26
Jesu Chia lan Pheenaw
(Mar 14.1-2; Luk 22.1-2; Joh 11.45-53)
1 Jesu nynh e bya hae balyn hynh a ho koute a zuitu hae kha,
2 “Nin ning koute Kawtaw Poi a um cih cipaw na ny oh, Ccungccaw Ccapaw tuh vaelantung kya khiade khylan ap athua cih,” a cipya hae.Ref 26.2: Exo 12.1-27
3 Tetuh ranpibawi lepaw hae te piccan hae tuh Kaiafas a ci hae paw ranpibawi lupi inn kya oun tungkuh hae zah,
4 Jesu kha aruh lante kyng lan zah chia lan cite khua a khanku hae.
5 Thuasalama, “Ccungccaw hae oun pokuh sei cih hae, poi nin tuh chia lei lan,” a ci hae.
Bethani kya Zimuin A Thuh hae
(Mar 14.3-9; Joh 12.1-8)
6 Jesu tuh Bethani khua kya vaethyakaepaw Simon inn kya a um lyakhe,
7 nopinung lu kheit nynh myarya amee rupaw zimuin alabasta lung rawpaw bu kheit kha Jesu kalan yn ccyng zah ae lan cite a haung lyakhe a lu kya a bu.Ref 26.7: Luk 7.37-38
8 A zuitu hae nynh a muih hae tuh mih thinria zah, “Pawccemou e hynh alakaw lan a tangsah han?
9 Pawccecize e zimuin hynh phua patae lang zuate ryachi hae kha pya lanpaw,” a ci hae.
10 Tuh-e tuh Jesu nynh he a nyh tuh minmin kha, “Pawccemou nopinung kha vawsaw na pya oh? Aning nynh ka tungvaw ahoypaw rya kha a law vae.
11 Pawccecize ryachi hae tuh nae kya zungzae a um hae, thuasalama kae tuh nae kya zungzae ka um lan khyh.Ref 26.11: Deu 15.11
12 Pawccecize ka pyn kya hynh-e zimuin yn bupaw tuh ka rhua ccynaw elang a paccynpaw nynh thua.
13 Byaccaccing kae hopya oh, laephi pynpi kya hynh-e thehoypaw a honaw hae miakaw kya hynh-e nopinung nynh a cyipaw hynh amaw liathui nawlan hobia athua cih,” a cipya hae.
Judas Iskariot nynh A Nawccaw
(Mar 14.10-11; Luk 22.3-6)
14 Zuitu lu haw lae ning kyaze lu kheit athuapaw, Judas Iskariot a ci hae paw nynh ranpibawi lepaw hae kalan cceih zah,
15 “Jesu kha nae kalan kae ap oh ze pawmou nae pya cih oh?” cite a khia hae. Minmin nynh ngunphua sung thum kha ria hae zah a pya hae.Ref 26.15: Zek 11.12
16 Tuin ccyh kyate Judas nynh Jesu phee lanpaw ccyhhoy kha a ccung vae.
Bawipaw Zerya
(Mar 14.12-21; Luk 22.7-13, 21-23; Joh 13.21-30)
17 Ransi phing leipaw Sanlou Poi masaty nin khe zuitu hae nynh Jesu kalan oun cceih hae zah, “Kawtaw Poi na ae nawlan pawkyamou kae la paccynpah cih?” cite a khia hae.
18 Jesu nynh, “Khua lungkhu lang la cceih oh lah ccungccapaw lu kheit kha, ‘Sazaepaw nynh ka ccyh anae vae, ka zuitu hae ryte na inn kya Kawtaw Poi kae mang cih, a ci,’ cite la hopah oh,” a cipya hae.
19 Jesu nynh a hopya hae hawte zuitu hae nynh cyih hae zah Kawtaw Poi zerya kha a paccyn hae.
20 Zete ccyh yn thua te Jesu tuh lu haw lae ning ryte ae lan a haung hae.
21 A ae lya hae khe Jesu nynh, “Byaccaccing kae hopya oh, nanning laku e lu kheit nynh kae hynh yn phee cih,” a ci.
22 Tetuh minmin tuh myaryamaw mih ngaethah zah, “Bawipaw, tuh-e paw tuh kae ka thua khyh khaw?” cite lu kheit koute lu kheit nynh a khia hae.
23 Jesu nynh, “Kae te pake kya kae pukheihpaw nynh yn phee cih.Ref 26.23: Sam 41.9
24 Ccathyaa kya amaw kong azeiku thyhte Ccungccaw Ccapaw tuh a chih cih; thuasalama Ccungccaw Ccapaw a pheetupaw hanlan ngaethya lan kou um! Tuh-e paw tuh a la pui khyh ze amaw hanlan ahoyhua cih paw,” a cipya hae.
25 Te amaw a pheetu Judas nynh, “Sazae, kamaw tou ka thua?” a ci. Jesu nynh, “Phe na ho vae latu,” a cipya.
26 Zete zerya a mang lya hae khe Jesu nynh sanlou kha lah zah lungtuabya a ho koute eih zah a zuitu hae kha a pya hae; te, “Lawkuh oh lah ae oh, e tuh ka pyn nynh thua,” a cipya hae.
27 Tukoute banang kha lah zah lungtuabya a ho koute minmin kha pya hae zah, “Nae balynte e hynh neih oh;
28 pawccecize e tuh ccungccaw patae seingaethyanaw hanlan ka laepaw, byakin thawpaw te asekuhpaw ka chiise nynh thua.Ref 26.28: Exo 24.8; Jer 31.31-34
29 Nanning kha kae hopya oh, ka Paaw peenaw kya nanning ryte misutui thawpaw ah niakheih mawlaezung oh, hynhcihawpaw misutui hynh ka neih boi vae lan khyh,” a ci.
30 Hlaw hlakheit a sah kou hae te Oliv Mua lang a cceih hae.
Peter nynh A Vua lanpaw A Hoty
(Mar 14.27-31; Luk 22.31-34; Joh 13.36-38)
31 Jesu nynh minmin kha, “Atu khuazi kya nae balynte nae ccuetaw cih oh; pawccecize Ccathya kyaze,
‘Tuurinpaw kha ka bua cih zah
tuuphu kya-e tuu hae tuh
pong a phiakuh cih hae,’ cite azeikuh.Ref 26.31: Zek 13.7
32 Thuasalama ka thoothui koute nae malang Galilee lang ka la cceih ty cih,” a cipya hae.Ref 26.32: Mat 28.16
33 Peter nynh Jesu kha, “Ming hae balyn nynh ae ccuetaw hae zemah kae tuh kharouh kae ccuetaw lan khyh,” a cipya.
34 Jesu nynh Peter kha, “Byaccaccing kae hopya, atu khuazi aw a khua mawze vae thum nae vua cih,” a cipya.
35 Peter nynh, “Nang te chikheih lan accan zemah nang kha kae vua lan khyh,” a cipya. Tuh-e hawte zuitu hae balyn nynh mah a cibua hae.
Kethsemane kya Jesu Sawsang
(Mar 14.32-42; Luk 22.39-46)
36 Jesu tuh zuitu hae ryte Kethsemane a ci hae paw hmin kya thua hae zah minmin kyakhe, “Khuhlang khuin ka la cceih cih zah saw ka sang loukaw hein kya la haung hin oh,” a cipya hae.
37 Peter te Zebedi ccaaw hae lu ning kha a hoeibua hae; te a ngaethah zah a lungvawsaw takaw vae.
38 Minmin kyakhe, “Chikhaeku lan ciate myaryamaw ka lungriathae; hein kya um oh lah kamaw ryte ngaw oh,” a cipya hae.
39 Te takyh asawnaw lang a cceih koute laekhu kya bakhung zah, “Pou ka Paaw, athua kho ze e banang nynh kae hynh yn kawtaw sah; thuasalama kae ka ry hawte thua nan sah, na ry hawte thua sah,” cite saw a sang.
40 Te zuitu hae kalan thua zah a ih hae paw kha a muih, te Peter kha, “Pawte! Suimilan ccangkheit san nae ngaw kho khyh oh tou?
41 Tuhounaw lungkhu lang na ccaw khyh nawlan oh sawsangte ngaw oh; thinlung nynh tuh a ry ccaccing, thuasalama pynsaw tuh a thawzya,” a cipya.
42 Vae ningnaw bua cceih zah, “Ka Paaw, hynh-e banang hynh kae nynh nia leite athua kho khyh ze na rynaw hawte cyihkuh sah,” cite saw a sang.
43 Tukoute a zuitu hae kalan bua yn thua zah mih mit tuh daekuh vae khyh zah a ih hae paw kha a muih.
44 Minmin kha bua cciataw hae zah a cceih koute sawsang zah a homaepaw kha bua aho.
45 Tukoute a zuitu hae kalan yn thua zah minmin kha, “Na ih ung oh zah na haeung ung oh tou? Dotua oh, Ccungccaw Ccapaw tuh misei hae kuih kalan pyanaw ccyh yn thua vae.
46 Tho oh, cceih ccavae oh sih; dotua oh, kae yn pheepaw tuh yn thua vae,” a cipya hae.
Jesu Kyngnaw
(Mar 14.43-50; Luk 22.47-53; Joh 18.3-12)
47 Jesu nynh bya a ho cciamang lyakhe lu haw lae ning kyaze lu kheit athuapaw Judas tuh ranpibawi lepaw hae te piccan hae nynh oun saw hae paw ccungccaw zapi ryte thaloi te tungbang ccyngkute oun thua vae hae.
48 Te amaw a pheetupaw nynh syntawnaw pya hae zah, “Kae nynh kae myngpaw tuh na kyng ry oh paw ccungccaw kha thua zah nae kyng cih oh,” cite a hopya hae.
49 Judas tuh Jesu kalan palou yn cceih zah, “Sazae, na tungvaw daenaw um sah!” cite byabeih zah a myng.
50 Jesu nynh, “Ka ban, cyi lan na paccynkupaw kha cyih ccaleih,” a cipya. Te minmin nynh oun thua hae zah Jesu kha kyng hae zah a he hae.
51 Tetuh Jesu te a umkheih hae paw lu kheitpaw nynh a thaloi kha thuaakuh zah ranpibawi lupi seepaw kha a nakua thoh pae lan a bae.
52 Jesu nynh tuh-e paw kha, “Na thaloi kha a bu lungkhu lang sang; pawccecize thaloi a kyngpaw balyn tuh thaloi te a chih cih hae.
53 Ka Paaw nynh vaaw hae kha rhawkawphu haw lae ning lae alung lan palou yn sawpya nawlan ka Paaw kalan ngiakuh kho lan khyh cite tou na tua?
54 Thuasalama tuhte a la thua lanze, Ccathyaa nynh, ‘Hynhte acyikuh cih,’ a cipaw kha pawtemou accing vae cih?” a cipya.
55 Tuin ccyh kyakhe Jesu nynh ccungccaw zapi kha, “Kae hynh miruh hawte kyng khylan thaloi te, tungbang te nae ccianua oh tou? Beikinn kya ka haung zah nin takyh kae ccangpya lya oh ze nae kyng khyh oh.Ref 26.55: Luk 19.47, 21.37
56 Thuasalama profeh hae kya-e Ccathyaa accing nawlan nynh hynh-e balyn hynh acyiku,” a cipya hae. Tetuh zuitu hae balyn nynh amaw kha cciataw hae zah a ccuetaw vae hae.
Ranpibawi Lupi malang Jesu
(Mar 14.53-65; Luk 22.54-55, 63-71; Joh 18.13-14, 19-24)
57 A kyngtu hae nynh Jesu kha kawbya sazae hae te piccan hae a sueluakunaw hae ranpibawi lupi Kaiafas kalan a cciakhae hae.
58 Peter nynh ranpibawi lupi maepaw kyacia asawnaw te amaw kha a zui; maepaw langkhe teebua zah nyathyakou pawtemah yn cyiku cipaw muih khylan rhawviatu hae kyakhe a haungbua.
59 Ranpibawi lepaw hae te kungsi hae balyn nynh Jesu kha chia khylan ahme leipaw ccaekia kha a ccungpya hae,
60 thuasalama muih khyh hae; ahme leipaw ccaekia patae oun thua hae zemah a seinaw kha muih khyh hae. Nyathyakou kya ahme leipaw ccaekia lu ning oun thua hae zah,
61 “E paw nynh, ‘Pachia beikinn hynh ka phou cih zah nin thum lungkhu ka sakthui kho cih,’ a ci,” cite a ho hae.Ref 26.61: Joh 2.19
62 Ranpibawi lupi nynh thadyn zah Jesu kha, “Kaw kheit san na khung khyh hae rei, ccaekia ae khangnua hae paw hynh pawtemou athua?” a cipya.
63 Thuasalama Jesu tuh yccae khyh. Te ranpibawi lupi nynh, “A hiinpaw Pachia min phyate thyalawkute bya na kinkuh cih; nang hynh Pachia Ccapaw Messiah na thua tou, na thua khyh tou oun hopya tua,” a cipya.
64 Jesu nynh, “Nang nynh phe na ho vae latu. Thuasalama kae hopya oh,
Atu koute Ccungccaw Ccapaw tuh
Alesaepaw a ranglang
a haungpaw te vaawlang e
maeking kyate yn rungpaw kha
nae muih cih oh,” a cipya.Ref 26.64: Dan 7.13
65 Te ranpibawi lupi nynh a boeining kha seii zah, “Pachia saryanaw bya kha a ho vae! Ccangpaw ccaekia ho vae khyh. Pachia saryanaw bya a hopaw kha atu phe na thae vae oh.Ref 26.65-66: Lev 24.16
66 Pawte na tua oh?” a cipya hae. Minmin nynh, “Aning tuh chi lan accan,” a ci hae.
67 Te a mae kha thoi hae zah a thung hae, abang nynh mih kuihphe te bia hae zah,Ref 26.67: Isa 50.6
68 “Messiah, hummou ae bia? Profehbya te oun hopya tua!” a ci hae.
Peter nynh Jesu A vua
(Mar 14.66-72; Luk 22.56-62; Joh 18.15-18, 25-27)
69 Peter tuh atolang maepaw kya a haung lyakhe ryalawpahtunung lu kheit nynh a kalan yn cceih zah, “Nang hynh mah Galilee paw Jesu ryte na umkheih oh paw khaw?” a cipya.
70 Thuasalama Peter nynh mih balyn malang khe pheikuh zah, “Paw kong nynh na ho cipaw ka nyh khyh,” a cipya.
71 Te Peter tuh maepaw sakoih kalan he a cceih te, ccangpaw ryalawpahtunung nynh muih zah tuin kya a um hae paw kyakhe, “E paw hynh Nazareth paw Jesu ryte a umkheih hae paw nynh thua,” cite a hopya hae.
72 Thuasalama Peter nynh thyalawkute, “Tuh-e paw tuh ka nyh khyh,” cite bua a pheiku.
73 Sosoh acih te tuin kya a thadyn hae paw nynh Peter kalan oun thua hae zah, “Thanccingte nang hynh mah minmin kya a mungkuh buapaw lu kheit nynh na thua, pawccecize na byange nynh phe ae phy,” a ci hae.
74 Peter nynh, “Tuh-e paw tuh ka nyh khyh,” cite thyalawkuh zah bya a kinku. Tuh ccyh lyakhe aw yn khua vae.
75 Jesu nynh, “Aw a khua mawze vae thum cia nae vua cih,” cite a hopyapaw bya kha Peter nynh a liathui vae. Te atolang pou zah thawmawte a rah.