kyakhe
ccakanccisah zah,
mih looh miakaw kha
he a ropah hae te,Ref 105.16: Gen 41.53-57
17 see lang a zua hae paw Josef kha
mih malang a saw.Ref 105.17: Gen 37.28, 45.5
18 A ccu kha sivawrui te khii hae zah,
a nging kyakhe sivaw a oisaku hae;Ref 105.18-19: Gen 39.20—40.23
19 a la hopaw bya accing mawlaezung
Bawipaw bya nynh
amaw kha a syntawtua.
20 Siapharan nynh saw zah a luesah;
minphuin hae a uktupaw nynh
amaw kha a luesah.Ref 105.20: Gen 41.14
21 A ram uktu lang tangsah zah,
a hoipaw uccaw balyn kha
a uktu lang a nung,Ref 105.21: Gen 41.39-41
22 siapharan kuihkaw e bawi hae kha
thuihei khylan te
siapharan kuihkaw e piccan hae kha
hawnaw te ccangpya khylan a nung.
23 Oute Israel tuh Izip ram lang a thua,
Jakob tuh Ham ram kya
ramccang ccungccaw lante a um.Ref 105.23: Gen 46.6, 47.11
24 Te Bawipaw nynh a ccungccaw hae kha
myarya pungzaesah hae zah,
mih rhaw hae laeze
a thawsae huapaw lang a rae hae,Ref 105.24-25: Exo 1.7-14
25 Izip hae nynh a ccungccaw hae kha
hua khylan te a see hae kha thyaruhnaw te
phee khylan Izip hae thinlung kha a paleih.
26 Aning nynh a seepaw Moses te
a po vae paw Aaron kha a saw hae.Ref 105.26: Exo 3.1—4.17
27 Minmin nynh Izip hae kyakhe
amaw kya-e muihsahnaw hae kha rae hae zah,
Ham ram kya ngaeangnaw hae kha a rae hae.
28 Ram lungkhu kya mohnaw kha saw zah,
ram kha a mohsah;
thuasalama Izip hae nynh a bya kha
zui leite a rawse hae.Ref 105.28: Exo 10.21-23
29 Mih tui kha chiise lang tangsah zah,
mih ngasaw kha a chisah.Ref 105.29: Exo 7.17-21
30 Mih ram tuh buphaw te phe beih zah,
mih siapharan inn kya heize phe abeih.Ref 105.30: Exo 8.1-6
31 Pachia nynh kawpya zah
myn hae te maseih hae tuh
mih ram pynpi kya phe abeih.Ref 105.31: Exo 8.16-17, 20-24
32 Khuaatui hanpaw hya kha ccawsah zah,
mih ram pynpi kya ria a kawsah.Ref 105.32-33: Exo 9.22-25
33 Mih misu ku hae te thaeku ku hae kha roh zah,
mih ram e thingku hae kha pong akhya.
34 Kawpya zah tungkhipaw hae tuh oun thua hae,
riatae leipaw tungkhipaw adih hae paw tuh
oun thua hae zah,Ref 105.34-35: Exo 10.12-15
35 mih ram e thingku-ruaku
aphuinphuin kha marya a ae hae,
mih laephi kya-e athae hae kha mah
marya a ae hae.
36 Mih thawzung balyn kyate
masaty a poupaw
mih ram kya-e ccatawccaw balyn kha a chia.Ref 105.36: Exo 12.29
37 Oute Israel kha sui te ngun ryte a poukhae,
mih phin raveih kya
a thawzyapaw lu kheit san um khyh.Ref 105.37-38: Exo 12.33-36
38 Izip hae nynh minmin kha
a ri hae keiccuze,
minmin he a pou hae tuh
Izip hae mih lungtua.
39 Minmin luki khe maeking kha
dawpah hae zah,
khuazi kya a aw ccaw cite
maee kha a pya hae.Ref 105.39: Exo 13.21-22
40 Minmin nynh ngia hae zah,
vamyng kha a pya hae,
vaawlang te looh patae a pya hae.Ref 105.40: Exo 16.2-15
41 Lungpi kha hung zah tui tuh a pou;
tuh-e tui tuh vawpi hawte
laesia ram kya po alua.Ref 105.41: Exo 17.1-7; Nam 20.2-13
42 Pawccecize a seepaw Abraham kya
a la raepaw athyaapaw
a byakinnaw kha a liathui.
43 Tuhcite a ccungccaw hae kha
lungtuate a cciakhae hae,
a po hae paw kha hlawsah biate
a cciakhae hae.
44 Minphuin ccangpaw hae ram kha
minmin kalan pya hae zah,
minmin nynh tuh-e hae hoirumnaw kha
a hoi hae paw uccaw lang a lawku hae,Ref 105.44: Jos 11.16-23
45 tuh-e tuh a ccungccaw hae nynh
a phungbya kha zui hae zah,
a upadi hae kha a zui ccaw hae cite
a cyipaw nynh thua.
Bawipaw kha thehoysah oh!