SAM 102
Bawmnaw Mue khylan Sawsangnaw
1 Pou Bawipaw ,
ka sawsangnaw yn thaepya tua;
ka siaruanaw hynh
namaw kalan phe thua sah.
2 Vawsawnaw ka tung ccyh lya
na mitmae yn retawkuh nan.
He kae ko vae ze, yn thaepah lah
arangte yn leihtua.
3 Pawccecize ka ccyh tuh
maeekhuh hawte dyadya lia zah,
ka ru hae tuh maeephupi hawte arua.
4 Ka thinlung tuh zia thua zah,
lonua hawte baleih anaan;
looh mah ka ae ry khyh.
5 Thawte ka hawkhaeku keiccuze
ka ru te ka ving kyalya nynh ka um vae.
6 Laesia ram e nawnia hawte ka thua zah,
ramkaw e nawnia dihpaw
hawte nynh ka thua.
7 I kho leite ka um zah,
a makhaete innccukaly umpaw
pavaw nynh ka lo.
8 Ka rhaw hae nynh anin ninlang yn sarya hae;
ccyasahku nawlan
yn mang hae paw nynh
ka min kha thyalawku nawlan a mang hae.
9 Buhhaw kha sanlou lang ka ae zah,
ka niapaw tuh mitphi te apykuh,
10 tuh-e tuh na thinrianaw te
na thin-unaw keiccu nynh thua;
nae hangthung zah nae vua vae.
11 Ka hiinnaw ccyh tuh
zetesang e mynzia hawte nynh thua;
lonua hawte baleih ka naan.
12 Thuasalama, pou Bawipaw , nang tuh
bawitungkhung kya zungzae na haung;
na min tuh she takyh kya atyn.
13 Na thokuh cih zah Zion kha
ngaethya na umsah cih,
pawccecize a tungvaw
ngaethyaumsahnaw ccyh azaw vae;
khyapaw accyh azaw vae.
14 Na see hae nynh Zion lung kha
ry hae zah, a laenoi kyakhe
ngaethyaumsahnaw a hoi hae.
15 Minphuin hae nynh Bawipaw min kha
a rih cih hae zah,
laephi siapharan balyn nynh
na huhan kha a rih cih hae.
16 Bawipaw nynh Zion khuapi kha a rae;
a phu-enaw kha a langsakuh cih.
17 Bawmtu hoi lei hae paw sawsangnaw kha
pe a kipah cih hae zah,
mih sawsangnaw kha
pawlangria leite um lan khyh.
18 Malang she e ccungccaw hae nynh
Bawipaw kha the a hoysah ccaw hae,
e hynh yn thua cih paw she hanlan zei thua sah.
19 Bawipaw nynh amaw kya-e athyaapaw
ahangnaw kyate a dobung,
vaawlang te laephi kha a do,
20 tuhte a dopaw tuh thongccah hae paw nynh
a hawkhaekunaw hae roi kha thae khylan te
a chih vae cih hae paw kha
luesah khylan nynh thua.
21 tuhteze nynh Bawipaw min kha
Zion kya a siakhae cih hae zah,
Jerusalem kya amaw thehoysahnaw kha
a siakhae cih hae.
22 Tuh-e ccyh tuh minphuin hae te
peenaw hae nynh Bawipaw kha
beik khylan pynkheihlan
a pumku hae ccyh nynh athua cih.
23 Ka no lyakhe ka thawzung yn zyasah vae;
ka ccyh kha a dynsah vae.
24 Kae nynh, “Pou ka Pachia,
ka hiinshe angankuh athua ccyh lyakhe
kae kha yn lah nan,
nang na ccyh tuh
she takyh zungzae atyn,” ka ci.
25 Langmawlya te
laephi athonaw aleihpaw kha na tynsah,
vaawlang hae tuh na kuih te
na raepaw nynh thua.Ref 102.25-27: Heb 1.10-12
26 Tuh-e hae tuh aroh cih hae,
thuasalama nang tuh zungzae na tyn;
tuh-e hae balyn tuh boeining hawte
a seiikuh cih hae.
Boeiningsungpue hawte
na rulae hae zah phe azo hae.
27 Thuasalama nang tuh
na rulaekuh khyh zah
na hiinnaw tuh thang khyh.
28 Na see hae mih ccaaw hae tuh
khyndadyh lan a um cih hae;
mih ciihan hae tuh namaw malang khe
tynsah athua cih hae.