27
Luasawpaw Muihsahnaw
1 Josiah ccapaw, Judah Siapharan Zedekiahnote27.1 ccang lante ria lanze Jehoiakim nynh a uknaw athotakaw lyakhe Bawipaw kyate Jeremiah kalan e bya hynh yn thua.Ref 27.1: 2Si 24.18-20; 2Sh 36.11-13
2 Bawipaw nynh kae yn hopyapaw tuh: Luasawkunawpaw saphuarui te lua kha raekuh lah, na nging kya luasawkuh.
3 Te Judah Siapharan Zedekiah kalan Jerusalem lang oun cceih hae paw locceihtu hae kyate Edom siapharan, Moab siapharan, Ammon siapharan, Tair siapharan te Sidon siapharan kalan khe byataw hae.
4 Mih bawi hae hanlan e bya hynh pya hae: Israel Pachia, vaaw Bawipaw nynh hynhte a ho: Nae bawi hae kha hynhte na hopah cih oh:
5 Alesaepaw ka huhan te ka dyngpaw ka kuih khate laephi te laephi vawlan umpaw ccungccaw te sarangpaw hae kha ka rae hae zah, ka lungrythuapaw ccungccaw miakaw kha ka pya.
6 Atu hynh-e ram balyn hynh ka ryalahtu, Babilon Siapharan Nebukhadnezzar kha ka pya vae; ramkaw e loramsaw hae kha heize amaw ryalawpya khylan ka pya vae.
7 Minphuin balyn nynh amaw te a ccapaw te a mintawpaw kha, a ram ccyh athang mawlaezung rya a lawpah cih hae; te minphuin patae te alesaepaw siapharan hae nynh aning kha mih seepaw lang a mangru cih hae.
8 Minphuin phuinkhakheit khyhze peenaw ccangkhakheit nynh e Babilon siapharan Nebukhadnezzar kha ryalawpya leite, Babilon siapharan kya-e luasawku lan a nging a tuaku khyh lanze, tuh-e ram tuh Nebukhadnezzar kuih te khaleih ka ro mawlaezung, thaloi, ccakanccinaw te shethya khate de ka tah cih, cite Bawipaw nynh a ci.
9 Tukeiccuze, “Babilon siapharan kha rya na lawpah lan khyh,” cite a ho hae paw nae profeh hae, apawepaw hae, maansahthya hae paw, beidinhothya hae paw te naawthya hae paw bya kha na ngae lan khyh oh.
10 Pawccecize minmin nynh nanning kha nae ram kyate asawnaw lang nue na thua nawlan oh, hynpaw profehbya kha ae hopya oh; nanning kha kae dee cih oh zah na chih cih oh.
11 Thuasalama Babilon siapharan kya-e luasawku khylan a nging tuakuh zah rya a lawpahpaw miakaw tuh, amaw ram kya loophokute a um ccaw ka cciataw cih, cite Bawipaw nynh a ci.
12 Judah Siapharan Zedekiah kalan mah tuhmawte ka hopya: Babilon siapharan kya-e lua kha sawku khylan na nging tuakuh lah, amaw te a ccungccaw hae kha ryalawpyate hiintua.
13 Babilon siapharan kha rya a lawpah cih leipaw minphuin miakaw te asekuh lante Bawipaw nynh a ho vae hawte, nang te na ccungccaw hae tuh thaloi, ccakanccinaw te shethya khate pawccemou na chih cih oh?
14 Babilon siapharan kha ryalawpya lei lante ae hopah oh paw profeh hae bya kha ngae nan oh, pawccecize minmin nynh hynhute profehbya kha ae hopya oh.
15 Bawipaw nynh a hopaw tuh: Minmin kha ka saw lei hae pite, ka min te ahme leipaw profehbya kha a ho hae, tukeiccuze naemaw te nanning kalan profehbya ae hopah oh paw profeh hae kha kae dee cih oh zah, na chih cih oh, a ci.
16 Tetuh ranpibawi hae te ccungccaw balyn kya ka hopya hae paw Bawipaw bya tuh: “Bawipaw beikinn e angphe hae tuh Babilon ram kyate aro maw lawthui athua cih,” cite ae hopah oh paw nae profeh hae bya kha ngae nan oh, pawccecize minmin nynh ahme leipaw profehbya kha ae hopya oh.
17 Mih bya kha ngae nan oh; Babilon siapharan kha ryalawpah oh lah, na hiin cih oh. E khuapi hynh pawccemou arohpaw lang a tang cih?
18 Minmin tuh profeh thua ccaccing hae zah, Bawipaw bya tuh mih kya a um lanze, Bawipaw beikinn kya, Judah siapharan inn kya te Jerusalem kya a um ungpaw angphe hae tuh Babilon lang cciakhae athua khyh nawlan, minmin nynh vaaw Bawipaw kha soihbiate ngia hae sah.
19-21 Pawccecize Babilon siapharan Nebukhadnezzar nynh Jehoiakim ccapaw, Judah Siapharan Jekoniah ryte Judah te Jerusalem e asung-epaw piccan hae kha Jerusalem kyate Babilon lang he a cciakhae hae tuh, Nebukhadnezzar nynh cciakhae leite, e khuapi kya a laehypaw, Bawipaw beikinn kya, Judah siapharan inn kya te Jerusalem kya a laehypaw tung hae, tui tungnawpaw hae te a thadynnawpaw accu hae te asekuh lante Bawipaw , Israel Pachia nynh hynhte a ho:
22 Khah-e angphe hae kha Babilon lang phu athua cih zah, kamaw nynh kikhae khylan ka peki mawlaezung tuin kya a um cih. Te ka kikhae cih zah, e hmin kya ka nungthui cih, cite Bawipaw nynh a ci.