THESALON HAE
KALAN PAUL CCAKY KYNINGNAW
Thessalonians
Paul nynh a ccawriatu hae kalan byapi lante a hopya ry hae paw tuh: runaw te vawsawnaw na teing oh zemah nae zynnaw kya tynkaring lan thadyn oh, nae hiinnaw khuasahkunaw kya kae te ka ban hae kha oun dosuinkuh oh, te hoynaw rae kha haeungtaw nan oh cipaw nynh thua.
1
Beihlangnaw
1 Paul, Silas te Timote nynh ah Paaw Pachia te Bawipaw Jesu Khri kya um hae paw Thesalon khriccaawbuu kalan ccaw kae ky oh.Ref 1.1: Loc 17.1
2 Ah Paaw Pachia te Bawipaw Jesu Khri kyate thawccinaw te daenaw tuh nae kya la um vae sah.
Lungtuabya Honaw
3 Uteno hae, nae zynnaw tuh myarya lethung zah nanning milu raveih nynh lu kheit te lu kheit na sungsakunaw oh mah alethung keiccuze cyi lan accan hawte nanning hanlan Pachia kha zungzae kae luung.
4 Tukeiccuze nanning nynh tuaasahkunaw te vawsawnaw balyn kha na ngaesang oh zah teing khonaw te zynnaw na hoi oh keiccuze Pachia khriccaawbuu hae kya nanning hanlan kae pookuh.
Khri Thuanaw te Byapianaw
5 E hynh Pachia kya-e adingpaw byapianaw kha a langsakuhpaw nynh thua, nanning tuh Pachia peenaw hanlan na teing oh keiccuze tuh-e peenaw te angaekuh hae paw nynh na thua oh.
6 Nanning vawsaw ae pya oh paw ccungccaw hae kha vawsawnaw pyaru lanpaw tuh Pachia hanlan atazaepaw nynh thua,
7 Bawipaw Jesu tuh athungpaw a vaaw hae ryte aruapaw maee khate vaawlang te he yn langkuh te, vawsaw na teing oh paw nanning kha kaening ryte haeungnaw ae pya cih oh,
8 Pachia nynh amaw a nyh lei hae paw te ah Bawipaw Jesu Khri thehoypaw a ngae lei hae paw kha a liaru cih hae.
9 Minmin tuh zungzae ronaw detahnaw kha a teing cih hae zah Bawipaw malang kyate thuasah, a thungnaw kya-e phu-enaw kyate thuasah phia athua cih hae,Ref 1.9: Isa 2.10
10 amaw he yn thua te a mithyaa hae liate phu-esah athua cih zah, nanning kalan ccaekia kae khanpaw kha na zyn oh keiccuze a zyn hae paw balyn laku kya ngaeang thehoysah athua cih.
11 Tukeiccuze Pachia nynh nanning kha amaw konaw te angaekuhpaw lang ae tangsah oh zah, ahoypaw rynaw balyn te zynnaw kya-e ryalaw tuh a thungnaw liate a ccingsah nawlan nanning hanlan zungzae saw kae sang.
12 Tuhcite ah Pachia te Bawipaw Jesu Khri thawccinaw thyhte, ah Bawipaw Jesu min tuh nae kya phu-esah athua cih zah nanning mah amaw kya phu-esah na thua cih oh.