33
Rhaw kyate Luenaw hanlan Profehbya
1 Ming hae nynh nang kha
ae roh lei hae pite, a rohtupaw nang,
ming hae nynh nang kha ae luade lei hae pite,
a luadetupaw nang,
na hanlan ngaethya lan kou um!
Nang nynh ming hae tungvaw ronaw te
luadenaw kha he na umtaw te,
namaw tungvaw ronaw te
luadenaw nynh ae thuanua cih.
2 Pou Bawipaw , kaening hynh
thaw beih oun ccitua;
kaening nynh nang kha kae ngaehoiku.
Awkhua takyh kaening hynh
thawzung oun pyatua,
kae vawsaw ccyh lya oun khumtua.
3 Myarya ccaepaw roi keiccuze
ccungccaw hae tuh a ccue hae;
na huhan keiccuze minphuin hae tuh
phiariphiarae a um hae.
4 Ripaw hae a sueluaku hae hawte,
luadepaw uccaw hae tuh suelua athua cih;
tungkhipaw hae nynh a thohku hae hawte,
minmin nynh tuh-e uccaw hae
vawlan khe a thohkuh cih hae.
5 Bawipaw tuh hangthung thua zah,
ahangnaw kya a um; Zion kha
byading te dingnaw khate phe a biasah;
6 Bawipaw tuh na ccyh atynpaw,
khumnaw phe beihpaw,
hawnaw te nynaw hanlan
zungzae tynpaw athua cih;
Bawipaw rawrinaw tuh
7 Ngaetua! Mih rawthung hae paw nynh
laanpi hae kyakhe a sia hae;
daenaw hanlan locceihtu hae nynh
thawmawte a raw hae.
8 Laanluepi kya ccungccaw phe adae,
laanpi kya a cceih bungthungpaw um vae khyh.
Nawccawthungkupaw byakinnaw kha roh zah,
byakinkunaw kha a vua,
humhung kha mah pawlangria khyh.
9 Ram tuh a ngaethah zah a thawzya;
Lebanon loram tuh maethyate karae rou;
Sharon accya tuh laesia ram hawte thua zah,
Bashan ram te Karmel mua kya-e
thingnaw hae tuh a khuakuh hae.
10 Bawipaw nynh a hopaw tuh:
“Atu ka thokuh vae cih,
atu ka thungnaw kha ka langsakuh vae cih.
11 Vaekang kha ccaaw lang poite
athupaw kha ccaaw lang na saah oh;
nae tuanaw tuh naemaw
ae u cih oh paw maee nynh thua.
12 Ccungccaw hae tuh thuunglung lang
rae khylan maee te a u hae paw
lung hawte thuasah,
maee te soi khylan a bae hae paw
hinpaw hawte thuasah athua cih hae,” a ci.
13 Asawnaw kya um hae paw,
ka cyipaw hynh nytua oh;
anaenaw kya um hae paw,
ka thungnaw hynh nytua oh.
14 Zion khua e misei hae tuh a rih hae;
Pachia pawlangria lei hae paw tuh
thyngkuh hae zah,
“Aening lakuze aruapaw maee lungkhu kya
hummou a hiin kho cih?
Aening lakuze zungzae aruapaw
maeephu kya hummou a hiin kho cih?” a ci hae.
15 Dingrarih lan hiin zah
hmerarih lan bya a hopaw,
tuaasahkunaw kyate
muepaw uccaw kha hua zah,
pyaruh kha a lawkuh leipaw,
ccungccaw chia lanpaw bya
a thae ry leipaw te hoyleinaw kha
a do leipaw tuh ahangnaw kya
a um cih.
16 Aning tuh rhawlungrua te
koihlupaw khua kyakhe a khyn cih;
looh kha tyty pya athua cih zah,
tui mah apaekuh lei lan pya athua cih.
Alesaepaw Siapharan Ram
17 Siapharan a sung-enaw kha
na mit te na muih cih zah,
myarya akopaw ram kha mah
na muih cih.
18 Ri lan umpaw konglang kha
lungkaw na tua cih zah,
“Ccazing a lahtupaw kha teimou a um vae?
Ngunto a khoitupaw kha
teimou a um vae?
Rhawviainn a riatupaw
dophitu hae kha teimou
a um vae hae?” na ci cih.
19 Alysakuhpaw ccungccaw hae,
na thaethya kho leipaw
byakhupaw a ho lei hae paw,
na nythya kho leipaw bya
a ho hae paw mih lae-ah hae paw kha
na muih vae lan khyh hae.
20 Beiknaw lante poi ah la tuanaw oh
Zion khuapi khuh dotua oh!
A tung hae kha phoh kho um khyh zah
a rui hae kha pae kho a um leipaw,
nue kho a um leipaw bu athuapaw,
daetedae lan umnawpaw
Jerusalem khua kha na mit te na muih cih.
21 Tuin khua kyakhe alesaepaw
Bawipaw tuh aening hanlan
akopaw vawpi te vaw taraw hae athua cih,
tuin kyakhe ah rhaw hae kohlung te
athungpaw ccingbaw cceih lan khyh.
22 Pawccecize Bawipaw tuh
aening byapiatu nynh thua,
Bawipaw tuh aening oun uktu nynh thua,
Bawipaw tuh aening siapharan thua zah,
aning nynh aening kha oun khum cih.
23 Kohlung kya zopaw
na boei rui hae tuh a phoukuh hae;
tuh-e arui nynh kohlung boei atung kha
tynkaring lan kyng kho khyh,
kohlung kya azokuhpaw boei kha mah
Tetuh myarya lungpaw rhaw hae uccaw kha
luadete neeku athua cih;
a ccukhoupaw nynh heize
luadepaw uccaw kha a luakuh bua kho cih.
24 Khua kya um hae paw tuh,
“Kae tuh ka ccih,” cite
a hopaw um lan khyh;
tuin kya a um hae paw
mih hoyleinaw kha
ngaethya athua cih.