28
Hananiah nynh Jeremiah A Tuaasah
1 Tuh-e kum, Zedekiah nynh Judah Siapharan lang a tangnaw kum palinaw e sawpaw sah pangawnaw khe, Gibeon khuapaw Azzur ccapaw profeh Hananiah nynh Bawipaw beikinn kya, ranpibawi hae te ccungccaw balyn malang khe kae kha bya yn hopah zah,Ref 28.1: 2Si 24.18-20; 2Sh 36.11-13
2 “Israel Pachia, vaaw Bawipaw nynh hynhte a ho: Babilon siapharan kya-e lua kha ka khya vae.
3 Babilon siapharan Nebukhadnezzar nynh e hmin kyate Babilon lang a cciakhaepaw Bawipaw beikinn e angphe balyn kha e hmin kalan kum ning lungkhu ka kikhae cih.
4 Bawipaw nynh a hopaw tuh: Jehoiakim ccapaw, Judah Siapharan Jekoniah te Judah ram kyate Babilon lang a cciakhae hae paw balyn kha e hmin kalan ka kikhae cih hae; pawccecize Babilon siapharan lua kha ka khyapah cih, a ci,” cite a cipya hae.
5 Tetuh beikinn malang a thadyn hae paw ranpibawi hae te ccungccaw balyn malang khe profeh Jeremiah nynh profeh Hananiah kha hopah zah,
6 “Amen! Bawipaw nynh tuhcite cyih vae sah; profehbya na hopaw tuh Bawipaw nynh ccingsah sah lah, Bawipaw beikinn e angphe hae te a cciakhae hae paw balyn kha Babilon kyate e hmin kalan kikhae vae hae sah.
7 Thuasalama nang te ccungccaw balyn kya atu ka hopaw e bya hynh ngaetua.
8 Nang te kae ah um maw, langmawlya e profeh hae nynh ram patae te myarya lepaw peenaw hae tungvaw rhawtuknaw, ccakanccinaw te shethya yn thua lanpaw kha a la ho hae.
9 Daenaw a um cih, cite a hopaw profeh kha tuh, a bya he accing te rou khaw, Bawipaw nynh a saw ccaccingpaw profeh cipaw ny athua cih,” a ci.
10 Tetuh profeh Hananiah nynh profeh Jeremiah nging kya-e lua kha lah zah phe a khya.
11 Te Hananiah nynh ccungccaw balyn malang khe ho zah, “Bawipaw nynh hynhte a ho: E hawhynhte minphuin balyn nging kya sawkuhpaw Babilon siapharan Nebukhadnezzar kya-e lua kha kum ning lungkhu ka khya cih, a ci,” cite a hopya hae. Tetuh profeh Jeremiah tuh po a cceih vae.
12 Profeh Hananiah nynh profeh Jeremiah nging kya-e lua kha a khya koute sosoh aro te, Jeremiah kya yn thuapaw Bawipaw bya tuh:
13 Cceih lah, Hananiah kha hynhte hopya tua, Bawipaw nynh hynhte a ho: Thing te raepaw lua, na khya vae paw ccelang sivaw te raepaw lua kha ka rae cih!
14 Pawccecize Israel Pachia, vaaw Bawipaw nynh hynhte a ho: E minphuin balyn nynh Babilon siapharan Nebukhadnezzar kha rya a lawpya nawlan hae, mih nging kya sivaw lua kha ka saw hae zah, solei rya a lawpah vae cih hae; loramsaw hae kha heize amaw ka pya vae, a ci.
15 Te profeh Jeremiah nynh profeh Hananiah kha, “Hananiah, ngaetua, Bawipaw nynh nang kha ae saw lei pite, e ccungccaw hae hynh hynbya na zynsah hae.
16 Tukeiccuze Bawipaw nynh hynhte a ho: Nang hynh laephi vawlan te kae vua cih. Bawipaw kha rawsete dounaw bya na ho keiccuze atu kum lungkhu na chih cih,” a cipya.
17 Tuh-e kum, sawpaw sah sarinaw khe profeh Hananiah tuh a chih.