27
Pilat kalan Jesu Cciakhaenaw
(Mar 15.1; Luk 23.1-2; Joh 18.28-32)
1 Awkhua takaw khe ranpibawi lepaw hae te piccan hae balyn nynh Jesu kha chia lante khua a khan hae.
2 Jesu kha a he kou hae te cciakhae hae zah ram uktu Pilat kalan a pya hae.
Judas nynh Amaw A Chiaku
3 Jesu a pheetupaw Judas nynh Jesu kha chia lan seibe vae hae cipaw he a nyh tuh ngaesikuh zah ngunphua sung thum kha ranpibawi lepaw hae te piccan hae kalan bua ccyng zah,Ref 27.3-8: Loc 1.18-19
4 “Seinaw a hoi leipaw ccungccaw chii kha ka pheepaw tuh phe ka sei vae,” a cipya hae. Minmin nynh, “Tuh-e tuh kaening te pawmou asekuh? Na ry hawte la cyih,” a ci hae.
5 Judas nynh ngunphua tuh beikinn lungkhu dae vua zah a cciataw; te cceih zah amaw te amaw a nging okuh zah a chih.
6 Te ranpibawi lepaw hae nynh ngunphua kha khuin hae zah, “E phua hynh chiise mee athua keiccuze Beikinn sisua ccynaw kya nung lan ccan khyh,” a ci hae.
7 Minmin nynh khuakhan hae zah ramccang hae uu nawlan cite ang raetupaw loo kha tuh-e phua te a re hae.
8 Tukeiccuze tuh-e loo tuh, ‘Chii Loo’ cite atunin cia a ko hae.
9 Tuhcite profeh Jeremiah nynh, “Israel ccungccaw hae nynh amee a khya hae paw ccungccapaw mee ngunphua sung thum kha lah hae zah,Ref 27.9-10: Zek 11.12-13
10 Bawipaw nynh kaw yn pya thyhte tuh-e phua tuh ang raetupaw loo mee lang a pya hae,” cite a hopaw bya tuh yn ccing vae.
Pilat malang Jesu
(Mar 15.2-5; Luk 23.3-5; Joh 18.33-38)
11 Jesu tuh ram uktu malang thadyn zah ram uktu nynh, “Nang hynh Judah hae Siapharan na thua tou?” cite a khia. Jesu nynh, “Na ho hawte nynh thua,” a cipya.
12 Thuasalama ranpibawi lepaw hae te piccan hae nynh amaw kha seibe hae zah kaw kheit san khung khyh hae.
13 Pilat nynh, “Minmin nynh seinaw patae ae be hae paw tuh na thae khyh tou?” a cipya.
14 Jesu nynh bya kaw kheit san khung khyh, tukeiccuze ram uktu tuh myarya a ngaeangthua.
Jesu Chia lan Byapia hae
(Mar 15.6-15; Luk 23.13-25; Joh 18.39-19.6)
15 Kawtaw Poi vae ze ccungccaw zapi nynh pousah lan a ry hae paw thongccahpaw lu kheit kha ram uktu nynh leih a sawpya hae.
16 Tuh ccyh lyakhe Barabbas a ci hae paw a minthaanpaw thongccahpaw lu kheit a um.
17 Tukeiccuze ccungccaw zapi tuh he oun pumkuh hae te Pilat nynh minmin kha, “Nanning nynh hummou nae sawsah ry oh? Barabbas tou, tuhkhyhze Messiah cikuhpaw Jesu tou?” cite a khia hae.
18 Pawccecize ranpibawi lepaw hae nynh mih eiung keiccu nynh Jesu kha a ap hae cipaw Pilat nynh phe a ny.
19 Pilat tuh byapianaw tungkhung vawlan he a haung tuh, a zu nynh ccungccaw yn saw zah, “Khah-e midingpaw kha pawpaw mah la cyih nan; pawccecize khah-e paw keiccuze atazi ka maan kya myarya ka teing,” cite bya a taw.
20 Ranpibawi lepaw hae te piccan hae nynh Barabbas a lue nawlan ngia lan zah Jesu kha chiasah lan cite ccungccaw zapi kha a hyy hae.
21 Ram uktu nynh, “Hynh-e lu ning hae kyaze hum hynh mou nae hanlan nae sawsah ry oh?” cite minmin kha a khia hae. Minmin nynh, “Barabbas,” a ci hae.
22 Pilat nynh, “Tuhteze Messiah cikuhpaw Jesu hynh pawtemou ka cyih cih?” cite a khia hae. Minmin balyn nynh, “Aning tuh vaelantung kya khiade thua sah,” a ci hae.
23 Te ram uktu nynh, “Pawccemou, paw seinaw mou a rae?” cite a khia hae. Thuasalama minmin nynh, “Aning tuh vaelantung kya khiade thua sah,” cite houh a sia hae.
24 Pilat nynh pawpawte mah ka tae kho vae lan khyh hae, keisukeilae houh yn um vae cih hae cipaw kha he a muih tuh tui kha lawkuh zah ccungccaw zapi malang a kuih kha singkuh zah, “E midingpaw chiise kyahin kae tuh ka thyaa, e tuh naemaw nynh cyih oh,” a ci.Ref 27.24: Deu 21.6-9
25 Ccungccaw balyn nynh, “E paw chiise tuh kae tungvaw te kae ccaaw hae tungvaw kya ccah vae sah,” a ci hae.
26 Te Pilat nynh Barabbas kha mih kalan a sawpya hae. Jesu kha buasah hae zah vaelantung kya khiade lan a ap vae.
Rhawkaw hae nynh A Sarya hae
(Mar 15.16-20; Joh 19.2-3)
27 Te ram uktu a rhawkaw hae nynh Jesu kha ram uktu inn langkhe cciakhae hae zah rhawkawphu phu kheit kha abalynte Jesu pe khe a pum hae.
28 A boeining kha phae hae zah boei sepaw kha a zingsaku hae.
29 Hinpaw kha lukhung lang a khepah kou hae te a lu vawlan a khungsah hae, a ranglang kuih kya phaeku kha a ccyngsah hae; a malang khe mih ccukharutung hae zah, “Judah hae Siapharan tuh a she sae vae sah!” cite a sarya hae.
30 Mih tuing te a thoi hae, phaeku kha lawkuh hae zah a lu kha a bua hae.
31 Jesu kha a sarya kou hae te boei sepaw kha khah hae zah amaw a boeining kha bua a lawsahku hae, te vaelantung kya khiade lan a cciakhae hae.
Jesu Khiadenaw
(Mar 15.21-32; Luk 23.26-43; Joh 19.17-27)
32 Minmin nynh a ccia lya hae khe Sairen khuapaw Simon cikuhpaw kha he muih hae tuh Jesu vaelantung kha puih lan a riase hae.
33 Luru Hmin a ci hae paw Golgotha cikuhpaw hmin kya he a thua hae te,
34 akhahpaw te apykuhpaw misutui ariapaw kha nia lan a pya hae; Jesu nynh taangtua zah neih ry khyh.Ref 27.34: Sam 69.21
35 Jesu kha vaelantung kya a khiade kou hae te, a boeining kha ccungthydungte a neeku hae;Ref 27.35: Sam 22.18
36 tukoute tuin kya haung hae zah Jesu kha phang a ngaw hae.
37 “E paw tuh Judah hae Siapharan Jesu nynh thua,” cite sei a benaw hae paw ccaw kha zei hae zah a lu luki khe a taw hae.
38 Damiah hae lu ning kha Jesu ryte a ranglang lu kheit, a voilang lu kheit vaelantung kya a khiade hae.
39 Laanpi kya a cceih bungthung hae paw nynh amaw kha a sarya hae, mih lu thuhpah hae zah,Ref 27.39: Sam 22.7, 109.25
40 “Beikinn kha phou zah nin thum lungkhu a sakthuipaw nang, namaw te namaw kha khumku tua! Pachia Ccapaw na thua ze vaelantung kyate yn rungtua!” a ci hae.Ref 27.40: Mat 26.61; Joh 2.19
41 Tuhawte kawbya sazae hae, piccan hae te ranpibawi lepaw hae nynh mah sarya hae zah,
42 “Aning nynh ming hae ze khum hae zah amaw ze khumkuh kho khyh. Aning tuh Israel Siapharan nynh thua; atumaw vaelantung kyate yn rungtua sah lah amaw kha kae zyn cih.
43 Aning tuh Pachia kha a doliakuh, Pachia nynh a ry ze atumaw luesah tua sah; pawccecize, ‘Kae tuh Pachia Ccapaw nynh ka thua,’ a ciku,” a ci hae.Ref 27.43: Sam 22.8
44 Amaw ryte vaelantung kya a khiade hae paw damiah hae nynh mah tuhawte a saryabua hae.
Jesu A Chih
(Mar 15.33-41; Luk 23.44-49; Joh 19.28-30)
45 Ninthuccynglyn kyate zete suimilan ccangthum cia ram balyn tuh pong amoh.
46 Zete suimilan ccangthum loukaw khe Jesu nynh, “Eli, Eli, lama sabakthani,” cite thawte a sia. Asuilan tuh, ‘Ka Pachia, ka Pachia, pawccemou nae vua?’ cipaw nynh thua.Ref 27.46: Sam 22.1
47 Tuin kya a thadyn hae paw abang nynh tuh-e tuh thae hae zah, “E paw nynh Elijah kha a ko,” a ci hae.
48 Minmin lakuze lu kheit nynh ccue kangmaw zah boeipuepaw kha lah zah misutui ariapaw kyakhe a dung koute ccungngue dung khe heede zah nia lan a pya.Ref 27.48: Sam 69.21
49 Tuhlae hae nynh, “Umtua hin, e paw khum khylan Elijah tuh yn thua ta, yn thua khyh ta dotua hin oh sih,” a ci hae.
50 Jesu tuh thawte bua a sia koute a hy athang vae.
51 Tuh ccyh lyatuin beikinn lungkhu a zo hae paw boei tuh alu te alia cia zung ning lang aseiikuh. Innrysuekuh zah lungpi hae akoi.Ref 27.51: Exo 26.31-33
52 Shaw hae hungkuh zah a ih hae paw mithyaa hae pyn patae tuh a thoo hae.
53 Jesu a thoothui koute shaw hae kyate oun pou hae zah khua thyaapaw lungkhu lang tee hae zah ccungccaw patae kya a langkuh hae.
54 Jesu a rin hae paw rhawbawipaw te a umkheih hae paw nynh innry asuekupaw te acyihkuhpaw balyn kha he a muih hae tuh myarya rih hae zah, “E paw tuh Pachia Ccapaw ccaccing nynh thua,” a ci hae.
55 Galilee ram kyate Jesu kha bawm hae zah a zui hae paw nopi hae patae mah tuin kya umbua hae zah arua te a dobua hae.Ref 27.55-56: Luk 8.2-3
56 Tuh-e hae kyakhe Magdala khuanung Mary, James te Josef mih nung Mary te Zebedi ccaaw hae mih nung mah a umbua hae.
Jesu Rhua Ccynaw
(Mar 15.42-47; Luk 23.50-56; Joh 19.38-42)
57 Zetesang tuh Arimathea khuapaw a min Josef a ci hae paw mihoipaw yn thua, aning tuh Jesu zuitupaw nynh athuabua.
58 Tuh-e paw nynh Pilat kalan cceih zah Jesu rhua kha a ngia; Pilat nynh Jesu rhua kha Josef kalan pya lan kaw a pya hae.
59 Josef nynh Jesu rhua kha lawkuh zah athyaapaw boei rawpaw nebaleihpaw te a lung,
60 amaw shaw lang cite lung a karynkupaw shaw thawpaw kyakhe a uu; tukoute myarya lepaw lung kha tounua zah athuhfu lang a hu koute a cciataw.
61 Te Magdala khuanung Mary te ccangpaw Mary tuh shaw te ahawiliakuh lante tuin kya a haung hae.
Shaw Rhawvia hae
62 Paccynku nin koute, awkhualan nin kya ranpibawi lepaw hae te Farasi hae tuh Pilat malang sueluakuh hae zah,
63 “Bawipaw, e mihynpaw nynh a hiin lyaze, ‘Nin thum koute ka thoothui cih,’ cite a hopaw kha kae syntaw.Ref 27.63: Mat 16.21, 17.23, 20.19; Mar 8.31, 9.31, 10.33-34; Luk 9.22, 18.31-33
64 Tukeiccuze nin thum abia makhia shaw kha varyng rin lan kawpya hae, tuhkhyhze tuh a zuitu hae nynh khuazi khe oun cceih cih hae zah phe oun ruh cih hae, te ccungccaw hae kha, ‘Aning tuh chinaw kyate phe thoo vae,’ oun cipah cih hae; tukeiccuze nyathyakou e hynbya tuh masaty e laeze houh yn seihua vae cih,” cite a hopya hae.
65 Pilat nynh, “Rhawviatu rhawkaw hae phang na hoi oh, la cceih oh lah na cyi kho oh thyhte shaw kha la khynsah oh,” a cipya hae.
66 Tukeiccuze cceih hae zah lung kha tazeih a khia kou hae te rhawviatu hae kha nungsya hae zah shaw kha a ngawsah hae.