ISAIAH
Isaiah
Isaiah ccauh hynh BC 700 loukaw kya Jerusalem khua a la umpaw profeh lepaw lu kheit a min Isaiah cikuhpaw min kha lee hae zah a min a phu hae paw nynh thua. E ccauh hynh phuin thum lang phia kho athua:
(1) Byaria 1-39 lungkhu e bya hynh alia peenaw athuapaw Judah kha a pe umpaw, athungpaw Assiria nynh dou lan a paccynku ccyh lya-e bya nynh thua. Judah hiinnaw kya ri lan a um ccaccingpaw tuh Assiria thawzung thua leite, mih minphuin a seinaw te Pachia kaw a einaw hae te Pachia a doliaku leinaw hae kha nynh thua cipaw Isaiah nynh a muih. Isaiah nynh ccungccaw hae te mih cciakhaetu hae kha adingpaw te ahmepaw hiinnaw kalan ccaerarihpaw bya te ko hae zah a ryalawnaw te mah a muihsah hae. Pachia bya ngae leinaw nynh ronaw a thuakhae cite raeringnaw a pya hae. Te Isaiah nynh laephi pynpi daenaw ccyh a um lanpaw te David ciihan kyate siapharan hoypaw a pui lanpaw kong kha mah a ho.
(2) Byaria 40-55: E ccyh hynh Judah hae patae tuh Babilon ram kya see lang tang hae zah tuaasahnaw teing hae zah ngaehoinaw hoi leite a um lya hae nynh thua. Pachia nynh a ccungccaw hae kha hiinnaw thawpaw te hiinsah khylan luenaw a pya cih hae zah Jerusalem lang a kikhae cih hae, cipaw kha profeh nynh a ho. E byaria hae kyaze syntawku lanpaw abyalu tuh: Pachia tuh ccungccaw phungpaw Bawipaw thua zah, a ccungccaw Israel hae hanlan a paccynpaw tuh Israel hae liate hythua a ccou cih hae paw minphuin hae balyn hanlan minmin nynh rya a law lan hae paw kha nynh thua. “Bawipaw Ryalahtu” cikuhpaw bya hynh Byakin Ryn kyaze ny huapaw bya nynh athuabua.
(3) Byaria 56-66 lungkhu e bya hynh Jerusalem lang a ki vae hae paw elang a zeipaw thua zah, Pachia nynh a ccungccaw hae elang bya a kinkupaw kha a ccingsah cih cipaw phe ria lan a nyh ry hae paw hanlan a zeipaw nynh thua. Dingnaw kong, Sabbath sungnaw kong, silawnaw kong te sawsangnaw kong ccangpyanaw kha ah muih oh. Syntawku lanpaw bya tuh 61.1-2 kha thua zah, Jesu nynh a rya a thotakaw lya a mangpaw bya nynh thua.
1
1 Amoz ccapaw Isaiah nynh Judah te Jerusalem kong te asekuhte Judah siapharan hae Uzziah, Jotham, Ahaz te Hezekiah she lya a muihpaw vizin tuh.Ref 1.1: 2Si 15.1-7, 15.32—16.20, 18.1—20.21; 2Sh 26.1—32.33
Judah A Hoyleinaw
2 Pou vaawlui, thaetua,
pou laephi, ngaetua;
pawccecize Bawipaw nynh
a hopaw tuh:
ka kua hae paw te ka do-oih hae paw
ccaaw hae nynh
kae kha yn dou vae hae.
3 Vaetua nynh a hoitupaw kha nyh zah,
lann nynh mah a bawipaw nynh
looh a pyanawpaw kua kha a ny;
thuasalama Israel hae nynh
kae kha yn nyh khyh hae,
ka ccungccaw hae nynh
4 A seipaw minphuin,
hoyleinaw te phe abeihpaw
ccungccaw hae,
hoyleinaw a raepaw ciihan,
ozia athahpaw ccaaw hae,
Bawipaw kha na vua vae oh,
Israel Pachia Athyaapaw kha
na theihrya oh zah,
nulang na sangsah vae oh.
5 Pawccemou detahkunaw kha
na ccungku ung oh?
Pawccemou palei na dou ung oh?
Nae lu balyn tuh vaemaw te
phe beih zah,
nae thinlung balyn tuh a thawzya.
6 Nae ccukaw te nae lu kyacia
dannaw um khyh, aduinpaw te
vaemaw te anae aluapaw
vaemaw kha nynh a um;
mih vaemaw hae kha singpya, heepya,
chitui te thuhpya thua khyh hae.
7 Nae ram tuh ccungccaw um vae khyh,
nae khuapi hae tuh maee nynh a u;
na muihnaw oh ccaccei khe
minphuin ccangpaw hae nynh
nae ram kha a ro hae;
ramccang hae nynh
phe a ro vae hae paw hawte,
ccungccaw um vae khyh.
8 Misu khokhu kya umpaw
buhang hawte thuasah,
zinae loo kya umpaw
bu hawte thuasah,
rhaw hae nynh a koihlu hae paw
khuapi hawte thuasah
Zion ccanung kyalya nynh a laehy vae.
9 Vaaw Bawipaw nynh aening elang
ciihan beihtaraw san
oun la haangpya khyh ze,
aening tuh Sodom khua hawte
ah thua cih oh zah,
Gomorrah khua te ah lokuh vae cih oh.Ref 1.9: Gen 19.24; Rom 9.29
10 Sodom khua a uktu hae nanning,
Bawipaw bya kha thae oh!
Gomorrah khua e ccungccaw hae nanning,
ah Pachia kya-e ccangpyanaw kha ngae oh!
11 Bawipaw nynh, “Ka kalan
na rae oh paw silawnaw patae hynh
a ry cih cite tou na tua oh?
Maee-ute silawnaw
na raenaw oh paw tuu hae te
looh na dang oh paw
sahiin hae tho khate phe ka byn vae;
vaetua chii, tuutaw chii te miaa chii kha
ka ry khyh.Ref 1.11-14: Amo 5.21-22
12 Nanning nynh ka malang
langku khylan he nae ccia vae oh ze,
hum nynh mou e hynh ae ngia oh?
ka voidu kha syde nan vae oh;
13 nae ccyngpah oh zah
nae pya oh paw hynh
accakaepaw nynh thua;
nae pya oh paw amynkhuhpaw hynh
ka hanlan anungsikuh.
Sawpaw sah thawpaw poi,
sabbath te zapi pumkunaw—
hoyleinaw te apykuhpaw
beiknaw pumkunaw hae kha
ka ngaesang kho khyh.
14 Nae sawpaw sah thawpaw poi hae te
nae poi hae kha ka hua;
khah-e hae tuh ka hanlan
phupaw ripaw lang tang zah
ka phunaw phe ka bang.
15 Nae kuih he na dyng vae oh ze,
ka mit kha ccanglang kae hawitaw cih oh;
patae saw na sang oh zemah
kae ngaepah lan khyh oh;
nae kuih tuh chiise te phe abeih.
16 Naemaw te naemaw singkuh oh;
naemaw te naemaw thyaasakuh oh;
na cyi oh paw hoyleinaw kha
ka mit nynh a muihnaw kyate vua oh;
hoyleinaw kha rae nan vae oh,
17 hoynaw rae kha ccangkuh oh lah,
dingnaw kha ccung oh,
tuaasahkunaw a teing hae paw kha khum oh,
ngawraw hae kha thungkhaw oh,
nomae hae kha pankhaw oh,” a ci.
18 Bawipaw nynh hynhte a ho:
atu rang oh lah,
hoyte tua kalang oh sih:
Nae seinaw tuh sekakin lan se salamah,
vuiraw hawte araw cih;
sephaphuh lan se salamah
tuuming hawte athua cih.
19 Nanning nynh lungthote
kaw na ngae oh zetuh
ram kyate apoupaw
uccaw hoypaw kha na ae cih oh;
20 thuasalama nanning nynh
kaw-eite nae dou oh zetuh,
thaloi rhaw te na chih cih oh;
pawccecize Bawipaw nynh a ho vae.
Aseipaw Khuapi
21 A lungzipaw khuapi nynh pawtemou
ohhuanung lang phe a tang!
Aning tuh byading te phe beih zah
a lungkhu kya dingnaw a um,
thuasalama atu vae tuh
ccungccaw theihtu hae nynh a um vae hae!
22 Na ngunphua hae tuh
athupaw lang tang vae zah
na misutui tuh tui te phe pykuh vae.
23 Na bawi hae tuh rhawthotu hae te
miruh hae ruiban nynh thua hae.
Mih balyn mawte pyaruh kha
ry hae zah lasung kha a ae hae.
Ngawraw hae kha thungkhaw khyh hae zah,
nomae hae byathan kha
24 Tukeiccuze alesaepaw Bawipaw,
vaaw Bawipaw , Athungpaw Israel
Pachia nynh a hopaw tuh:
ka rhaw hae tungvaw kya
ka thinrianaw kha ka ccawsah cih zah,
kamaw ccaccei nynh ka rhaw hae kha
ka liaru cih hae!
25 Ka kuih kae hangnua vae cih;
sivaw kha tuisahte a thyaasah hae hawte
kae thyaasah cih zah,
na kya-e sivawthuhpaw balyn kha ka vua cih.
26 Langmawlya kae nungpya hawte,
byapiatu hae te tuanaw pyatu hae kha
kae nungpah thui cih.
Tetuh nang kha dingnaw khuapi,
a lungzipaw khuapi cite ae ko cih hae.
27 Zion khuapi kha byading liate
shawkhaw athua cih zah,
a ngaesikuh hae paw khuapi lungkhu e
ccungccaw hae kha dingnaw liate
shawkhaw athua cih hae.
28 Thuasalama misei hae te
amaw a doutu hae kha tuh
pynkheihlan ro athua cih hae,
Bawipaw a vua hae paw kha
maemih athua cih hae.
29 Nae lungry a la thuakhaekupaw
athyaapaw phaesi ku hae keiccuze
nae maethah cih;
na la poku oh paw khokhu hae keiccuze
nae maesue aroh cih.
30 Pawccecize nanning tuh
anaw anaanpaw phaesi thing te
na lokuh cih oh,
tui um leipaw khokhu hawte
na thua cih oh.
31 Athawsaepaw tuh maeetuanawpaw
thingthyh hawte athua cih zah,
a ryalaw tuh maeesoi hawte athua cih;
mimaw te mih ryalaw tuh
a ukheih cih hae, tuh-e maee tuh
a thetu lu kheit san um lan khyh.