10
Sheba Siapharannung nynh Paebuanaw
(2Sh 9.1-12)
1 Sheba siapharannung nynh Solomon a minthaannaw kha he a thae tuh, (Bawipaw min keiccuze a minthaan), myarya rupaw byakhianaw khate syntawtua lan yn cceih.Ref 10.1-10: Mat 12.42; Luk 11.31
2 A mikung hae patae ryte amynkhuhpaw hae, sui patae te aphutepaw lung hae a phupaw kalauh hae ryte Jerusalem lang yn cceih; Solomon kya he a thua te, a thinlung kya umpaw miakaw kha a hopya.
3 Bya a khiapaw miakaw kha Solomon nynh a khungru; siapharan nynh a ny leipaw, a ccaesahpya kho leipaw pawpaw mah um khyh.
4 Sheba siapharannung nynh Solomon a hawnaw, a sakpaw inn,
5 a ccaboi vawlan e looh, a kuihkaw e bawi hae mih umtuzia, a ryalahtu hae ryalaw dopyanaw, mih boeining, a ryalahtu pise hae te Bawipaw inn kya maee-ute si a lawnaw kha he a muih tuh, a ngaeangthua zah a lung phe mua.
6 Te aning nynh siapharan kha, “Ka ram kyate ka thaepaw na ryalaw konglang te na hawnaw kong tuh akyh,
7 thuasalama kamaw po kae thua zah ka mit te ka muih mawlaezung tuh a ho hae paw kha ka la zyn khyh. Angankuh sanmah yn la hopah khyh hae; na hawnaw te na hoirumnaw tuh ka la thaepaw kha po a lawe.
8 Na zu hae tuh lungtua hae paw nynh thua hae! Nang kha palei ae oihsah hae zah na hawnaw palei a thae hae paw na ryalahtu hae tuh lungtua hae paw nynh thua hae!
9 Na tungvaw a lungrythua zah Israel bawitungkhung kya ae nungpaw Bawipaw na Pachia tuh thehoyte um sah! Bawipaw nynh Israel kha zungzae a sungsah keiccuze nang nynh byading te dingnaw kha na rae nawlan siapharan lang ae khang vae,” a cipya.
10 Te Sheba siapharannung nynh Solomon kha sui talent za kheit ccangkuin, amynkhuhpaw patae te aphutepaw lung hae kha a pya; Sheba siapharannung nynh Solomon Siapharan a pyapaw zeih alung lante amynkhuhpaw kha bua yn thua boi vae khyh.
11 Tuhpiaze, Ofir khua kyate sui oun phupaw Hiram sanphalung hae phu nynh Ofir khua kyate almuk thing patae te aphutepaw lung hae kha oun phu hae.
12 Siapharan nynh tuh-e almuk thing khate Bawipaw inn dounawpaw tung hae, siapharan inn dounawpaw tung hae te hlawsahthya hae paw elang tang-oi te tintang hae kha mah a rae hae; tuhcihawpaw almuk thing tuh thua boi vae khyh zah, atunin cia muih boi um vae khyh.
13 Solomon Siapharan nynh lungthote a pyapaw lasung holeite, Sheba siapharannung nynh ry zah a ngiakupaw miakaw kha mah a pya. Tukoute siapharannung tuh a ryalahtu hae ryte amaw ram lang a ki vae.
14 Solomon kalan kum kheit ze a teepaw sui nynh aripaw tuh talent za taruh sung taruh ccangtaruh acih.
15 E hae hynh kungku hae, uccaw zuatu hae, Arabia siapharan hae balyn te ram uktu bawi hae kyate a teepaw laelan nynh thua.
16 Solomon nynh sui khawriaphua alepaw za ning kha rae zah, tuh-e khawriaphua ccangkheit cci elang deihpaw sui shekel za taruh cci athang.
17 Aning nynh deihpaw sui te khawriaphua za thum kha rae zah, tuh-e ccangkheit cci elang sui mina ccangthum cci athang; tuh-e hae tuh siapharan nynh Lebanon Tuhpi Inn kya a nung hae.
18 Siapharan nynh saepanua te bawitungkhung lepaw kha mah rae zah, sui ccite a thei.
19 Bawitungkhung tuh kaenawpaw thyh taruh a um. Bawitungkhung adung anulang tuh apyng, haungnaw voilang ranglang te kuih khangnawpaw um zah, tuh-e kuih khangnawpaw pe tuin chindeih sa ning a thadyn hae,
20 te kaenawpaw thyh taruh vawlan akin lang voilang ranglang khe chindeih sa kheit ccite sa haw lae ning a thadyn hae. Tuhcihawpaw bawitungkhung tuh teitei ram kya mah rae boi khyh hae.
21 Solomon Siapharan nynh a nianawpaw banang balyn tuh sui thua zah, Lebanon Tuhpi Inn kya-e angphe hae balyn tuh sui ccite raepaw nynh thua hae; ccangkheit sanmah ngun um khyh, Solomon she lya tuh ngun hynh pawlangria khyh hae.
22 Siapharan nynh Hiram kya-e sanphalung phu ryte rili kya a cceih bungthung hae paw Tarshish sanphalung phu phukheit a hoi. Tarshish sanphalung phu tuh kum thum ze vae kheit leih oun thua hae zah, sui, ngun, saepanua, zuapaw hae te buatua hae kha leih oun phu hae.
23 Tuhcite Solomon Siapharan nynh laephi vaw e siapharan hae balyn kha hoirumnaw te hawnaw kya pong a lawe hae.
24 Pachia nynh Solomon thinlung kya a pyapaw hawnaw kha thae khylan, laephi pynpi nynh amaw kalan oun ccia hae.
25 Tuh-e hae miakaw nynh sui te ngun uccaw hae, boeining hae, zunghe hae, amynkhuhpaw hae, marang hae te lann hae kha kum takyh lasung lang a ccyngpya hae.
26 Solomon nynh marangle hae te marang rhawkaw hae kha a pum hae; aning nynh marangle thong kheit za pali te marang rhawkaw thong haw lae ning kha hoi zah, tuh-e hae tuh marangle khua hae kya te Jerusalem khua siapharan kyakhe a nung hae.Ref 10.26: 1Si 4.26
27 Siapharan nynh Jerusalem khua khe ngun kha lung zeih lungsah zah, sidar thing kha Shefelah kya umpaw thaeku ku zeih a lungsah.
28 Solomon nynh a repaw marang hae tuh Izip te Kue kya-e nynh thua; siapharan a kungkutu hae nynh amee pyate Kue kya-e kha leih a re hae.Ref 10.28: Deu 17.16
29 Izip ram kya-e marangle ccangkheit kha ngun shekel za taruh te, marang sa kheit kha za kheit sung pangaw te re kho athua; tuhcite Hit siapharan hae te Siria siapharan hae balyn kalan khe siapharan a kungkutu hae kyate a zua pathy hae.