9
Jehu kha Chitui Thuhnaw
1 Tetuh profeh Elisha nynh profeh hae phu kya-e lu kheit kha ko zah, “Na taevoiboei kha voikuh; e chitui bawng hynh lawkuh lah, Ramoth-gilead lang la cceih.
2 He na thua te, Nimshi ccapaw Jehoshafat a ccapaw Jehu kha la ccung; te la tee lah, a ruiban hae kyate na pousah cih zah, alungkhu lang e akhaan lungkhu langkhe na teekhae cih.
3 Te chitui bawng kha lawte a lu kha na bu cih zah, ‘Bawipaw nynh hynhte a ho: Nang hynh Israel siapharan lang chitui kae thuh, a ci,’ cite la hopah. Te thuakaw kha na hung cih zah na ccue cih; na thysung nan sah,” a cipya.
4 Tukeiccuze ccangvaepaw, profehpaw taraw tuh Ramoth-gilead lang a cceih.
5 Rhawkaw hae a uktu rhawbawi hae a la pumku lya hae khe aning tuh thua zah, “Pou rhawbawipaw, nang kae hopya lanpaw bya ka hoi,” a cipya. Jehu nynh, “Kaening laku e hummou na hopah cih?” cite khia zah, “Pou rhawbawipaw, namaw kha nynh thua,” a cipya.
6 Tukeiccuze Jehu tuh thokuh zah alungkhu lang a tee; ccangvaepaw nynh a lu vawlan chitui bu zah, “Bawipaw Israel Pachia nynh hynhte a ho: Nang hynh Bawipaw ccungccaw hae, Israel hae siapharan lang chitui kae thuh.Ref 9.6: 1Si 19.16
7 Ka ryalahtu profeh hae chiise te Bawipaw ryalahtu hae balyn chiise kha a luasah keiccuze Jezebel tungvaw phu ka law nawlan, na bawipaw Ahab ciihan hae kha na theih cih hae.
8 Ahab ciihan balyn tuh a roh cih hae; Israel ram kya umpaw a luepaw thuasah, a lue leipaw thuasah Ahab ciihan pise miakaw kha ka vua cih hae.
9 Ahab ciihan kha Nebat ccapaw Jeroboam ciihan hawte thuasah, Ahijah ccapaw Baasha ciihan hawte thuasah ka cyih cih.
10 Ui nynh Jezebel kha Jezreel ram kya a ae cih, humhung nynh mah amaw kha uh lan khyh,” a cipya. Tukoute thuakaw kha hungkuh zah a ccue.Ref 9.10: 1Si 21.23
11 Jehu tuh a bawipaw ryalahtu hae kalan he yn thua te, minmin nynh, “Atyn-are ahoy tou? Mingaeepaw kha pawccemou na kalan yn ccia?” cite a khia hae. Aning nynh, “Khah-e paw te a bya kha phe na ny oh,” cite a khung hae.
12 Minmin nynh, “Thua khyh! Oun hopya tua!” a ci hae. Tukeiccuze Jehu nynh, “Aning nynh kae yn hopyapaw bya tuh: ‘Bawipaw nynh hynhte a ho, nang hynh Israel siapharan lang chitui kae thuh,’ a ci,” cite a hopya hae.
13 Tetuh mih balynte mih angkiccua kha palou lah hae zah ccu synaw kyakhe Jehu kha a phaepya hae; te mungkae tu hae zah, “Jehu tuh siapharan nynh thua,” cite a sia hae.
Israel Siapharan Joram Chianaw
14 Tuhcite Nimshi ccapaw Jehoshafat a ccapaw Jehu nynh Joram kha rawse zah a phee. Joram tuh Israel hae balyn ryte Siria siapharan Hazael kha dou khylan Ramoth-gilead kya a um hae;
15 thuasalama Siapharan Joram tuh Siria siapharan Hazael a tuk lyaze Siria hae nynh a muesah hae paw maw kha dansaku khylan Jezreel lang a ki vae. Te Jehu nynh, “E hynh na ry oh zetuh, e thongpang hynh Jezreel khua kya ho khylan, e khua kyate humhung mah ccia sah nan oh,” a ci.
16 Jehu tuh a marangle kha ccikuh zah, a dan leipaw Joram a umnaw Jezreel khua lang a cceih. Judah siapharan Ahaziah tuh Joram via khylan a cceih.
17 Jezreel khua rhawviainn kya a thadynpaw rhawviatu nynh Jehu te a ccungccaw hae oun ccia hae paw kha he a muih tuh, “Ccungccaw phu kheit ka muih,” a ci. Joram nynh, “Marang rhawkaw lu kheit ko lah, minmin te tungku khylan la sawtua, te aning nynh, ‘Daenaw te athua tou?’ cite khia hae sah,” a cipya.
18 Tukeiccuze marang rhawkawpaw nynh Jehu kha tungku khylan ccianua zah, “Siapharan nynh, ‘Daenaw te athua tou?’ a ci,” cite a hopya. Jehu nynh, “Nang nynh daenaw tuh pawmou na se? Maeleihkuh lah, ka nulang te yn zui,” a cipya. Rhawviatu nynh, “Locceihtupaw tuh minmin kya a thua vae, thuasalama yn ki vae khyh,” a cipya.
19 Te lu ningnaw marang rhawkawpaw kha a saw, tuh-e paw tuh minmin kya thua zah, “Siapharan nynh, ‘Daenaw te athua tou?’ a ci,” cite a hopya hae. Jehu nynh, “Nang nynh daenaw tuh pawmou na se? Maeleihkuh lah, ka nulang te yn zui,” a cipya.
20 Rhawviatu nynh, “Locceihtupaw tuh minmin kya a thua vae, thuasalama yn ki vae khyh. Marangle kha mingaeepaw hawte a mawng keiccuze Nimshi ccapaw Jehu nynh a mawngpaw te nynh aloku,” a cipya.
21 Joram nynh, “Paccyn oh,” a ci keiccuze a marangle kha a paccyn hae. Israel siapharan Joram te Judah siapharan Ahaziah tuh mih marangle raveih kha ccikute Jehu te tungku lan cceih hae zah, Jezreel khuapaw Naboth khokhu khe a tungkuh hae.
22 Joram nynh Jehu kha he a muih te, “Jehu, daenaw te athua tou?” a cipya. Jehu nynh, “Na nung Jezebel nynh a raepaw ohhuakunaw te naawthyanaw patae a um lungkhu balyn tuh daenaw a um kho cih zawtou?” cite a khung.
23 Te Joram nynh maeleihkute ccue zah Ahaziah kha, “Pheekunaw nynh thua, Ahaziah!” a cipya.
24 Jehu nynh a thawzung balynte a li kha suete Joram kha a raw te a raw laku kya a kaw; the nynh a bung kha tung zah Joram tuh a marangle kyate a khuliakuh.
25 Jehu nynh amaw a bawmtu Bidkar kha, “Hang lah, Jezreel khuapaw Naboth laephi kyakhe vua; nang te kae nynh a paaw Ahab nulang marang ah cciku lyaze, Bawipaw nynh amaw kha rawsete hynh-e bya a hopaw kha na syntaw ung cih:
26 ‘Naboth chiise te a ccapaw hae chiise kha inkhawnin ka muih, e laephi kyahin nang kha liaru lan bya ka kinku,’ cite Bawipaw nynh a ci. Tukeiccuze a rhua kha hang lah, Bawipaw bya thyhte laephi kyakhe vua,” a cipya.Ref 9.26: 1Si 21.19
Judah Siapharan Ahaziah A Chia hae
27 Judah siapharan Ahaziah nynh tuh-e tuh he a muih tuh, Beth-haggan langkhe a ccue. Jehu nynh deehui zah, “Amaw kha mah kaw oh!” cipah hae zah, Ibleam pe Gur khua lang kaenaw laanpi kya marangle kyakhe a kaw hae. Te Megiddo khua lang ccue zah, tuin kya a chih.
28 A kuihkaw e bawi hae nynh a rhua kha marangle te Jerusalem lang phu hae zah, David khua kya amaw shawku kyakhe a minpaaw hae ryte a uukheih hae.
29 Ahab ccapaw Joram nynh Israel siapharan lang a tangnaw kum haw lae kheitnaw kum khe Ahaziah nynh Judah ram kha a uk takaw.
Jezebel Chinaw
30 Jehu tuh Jezreel khua a thua cipaw kha Jezebel nynh a thae; a mit kha asi thuhkute a lu kha ccaankuh zah thanlan-aw kyate ngaw a do.
31 Jehu nynh sakoih kya a tee lyakhe, Jezebel nynh, “A bawipaw a theihtupaw Zimri, daenaw te athua tou?” a cipya.
32 Jehu nynh thanlan-aw kalan khe do zah, “Hummou ka kalan a pan? Hummou?” a ci. Tinriapaw ccungccaw hae lu ning lu thum nynh amaw kha thanlan-aw kyate a do hae.
33 Jehu nynh, “Khah-e nung kha yn vua oh,” a cipya hae. Tukeiccuze vua hae zah a chii nynh pang te marang hae kha pia hae zah tuh-e hae nynh a syde hae.
34 Te aning nynh tee zah a ae a neih koute, “Thyalawnaw a muepaw nopinung hynh do oh lah, uh oh, pawccecize aning tuh siapharan ccanung nynh thua,” a ci.
35 Thuasalama uu lan cite he a cceih hae tuh, a luru, a ccu te a kuihphe laelan pawpaw mah muih vae khyh hae.
36 Oun ki hae zah Jehu kha he a hopah hae tuh, aning nynh, “E hynh Bawipaw nynh a ryalahtu Tishbe khuapaw Elijah kyate ho zah, ‘Ui hae nynh Jezebel saw kha Jezreel ram kya a ae cih hae;Ref 9.36: 1Si 21.23
37 e hynh Jezebel shawku nynh thua, cite humhung nynh mah a ho khyh nawlan hae, Jezebel rhua tuh ia hawte Jezreel ram loo kya a um cih,’ a ci,” cite a ho.