24
Ahoypaw te Athahpaw Thaeku
1 Bawipaw nynh beikinn malang a nung hae paw thaeku sua ning kha yn muihsah. E hynh Babilon Siapharan Nebukhadnezzar nynh Jerusalem kyate Babilon lang Jehoiakim ccapaw Judah Siapharan Jekoniah ryte Judah ram e bawi hae, kuihhae hoy hae paw, te sivaw a suh hae paw kha a cciakhae kou hae te nynh thua.Ref 24.1: 2Si 24.12-16; 2Sh 36.10
2 Sua suakheit kya tuh avoi typaw thaeku hawte myarya hoypaw thaeku a um, thuasalama ccangpaw sua suakheit kya tuh ae kho lei lan ciate myarya nyaapaw thaeku a um.
3 Te Bawipaw nynh kae kha, “Jeremiah, pawmou na muih?” cite yn khia. Kae nynh, “Thaeku hae kha ka muih, ahoypaw thaeku hae tuh myarya hoy zah, anyaapaw thaeku hae tuh ae kho lei lan ciate myarya anyaa,” cite ka hopya.
4 Tetuh Bawipaw bya tuh ka kya yn thua zah:
5 Bawipaw , Israel Pachia nynh hynhte a ho: E hmin kyate Khaldi ram lang ka saw hae paw, Judah ram kyate ramccang lang a kyng hae paw Judah hae kha, e ahoypaw thaeku lang ka ria cih hae.
6 Mih tungvaw hoynaw rae khylan riri ka do cih hae zah, e ram lang bua ka kikhae cih hae. Minmin kha ka sak cih hae zah ka phou lan khyh hae, ka lin cih hae zah ka khaee lan khyh hae.
7 Bawipaw ka thuanaw kha nynaw thinlung ka pya cih hae; minmin tuh ka ccungccaw athua cih hae zah, kae tuh mih Pachia ka thua cih, pawccecize mih thinlung balyn te ka kalan oun kithui cih hae.
8 Bawipaw nynh hynhte a ho: Judah Siapharan Zedekiah, a kuihkaw e bawi hae, e ram kya a laehy hae paw Jerusalem kya ahiinhy hae paw te Izip ram kya a um hae paw kha ae kho lei lan ciate myarya anyaapaw thaeku hawte, ka rae cih hae.
9 Minmin tuh laephi vaw e ram hae hanlan ri lan a umpaw, ahoy leipaw uccaw lang ka rae cih hae—ka dee cihnaw hae hmin takyh kyakhe a thethahpaw, tousenawpaw, a sarya hae paw te thya a law hae paw lang ka rae cih hae.
10 Te minmin te mih minpaaw hae kalan ka pya hae paw ram kyate khah-e hae kha khaleih ro athua mawlaezung hae, thaloi, ccakan te shethya kha ka sawnua cih hae.