8
Shunam Nopinung nynh Loo A Muethui
1 Te Elisha nynh a ccapaw a la hiinsahpyapaw nopinung kha, “Thokuh lah na innbyn hae ryte la cceih oh, khua na sah khonaw hmin miakaw kya la um; pawccecize Bawipaw nynh ccakannaw kha ko vae zah, ram lungkhu kya kum sari lungkhu ccakanccih cih,” a cipya.Ref 8.1: 2Si 4.8-37
2 Tukeiccuze nopinung nynh thokuh zah Pachia ccungccapaw bya thyhte a cyi; a innbyn hae ryte cceih hae zah Filistin hae ram kya kum sari lungkhu a um hae.
3 Kum sari he accing te, nopinung nynh Filistin hae ram kyate ki zah, a inn te a loo bua mue kho nawlan ngiaku khylan siapharan kalan a cceih.
4 Siapharan nynh Pachia ccungccapaw a ryalahtu Gehazi kha bya hokhae zah, “Elisha nynh alesaepaw rya a lawpaw balyn kha yn hopya tua,” a cipya.
5 Elisha nynh a chihpaw a hiinsah thuinaw kong kha Gehazi nynh a hopya cciamang lyakhe, a ccapaw a hiinsahpyapaw nopinung nynh a inn te a loo kha bua mue kho nawlan siapharan kha a ngiaku. Gehazi nynh, “Siapharan ka bawipaw, e nopinung hynh kae hopyapaw nopinung thua zah, e ccapaw hynh Elisha nynh a hiinsahpyapaw a ccapaw nynh thua,” a cipya.
6 Siapharan nynh nopinung kha he a khia tuh, nopinung nynh a hopya. Tukeiccuze siapharan nynh nopinung elang bawi lu kheit kha naw zah, “A uccaw balyn kha, e ram kyate a pou nin te atu cia a loo kyate a poupaw balyn ryte, amaw kha pyathui oh,” a cipya.
Benhadad Chinaw
7 Siria siapharan Benhadad acci cciamang lyakhe Elisha tuh Damaskas khua lang a cceih. “Hein kya Pachia ccungccapaw yn thua,” cite he a hopah hae tuh,
8 siapharan nynh Hazael kha, “Lasung ccyngkuh lah, Pachia ccungccapaw kha tungku khylan la cceih. E ccinaw kyate ka dan cih tou cipaw kha aning nynh Bawipaw kalan yn la khiapya tua sah,” a cipya.
9 Tukeiccuze Hazael tuh Damaskas khua e uccaw ahoyhoypaw kha kalauh sung pali te lasung lang phusah zah, amaw kha tungku khylan a cceih. He a thua te, a malang khe thadyn zah, “Na ccapaw Siria siapharan Benhadad nynh kae hynh na kalan yn saw zah, ‘E ccinaw kyate ka dan cih tou?’ a ci,” cite a hopya.
10 Elisha nynh, “La cceih lah, ‘Solei na dan cih,’ cite la hopah; thuasalama aning tuh solei a chih cih cipaw kha Bawipaw nynh phe yn muihsah vae,” a cipya.
11 Elisha nynh Hazael kha a maesue phe roh lan phang a do. Te Pachia ccungccapaw tuh a rah.
12 Hazael nynh, “Ka bawipaw, pawccemou na raw?” cite khia zah, Elisha nynh, “Israel hae tungvaw na cyi lanpaw hoyleinaw kha ka ny keiccu nynh thua; mih rhawlungrua hae kha maee te na soi cih, mih ccangvae hae kha thaloi te na theih cih hae, mih imua hae kha phe tui lan na noinae cih hae zah ccaawpoipaw mih nopi hae kha mih vue na koi cih hae,” a cipya.
13 Hazael nynh, “Ui sasaw hung ka thuapaw na ryalahtupaw kae nynh pawtemou e ryalaw lepaw hynh ka lah kho cih?”Ref 8.13: 1Si 19.15a cipya. Elisha nynh, “Nang nynh Siria siapharan lang na tang lanpaw kha Bawipaw nynh yn muihsah vae,” a cipya.
14 Te aning nynh Elisha kha cciataw zah a bawipaw Benhadad kalan a cceih, te “Elisha nynh paw bya mou ae hopya?” cite a bawipaw nynh khia zah, “Solei a dan cih, yn cipya,” cite a khung.
15 Thuasalama awkhualan khe Hazael nynh boei thaawkalaepaw kha lah zah tui kya a dung koute siapharan mae kha bong zah a chih. Te Hazael tuh siapharan lang a tang.
Jehoram nynh Judah A Uk
(2Sh 21.1-20)
16 Ahab ccapaw Joram nynh Israel siapharan lang a tangnaw kum pangawnaw kum khe, Judah siapharan Jehoshafat ccapaw Jehoram nynh ram kha a uk takaw.
17 Sung thum kum ning he cih te, siapharan lang tang zah, Jerusalem khua kya kum tarya a uk.
18 A zu tuh Ahab ccanung athua keiccuze Ahab ciihan hae nynh a cyi hae hawte, Israel siapharan hae laanpi kha a zui. Aning nynh Bawipaw muihnaw kya hoyleinaw kha a rae.
19 Tuhzemah Bawipaw nynh a ryalahtu David kyakhe amaw te a ciihan hae kha maeeinn zungzae pya lan bya a la kinpyaku vae keiccuze David liate Judah kha roh khyh.Ref 8.19: 1Si 11.36
20 Jehoram she lyakhe Edom hae nynh Judah uknaw kha dou hae zah mimaw ccungccaw kha siapharan lang a khangku hae.Ref 8.20: Gen 27.40
21 Te Joram nynh a marangle hae balyn ryte Zair langkhe a cceih. Khuazi khe pou zah amaw a koihlu hae paw Edom hae te mih marangle uktu bawi hae kha a tuk hae; te a rhawkaw hae tuh inn lang a ccue hae.
22 Tukeiccuze Edom nynh Judah uknaw kha atunin cia a dou. Libnah nynh mah tuh ccyh lyakhe a doubua.
23 Tuhlaepaw Joram nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.
24 Joram tuh a minpaaw hae ryte ih hae zah, minmin ryte David khua khe a uukheih hae; a ccapaw Ahaziah tuh amaw ccelang siapharan lang a tang.
Ahaziah nynh Judah A Uk
(2Sh 22.1-6)
25 Ahab ccapaw Joram nynh Israel siapharan lang a tangnaw kum haw lae ningnaw kum khe, Judah siapharan Jehoram ccapaw Ahaziah nynh ram kha a uk takaw.
26 Ahaziah nynh kum kuin lae ning he cih te, ram kha uk takaw zah, Jerusalem kya kum kheit a uk. A nung min tuh Athaliah cikuh zah, Israel siapharan Omri a mintanung nynh thua.
27 Ahaziah tuh Ahab ciihan paeepaw athua keiccuze Ahab ciihan laanpi kha zui zah Ahab ciihan hawte Bawipaw muihnaw kya hoyleinaw kha a rae.
28 Ahab ccapaw Joram ryte cceih hae zah Siria siapharan Hazael kha Ramoth-gilead kya a tuk hae, tuin kyakhe Siria hae nynh Joram kha maw a muesah hae.
29 Siria siapharan Hazael kha tuk zah Siria hae nynh Ramah khua kya a muesah hae paw vaemaw kha dansaku khylan Jezreel khua lang a ki. Judah siapharan Jehoram ccapaw Ahaziah tuh Ahab ccapaw Joram vaemaw a mue keiccuze via khylan Jezreel khua lang a cceih.