23
1 Oute Balaam nynh Balak kha, “Hein kya silawhang ccangsari yn raepah lah, tangnuapaw sa sari te tuutepaw sa sari kha kamaw hanlan yn paccynpya tua,” a cipya.
2 Balaam nynh a ho hawte Balak nynh a cyi; te Balak te Balaam nynh tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law hae.
3 Oute Balaam nynh Balak kha, “Maee-ute si na lawnaw pe hein kyahin la thadyn lah, kae tuh ccanglang ka la cceih hin. Bawipaw tuh kae te tungku khylan poh yn cceih vema. Aning nynh yn muihsahpaw miakaw kha kae hopah cih,” a cipya. Te aning tuh ahangnaw lang a cceihthung.
4 Oute Pachia nynh Balaam kha a tungku; te Balaam nynh Pachia kha, “Beikhang ccangsari kha ka paccyn zah, tangnuapaw sa kheit ccite tuutepaw sa kheit cci khate silawhang ccangkheit cci kya si ka law vae,” a cipya.
5 Bawipaw nynh Balaam mung kyakhe bya nung zah, “Balak kalan ki lah, hynhcite na ho cih,” a cipya.
6 Tukeiccuze Moab bawi hae balyn ryte maee-ute si a lawnaw pe kya a thadynpaw Balak kalan khe Balaam tuh a ki.
7 Oute Balaam nynh profehbya lante ho zah:
“Balak nynh Aram kyate yn hoei,
Moab siapharan nynh
nithua lang e mua hae kyate,
‘Oun cceih lah, kamaw hanlan
Jakob kha thya yn lawpya tua;
Oun cceih lah,
Israel hynh thethyasah tua!’ a ci.
8 Pachia nynh thya a law leipaw kha
pawtemou thya ka law kho cih?
Bawipaw nynh the a thyasah leipaw kha
pawtemou the ka thyasah kho cih?
9 Pawccecize chia dung kyate
amaw kha ka muih,
mua hae kyate amaw kha ka do;
A makhaete a umpaw minphuin tuh
hein kya um zah, tuh-e minphuin tuh
ccangpaw minphuin hae laku kya
pykuh bua lan khyh!
10 Hung nynh mou Jakob laenoi kha
a ria kho cih zah,
Israel pum pali pum kheit kha
a ria kho cih?
Miding chinaw hawte
ka chih sah lah,
Ka ccyh thangnaw tuh
amaw athangnaw hawte
thua sah!” a ci.
11 Oute Balak nynh Balaam kha, “Pawcce ka tungvaw hynhte na cyi? Ka rhaw hae kha thyalaw khylan khaw kae cciakhae, thuasalama atu minmin tungvaw pawpaw cyi leite hythua na pya hae,” a cipya.
12 Balaam nynh, “Bawipaw nynh ka mung kya a nungpaw byaho lanpaw kha pawlangria leite tou ka um cih?” a cipya.
Balaam kya-e Vaeningnaw Profehbya
13 Tukeiccuze Balak nynh Balaam kha, “Israel hae na muih khonaw hmin ccangpaw kalan kamaw ryte cceihbua; minmin kha pong na muih lan khyh hae zah abang kyalya kha na muih cih hae; oute tuin kyate minmin kha kamaw hanlan thya yn lawpah hae,” a cipya.
14 Tukeiccuze Balak nynh Balaam kha Pisgah mua dung umpaw Zofim loo lang a cciakhae. Beikhang ccangsari rae zah tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law.
15 Balaam nynh Balak kha, “Kae tuh khuhlang Bawipaw ka la tungku loukaw nang tuh maee-ute si na lawnaw pe hein kyahin la thadyn,” a cipya.
16 Bawipaw nynh Balaam kha a tungku, te a mung kyakhe bya nung zah, “Balak kalan ki lah, hynhcite la hopya tua,” a cipya.
17 Balaam nynh Balak kya he athua tuh, Balak tuh maee-ute si a lawnaw pe khe la thadyn zah Moab bawi hae ryte la um hae. Balak nynh Balaam kha, “Bawipaw nynh paw bya mou a ho?” a cipya.
18 Oute Balaam nynh profehbya te ho zah,
“Balak, thokuh lah, ngaetua;
Pou Zippor ccapaw,
ka bya yn ngaepya tua:
19 Pachia tuh hynbya a ho hepaw
ccungccaw thua khyh,
a thinlung a paleihkuh hepaw,
achihthyapaw ccungccaw thua khyh.
Bya a kinpyaku vae paw kha
cyih lan khyh tou?
A ho vae paw kha
ccingsah lan khyh tou?
20 Dotua, hythua pyanaw kaw
ka mue vae;
hythua yn pya vae zah,
tuh-e tuh ka roh kho khyh.
21 Aning nynh Jakob tungvaw
vethyanaw muih khyh;
Israel kya vawsawnaw mah
muih khyh.
Bawipaw mih Pachia tuh
minmin kya um zah,
siapharan roipi tuh
minmin laku a um.
22 Izip ram kyate a poukhaetu hae paw
Pachia tuh minmin hanlan
ccungtepaw ki te nynh aloku.
23 Jakob rawsete mitleihthyanaw tuh
thane khyh,
Israel rawsete apawepaw
thyanaw tuh thane khyh,
atu tuh Jakob te Israel konglang
ho athua cih,
‘Pachia nynh a cyipaw hynh
dotua oh!’
24 Dotua, e minphuin tuh
chindeih pinung hawte thokuh zah,
chindeih tepaw hawte a thadyn!
A kyngpaw saw kha
a ae kou maw te
a teipaw chii kha
a zu maw tuh rya khyh,” a ci.
25 Oute Balak nynh Balaam kha, “Minmin tungvaw kharouh thyalaw nan hae lah, hythua mah kharouh pya nan hae,” a cipya.
26 Thuasalama Balaam nynh Balak kha, “ ‘Bawipaw nynh a hopaw miakaw kha ka cyi lanpaw nynh thua,’ cite kae hopah khyh tou?” a cipya.
27 Tukeiccuze Balak nynh Balaam kha, “Atu yn cciatua, hmin ccanglang kae cciakhae cih; tuin kyate kamaw hanlan minmin kha thya nae lawpya kho nawlan, tuh-e tuh Pachia lungry poh athua vema,” a cipya.
28 Tukeiccuze Balak nynh Balaam kha Shaddai ram alangnaw Peor mua dung langkhe a cciakhae.
29 Balaam nynh Balak kha, “Hein kya silawhang ccangsari yn raepah lah, tangnuapaw sa sari te tuutepaw sa sari kha kamaw hanlan yn paccynpya tua,” a cipya.
30 Tukeiccuze Balaam nynh a hopya thyhte Balak nynh cyih zah tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law.