23
Ramccang lang Deeku koute Kithuinaw
1 Bawipaw nynh a hopaw tuh: Ka ramnonaw kya-e ka tuu hae kha phiariphiarae nung hae zah a roh hae paw tuurin hae hanlan ngaethya lan kou um!
2 Tukeiccuze ka ccungccaw hae kha a rintu hae tuurin hae te asekuh lante Bawipaw , Israel Pachia nynh hynhte a ho: Nanning nynh ka tuuphu hae kha phiariphiarae na nung oh zah, ccanglang ccaring na dee oh, minmin kha hoyte na do-oih khyh oh. Tukeiccuze ahoy leipaw nae cyisahnaw hanlan de kae tah cih oh, cite Bawipaw nynh a ci.
3 Te minmin ka deenaw hae ram balyn kyate ka tuuphu kya-e a laehy hae paw kha ka suelua cih hae zah, mih tuukhia langkhe ka kikhae cih hae, te a pungzae cih hae zah a lungthung cih hae.
4 Minmin a rin cih hae paw tuurin hae kha ka nungpah cih hae zah, rinaw, siikunaw te zonaw papin tung vae lan khyh hae, cite Bawipaw nynh a ci.
Adingpaw David Ciihan
5 Bawipaw nynh a hopaw tuh: David hanlan adingpaw Ciihan kha he ka langsakuh te, aning nynh hawnaw te a ukpaw siapharan hawte a uk cih zah, ram lungkhu kya byading te dingnaw kha a rae ccyh tuh solei yn thua cih.Ref 23.5-6: Jer 33.14-16
6 Aning ccyh kyakhe Judah tuh khum athua cih zah, Israel tuh khyndadyh lan a um cih. A min kha, “Bawipaw tuh aening dingnaw nynh thua,” cite ko athua cih.
7 Tukeiccuze Bawipaw nynh a hopaw tuh: “Israel hae kha Izip ram kyate a poukhae hae paw Bawipaw tuh a hiin,” cite ho lei vae te,
8 “Palung lang e ram kyate thuasah, aning nynh minmin a deenaw hae ram balyn kyate thuasah Israel phin hae kha poukhae hae zah a cciakhae hae paw Bawipaw tuh a hiin,” cite a ho ccyh hae tuh solei yn thua cih. Tetuh mih ram kyakhe a um cih hae.
Lingthya Profeh hae Seisahnaw
9 Profeh hae te asekuh lante:
Ka lungkhu kya ka thinlung phe koi zah,
ka ru hae balyn tuh a thyngkuh hae;
Bawipaw keiccu thuasah,
athyaapaw a bya keiccu thuasah
kae tuh aruipaw hawte ka thua zah,
misutui nynh a taepaw hawte
nynh ka thua.
10 Pawccecize ram tuh nopi pise
ohhuakunaw te phe abeih;
thyalawnaw keiccuze ram tuh
rawkhuite um zah,
ramkaw e ramnonaw hae tuh karae arou.
Mih laanpi tuh hoyleinaw thua zah,
mih thungnaw tuh ahme leipaw nynh thua.
11 Profeh hae te ranpibawi hae tuh
parouh mawte Pachia kha
pawlangria khyh hae;
ka inn kya heize
mih hoyleinaw kha ka muih vae,
12 Tukeiccuze mih laanpi tuh
mohnaw kya-e nawpalaepaw
laanpi hawte nynh thua,
tuh-e laanpi langkhe
dee athua cih hae zah a khuliakuh cih hae;
pawccecize minmin detah kum khe
mih tungvaw shethya ka thuasah cih,
13 Samaria ram e profeh hae tungvaw kya
anungsikuhpaw uccaw kha ka muih:
Baal min liate profehbya ho hae zah,
ka ccungccaw Israel hae kha
a cciakhaesei hae.
14 Jerusalem profeh hae tungvaw kya
siiku lan a um huapaw
uccaw kha ka muih vae:Ref 23.14: Gen 18.20; Eze 16.49
nopi pise ohhuakunaw rae hae zah
a hyn a hu hae;
hoyleinaw a rae hae paw kha
lu kheit nynh sanmah hoyleinaw kyate
a maeleihku khyh nawlan hae,
thawzung a pya hae;
mih balyn mawte kae ka hanlan
Sodom khua hawte thua hae zah,
Jerusalem khuaccaaw hae tuh
Gomorrah khua hawte nynh athua hae.
15 Tukeiccuze tuh-e profeh hae te
asekuh lante vaaw Bawipaw nynh hynhte a ho:
“Minmin kha eccangkary
ka aesah cih hae zah,
chi sii thungkuhpaw tui kha
ka niasah cih hae;
pawccecize Pachia pawlangria leinaw tuh
Jerusalem profeh hae kyate
ram pynpi kya a pazaekuh vae,” a ci.
16 Vaaw Bawipaw nynh hynhte a ho: Nanning kya profehbya a ho hae paw profeh hae bya kha ngae nan oh; minmin nynh nanning kha ae ling oh. Bawipaw khalang kyate apou leipaw, mih tuanaw kya-e vizin kha ae hopya oh.
17 Bawipaw bya pawlangria lei hae paw kalan khe, “Nae kya hoynaw a um cih,” a cipya hae; mih lungkhung thyhte a um hae paw kyakhe, “Nae tungvaw shethya thua lan khyh,” a cipya hae.
18 Minmin lakuze Bawipaw bya kha
muih khylan te thae khylan,
a khuakhannaw kya hummou a umbua?
Bawipaw bya phy khylan
hummou a bya kha a peki?
19 Bawipaw khise khuh dotua!
Thinrianaw tuh apou,
athawsaepaw khiccung thua zah,
ccungccaw hoylei hae paw
mih lu vawlan khe thawte a khia cih.
20 Bawipaw nynh a tuapaw
a paccynnaw kha
ccingsah te a thangsah mawlaezung
a thinrianaw tuh dae lan khyh.
Nyalang ccyh kya nanning nynh
ccaerarih lan nae thaethya cih oh.
21 Kae nynh ka saw lei hae pite
profeh hae tuh a ccue hae;
kae nynh ka hopah lei hae pite
profehbya kha a ho hae.
22 Thuasalama ka khuakhannaw kya
a thadyn hae lanze,
ka ccungccaw hae kalan
ka bya kha a ho cih hae zah,
ahoy leipaw mih laanpi kyate thuasah,
ahoy leipaw mih cyisahnaw kyate thuasah
23 Kae tuh anaenaw kyalya a umpaw Pachia tou ka thua? Asawnaw kya mah a umpaw Pachia ka thua khyh tou?
24 Ka muih kho lei lan ciate muih leinaw kya a rekuh khopaw hummou a um? cite Bawipaw nynh a ci. Vaaw te lae kya pong ka um khyh tou? cite Bawipaw nynh a ci.
25 “Maan ka sah vae, maan ka sah vae!” cite ka min te hynbya a ho hae paw profeh hae bya kha ka thae vae.
26 Hynbya a ho hae paw te mih thinlung kya-e lingnaw bya a ho hae paw e profeh hae thinlung hynh hohseciamou paleihku leite a um cih?
27 Mih minpaaw hae nynh Baal keiccuze ka min kha a ning hae hawte, lu kheit te lu kheit a hoku hae paw mih maan khate ka ccungccaw hae nynh ka min kha ning hae sah cite a paccyn hae.
28 Maan a sahpaw profeh nynh a maan kha ho sah, thuasalama ka bya a hoipaw nynh ka bya kha lungzite ho sah. Ccatanphue tuh chanvuih te pawmou asekuh? cite Bawipaw nynh a ci.
29 Ka bya tuh maee te lokuh khyh tou? Lung kha zoihtatyh lan a koisahpaw khynlyng te lokuh khyh tou?
30 Tukeiccuze lu kheit te lu kheit ka bya a rupakuh hae paw profeh hae kha ka rawse hae, cite Bawipaw nynh a ci.
31 Mimaw munglae nynh a hopaw bya kha, “Bawipaw nynh a ho,” cite a hothya hae paw profeh hae kha ka rawse hae, cite Bawipaw nynh a ci.
32 Hynhupaw maan kha ho hae zah, hynbya te accakaepaw mih bya khate ka ccungccaw hae kha a cciakhaesei hae paw profeh hae kha ka rawse hae, cite Bawipaw nynh a ci; minmin kha ka saw khyh hae, ryalaw mah ka naw khyh hae; tukeiccuze minmin tuh e ccungccaw hae hanlan papin thane khyh hae, cite Bawipaw nynh a ci.
33 E ccungccaw hae nynh thuasah, profeh nynh thuasah, ranpibawi nynh thuasah, “Bawipaw kya-e phupaw ripaw tuh pawmou athua?” cite ae khia hae ze, minmin kha, “Nanning hynh phupaw ripaw na thua oh zah, ccaring kae vua cih oh, cite Bawipaw nynh a ci,” cipaw kha na hopah cih hae.
34 Profeh nynh thuasah, ranpibawi nynh thuasah, e ccungccaw hae laku e lukhakheit nynh thuasah, “Bawipaw kya-e phupaw ripaw nynh thua,” cite a ho lanze, amaw te a innbyn kha de ka tah cih hae.
35 Naemaw lu kheit te lu kheit laku kya, “Bawipaw nynh pawtemou bya a khungru?” tuhkhyhze, “Bawipaw nynh pawtemou a ho?” cite bya na khiakuh cih oh.
36 “Bawipaw kya-e phupaw ripaw,” cite na ho vae lan khyh oh, pawccecize tuhte bya a hopaw tuh amaw hanlan phupaw ripaw athua ccaccing cih, tuhte na ho oh ze, a hiinpaw Pachia, vaaw Bawipaw , ah Pachia bya kha na ro vae oh.
37 “Bawipaw nynh pawtemou ae khungru?” tuhkhyhze “Bawipaw nynh pawtemou a ho?” cite profeh kha na khia cih.
38 Thuasalama, “Bawipaw kya-e phupaw ripaw,” cite na ho oh zetuh, Bawipaw nynh hynhte a ho: “Bawipaw kya-e phupaw ripaw,” cite na ho lan khyh oh, mang kae cipah oh pite, “Bawipaw kya-e phupaw ripaw,” cite na ho oh keiccuze,
39 kae hang ccaccing cih oh zah, naemaw kha thuasah, nanning te nae minpaaw hae kae pya oh paw khuapi kha thuasah ka kyate ccaring kae vua cih oh.
40 Ning kho ung leipaw zungzae thethyanaw te zungzae maethyanaw kha nae tungvaw ka ccawsah cih.