9
Solomon kya Pachia Bua A Langkuh
(2Sh 7.11-22)
1 Solomon nynh Bawipaw inn, siapharan inn te Solomon nynh sak a rypaw balyn kha he a sak koute,
2 Gibeon khua kya a langpyaku hawte, Bawipaw tuh Solomon kalan vae ningnaw a langkuh.Ref 9.2: 1Si 3.5; 2Sh 1.7
3 Bawipaw nynh amaw kha, “Ka malang saw na sangpaw te nae ngiapaw kha ka thae vae; na sakpaw hynh-e inn hynh ka thyaasah vae zah, a lungkhu kya ka min kha zungzae ka nung vae; ka mit te ka thinlung tuh tuin kya tyty a um cih.
4 Na paaw David nynh a la ccia hawte, nang nynh accingpaw thinlung te dingnaw te ka malang na cceih zah, kaw kae pyapaw balyn thyhte na cyi zah ka phungbya hae te ka phungzae hae kha na zui zetuh,
5 ‘Israel bawitungkhung kya a haung cih paw na ciihan tuh dae lan khyh,’ cite na paaw David kha bya ka kinpyaku hawte, Israel hae kya na siapharan bawitungkhung tuh zungzae ka tynsah cih.Ref 9.5: 1Si 2.4
6 “Namaw thuasah, na ccaaw hae thuasah kae kha zui leite na cceihsei oh zah, nae malang ka nungpaw ka kawbya hae te ka phungbya hae kha zui leite, ccangpaw pachia hae kalan cciate ryalawpyate na beik oh zetuh,
7 ka pya hae paw ram kyate Israel hae kha ka vua cih hae; ka min hanlan ka thyaasahpaw inn hynh ka muihnaw kyate ka vua cih; Israel tuh ccungccaw hae balyn kya phungtangbya te saryapaw lang a tang cih.
8 E inn hynh arohpaw apumkuhpaw lang a tang cih; a pe po a cceih hae paw miakaw nynh mih ngaeangthuate saryanaw roi a sawnua cih hae zah, ‘E ram te e inn hynh Bawipaw nynh pawccemou hynhte a cyi?’ cite a ho cih hae.Ref 9.8: 2Si 25.9; 2Sh 36.19
9 Te minmin nynh, ‘Mih minpaaw hae kha Izip ram kyate a poukhae hae paw Bawipaw mih Pachia kha vua hae zah, ccangpaw pachia hae kha doliakute beik hae zah rya a lawpya hae keiccu nynh thua; tukeiccuze Bawipaw nynh e ronaw hynh mih tungvaw a thuasah,’ cite a ho cih hae,” a cipya.
10 Solomon nynh inn innning, Bawipaw inn te siapharan inn kha sak zah kum kuin he aro te,
11 Tair Siapharan Hiram nynh Solomon kha sidar thing, maeccaw thing te sui kha a ry zeihte a la pya keiccuze Solomon Siapharan nynh Hiram kha Galilee ram e khua khuakuin a pya.
12 Thuasalama Solomon nynh a pyapaw ram kha do khylan Hiram nynh Tair kyate cceih zah he a do tuh, a lungryccing khyh.
13 Tukeiccuze aning nynh, “Ka unopaw, nae pyapaw hynh-e khua hae hynh pawcihawpaw khua hae mou athua hae?” a cipya. Tukeiccuze tuh-e hae tuh atunin cia Kabul ram a ci hae.
14 Hiram nynh siapharan kha sui talent za kheit ccangkuin a pya.
Ccangpaw Solomon Ryalaw hae
(2Sh 8.3-18)
15 Solomon Siapharan nynh Bawipaw inn te amaw inn kha sak khylan te Millo khua, Jerusalem khualungrua, Hazor khua, Megiddo khua te Gezer khua kha rae khylan nangsete rya a lawsah hae.
16 (Izip siapharan Faro nynh Gezer khua kha tuk zah a lah koute maee te a soi, khua kya um hae paw Kanaan hae kha a chia hae, te Solomon zu lang a tangpaw a ccanung kha tuh-e khua tuh a thosakhaeku;
17 tukeiccuze Solomon nynh Gezer khua kha a raethui), Alia Beth-horon,
18 Baalath khua, Judah ram lungkhu ramkaw umpaw Tamar khua,
19 Solomon nynh a hoipaw uccaw a ccakhungnawpaw khua hae, a marangle hae elang khua hae, a marang rhawkaw hae elang khua hae te Jerusalem kya, Lebanon kya te a ukpaw ram hae balyn kyakhe Solomon nynh a rae rypaw khua miakaw kha a rae.
20 Amor hae, Hit hae, Periz hae, Hiv hae te Jebus hae lungkhu e a laehypaw ccungccaw hae, Israel hae athua lei hae paw—
21 Israel hae nynh khaleih a ro kho lei hae paw, ram lungkhu kya a laehy hae paw mih ciihan hae kha Solomon nynh nangsete see lang a mang hae, tukeiccuze atunin cia a um hae.
22 Solomon nynh Israel hae kha tuh see lang mang khyh hae; minmin tuh rhawkaw hae, a kuihkaw e bawi hae, a rhawbawi hae, a rhawkaw uktu hae, a marangle bawi hae te marang rhawkaw hae lang a mang hae.
23 Solomon rya a lahtu hae kha a dopahtu lupi hae, za pangaw sung pangaw a um hae.
24 Faro ccanung tuh David khua kyate Solomon nynh a sakpyapaw amaw inn langkhe a cceih; tukoute Solomon nynh Millo khua kha a rae.
25 Solomon nynh Bawipaw elang a raepaw silawhang kyakhe maee-ute silawnaw te ccawkunaw silawnaw kha kum kheit ze vae thum leih rae zah Bawipaw malang mynkhuhpaw kha leih a u. Tuhcite inn tuh a lyn.Ref 9.25: Exo 23.17, 34.23; Deu 16.16
26 Solomon Siapharan nynh Edom ram kya, Rili Se kin e Eloth khua pe umpaw Eziongeber khua kyakhe sanphalung phu kheit kha a rae.
27 Hiram nynh a ryalahtu hae, rili kong a nyhthya hae paw sanphalung kya ryalahtu hae kha Solomon a ryalahtu hae ryte a sawkheih hae.
28 Ofir lang cceih hae zah tuin kya-e sui talent za pali ccangkuin kha Solomon Siapharan kalan oun phu hae.