2
Mihoy leipaw
1 Atu uteno hae, ah Bawipaw Jesu Khri yn thuanaw konglang te thuasah, amaw kya pynkheihlan ah sueluakunaw oh konglang te thuasah,Ref 2.1: 1Th 4.15-17
2 Bawipaw Nin tuh phe a thua vae paw hawte muisaw te thuasah, bya te thuasah, kaening kyate yn thuapaw ccaky o-ang lante thuasah oun ho hae ze, bungzounaw te siikunaw palou na hoi khyh nawlan oh kae ngia oh.
3 Hum nynh zemah pawpawte sanmah ae la ling nan oh sah; pawccecize tuh-e Nin a thua maw, zynnaw kyate khuliakunaw a umty cih, te seinaw ccungccapaw athuapaw ronaw ccapaw kha yn langkuh cih.
4 Tuh-e paw nynh pachia cite ko athuapaw miakaw te beik athuapaw uccaw hae kha yn rawse cih, amaw te amaw kha tuh-e hae balyn laeze hangthungkute Pachia beikinn kya yn haung cih zah Pachia nynh ka thua cite yn hokuh cih.Ref 2.4: Dan 11.36; Eze 28.2
5 Nae kya ka um lyaze tuh-e kong tuh kae hopya vae oh paw thua zah na syntaw vae khyh oh tou?
6 Aning tuh amaw ccyh yn zaw te a langku nawlan, atu tuh a kheepaw a um ung cipaw na ny oh.
7 Pawccecize kawbya pawlangria leinaw kya-e byakhupaw tuh rya a lah cciamang vae, thuasalama atu a kheetupaw kha nuepya athua makhia po a khee ung cih.
8 Tuh-e mihoy leipaw tuh yn langkuh cih, tuh-e paw tuh Bawipaw Jesu nynh a khalang kya-e hy te a maemih cih zah amaw yn thuanaw kya-e a akpaw khate a roh cih.Ref 2.8: Isa 11.4
9 Tuh-e mihoy leipaw tuh Satan ryalawnaw liate yn thua cih zah thungnaw, muihsahnaw, ngaeang lan umpaw hynpyakunaw balyn khate thuasah,Ref 2.9: Mat 24.24
10 ronaw a tung cih hae paw kyakhe ahoy leipaw lingnaw aphuinphuin khate thuasah yn thua cih; pawccecize minmin nynh khumnaw mue khylan byaccing kha lawkuh ry khyh hae.
11 Tukeiccuze minmin nynh hynbya kha a zyn ccaw hae cite Pachia nynh athungpaw zynseinaw kha a sawnua cih hae.
12 Tuhteze nynh byaccing kha zyn leite dingleinaw kya a lungrythuapaw balyn tuh seibe athua cih hae.
Khumnaw Mue khylan Ponaw
13 Thuasalama Bawipaw nynh a sungsah hae paw uteno hae, nanning hanlan Pachia tuh kae luung zungzae cih; pawccecize Muisaw nynh thyaasahnaw liate thuasah, byaccing kha zynnaw liate thuasah nanning tuh khumnaw mue khylan Pachia nynh atakaw lya mawte phe ae po vae oh.
14 Ah Bawipaw Jesu Khri phu-enaw kha na ccoubua nawlan oh, kae kya-e thehoypaw liate Pachia nynh tuh-e khumnaw kalan ae ko oh.
15 Tukeiccuze uteno hae, tynkaring lan thadyn oh lah kae bya te thuasah, kae ccaw te thuasah kae ccangpya oh paw phung hae kha varyng kyngkuh oh.
16 Aening kha oun sungsah zah thawccinaw liate zungzae ngaengannaw te ahoypaw ngaehoinaw oun pyatupaw, ah Paaw Pachia te ah Bawipaw Jesu Khri amaw ccaccei nynh,
17 nae thinlung kya ngaengannaw ae la pya oh sah lah, ahoypaw ryalaw te bya miakaw kya thawzung ae la pya vae oh sah.