34
Moses nynh Lungphe Thawpaw A Rae
(Deu 10.1-5)
1 Bawipaw nynh Moses kha, “Langmaw e lungphe hae hawte lungphe phe ning kha awtua, na koipaw langmaw e lungphe hae vawlan umpaw bya hae kha khah-e lungphe hae vawlan khe ka zei cih.
2 Awkhua khe paccynkute na um cih, Sinai Mua lang awkhua khe na kaethung cih zah mua dung kya ka malang khe na um cih.
3 Namaw ryte humhung mah kaethung bua lan khyh, mua pynpi kya humhung mah na langsakuh lan khyh hae; e mua a malang kyakhe tuu hae, vaetua hae kha na paesah lan khyh hae,” a cipya.
4 Tukeiccuze Moses nynh langmaw e lungphe hae hawte lungphe phe ning kha a aw; te Bawipaw nynh kaw a pya thyhte Moses tuh awkhua khe Sinai Mua vawlan kaethung zah lungphe phe ning kha a kuih kya a ccyng.
5 Bawipaw tuh maeking te yn rungbung zah tuin kya Moses pe khe thadyn zah Bawipaw min kha a siakhae.
6 Bawipaw tuh Moses malang po cceih zah,
“Bawipaw , Bawipaw ,
Ngaethyaumsahnaw te
thawccinaw a hoipaw Pachia,
a lungsae zah
atynpaw sungsahnaw te thuasah,
lungzinaw te thuasah phe abeihpaw,Ref 34.6-7: Exo 20.5-6; Nam 14.18; Deu 5.9-10, 7.9-10
7 she athong-asan kyacia
atynpaw sungsahnaw kha a tynsahpaw,
hoyleinaw, cyiseinaw te
seinaw kha a ngaethyapaw,
tuhzemah seimenaw kha
huatawte a ngaethya leipaw,
nungpaaw hae hoyleinaw kha
ccaaw hae tungvaw te
ccaawsenopaw she thumnaw te
she palinaw kyacia liarunaw
a mangpaw Bawipaw ,”
cite a siakhae.
8 Te Moses nynh a lu kha laephi kalan palou bakhung zah a beik.
9 Aning nynh, “Pou Bawipaw , namaw malang maehoynaw ka mue zetuh kaening ryte beih cceihbua. E ccungccaw hae tuh mih lungkhungpaw a thua hae zemah kae hoyleinaw te kae seinaw kha oun ngaethya lah namaw rho lante beih oun lawkuh,” a cipya.
Byakinnaw Thawpaw
(Exo 23.14-19; Deu 7.1-5; 16.1-17)
10 Bawipaw nynh, “Byakinnaw kha ka rae. Laephi vawlan balyn kya te pawpaw minphuin kya mah rae a thua boi leipaw ngaeangnaw kha na ccungccaw balyn malang ka rae cih; na umnaw e ccungccaw balyn nynh Bawipaw ryalawnaw kha a muih cih hae; pawccecize tuh-e tuh namaw hanlan ka rae lanpaw ri lan umpaw uccaw nynh thua.
11 Atunin kae pya lanpaw kawbya kha na zui cih. Amor hae, Kanaan hae, Hit hae, Periz hae, Hiv hae te Jebus hae kha na malang te ka dee cih hae.
12 Na cceih cihnaw ram kya umpaw ccungccaw hae ryte byakinnaw kha na rae khyh nawlan raeringkuh, tuhkhyhze tuh tuh-e byakinnaw tuh nanning laku kya kaang lang a tang cih.
13 Minmin kya-e silawhang hae kha na ropah cih hae, athyaapaw mih tungpi hae kha na khyapah cih hae zah athyaapaw mih thing hae kha na tyapah cih hae,Ref 34.13: Deu 16.21
14 (ccangpaw pachia kha na beik lan khyh, pawccecize a min “Eiumthyapaw,” cikuhpaw Bawipaw tuh a eiungthyapaw Pachia nynh thua.)
15 Tuh-e ram kya umpaw ccungccaw hae te byakinnaw na rae lan khyh, pawccecize mih pachia hae kalan mimaw te mimaw kha ohhuakunaw rae hae zah silawnaw a rae vae hae ze, minmin laku e lukhakheit nynh nang kha ae ko cih zah silawnawpaw kha na aesei cih.
16 Mih ccanung hae kha na ccapaw hae zu lang na dypasei cih hae zah mih pachia hae kalan ohhuakunaw a rae hae paw mih ccanung hae nynh na ccapaw hae kha mah mih pachia hae kalan ohhuakunaw a raesahsei cih hae.
17 Namaw hanlan laeekute pachia hae kha na raekuh lan khyh.Ref 34.17: Exo 20.4; Lev 19.4; Deu 5.8, 27.15
18 Ransi phing leipaw sanlou poi kha na tynsah cih oh. Kaw kae pya thyh oh te, Abib sawpaw kya accan ccyh kyakhe nin sari lungkhu ransi phing leipaw sanlou kha na ae cih oh; pawccecize Abib sawpaw kyakhe Izip ram kyate na pou oh.Ref 34.18: Exo 12.14-20; Lev 23.6-8; Nam 28.16-25
19 Ccatawccaw te sahiin thanty tuh ka uccaw nynh thua; na sahiin-awvaw kya-e a thang typaw pise balyn, vaetua thuasah, tuu thuasah ka uccaw nynh thua.Ref 34.19: Exo 13.2
20 Lann a than typaw kha tuh tuutaw te na shawkhaw cih, na shawkhaw khyh ze a nging kha na khya cih. Na saah typaw ccapise balyn kha na shawkhaw cih.Ref 34.20: Exo 13.13
Humhung mah kuih ccakaete ka malang langkuh lan khyh.
21 Nin taruh lungkhu rya na lah cih, thuasalama nin sarinaw nin kya na haeung cih; looh ccou ccyh kya te rue ccyh kya zemah na haeung cih.Ref 34.21: Exo 20.9-10, 23.12, 31.15, 35.2; Lev 23.3; Deu 5.13-14
22 Lonaw hae poi, chanvuih rue ccyh kya-e masaty athae poi te kum thang ccyh kyaze looh ccakhung poi kha na tua cih.Ref 34.22: Lev 23.15-21, 39-43; Nam 28.26-31
23 Nanning pise balyn tuh kum kheit ze vae thum Bawipaw Pachia, Israel Pachia malang na langkuh cih oh.
24 Minphuin ccangpaw hae kha nae malang te ka dee cih hae zah nae ramri kha ka kosah cih; kum kheit ze vae thum Bawipaw nae Pachia malang langku khylan na ccia vae oh ze, nae ram kha hung nynh sanmah duaa lan khyh.
25 Si nae lawnaw oh paw a chii kha ransi phingkuhpaw sanlou ryte nae pyakheih lan khyh oh, te kawtaw poi kya-e silawnawpaw kha awkhualan awkhua cia na laesah lan khyh oh.Ref 34.25: Exo 12.10
26 Na laephi kya masaty athae hae paw kya-e ahoy huaccepaw kha Bawipaw na Pachia inn lang na thuakhae cih.Ref 34.26: Deu 24.21, 26.2
Tuutaw kha a pi mateitui te na thungde lan khyh.
27 Bawipaw nynh Moses kha, “E bya hae hynh zei hae; e bya hae thyhte nang te Israel hae ryte byakinnaw kha ka rae vae,” a cipya.
28 Moses tuh Bawipaw ryte nin sung pali te zi sung pali tuin kya a um; looh mah ae khyh zah tui mah neih khyh. Lungphe hae vawlan khe byakinnaw bya hae kawbya ccanghaw, kha a zei.
Moses Mae
29 Moses tuh Sinai Mua kyate yn rungbung. Moses nynh a kuih kya byakin lungphe phe ning kha yn ccyng zah yn rungbung lyakhe Pachia te bya a hoku hae keiccuze a mae a akpaw kha nyhkuh khyh.Ref 34.29-35: 2Ko 3.7-16
30 Aaron te Israel hae nynh Moses mae phaephae akpaw kha he a muih hae tuh, a pe lang naeku lan a rih hae.
31 Thuasalama Moses nynh minmin kha a ko hae, te Aaron te Israel zapi cciakhaetu hae tuh amaw kalan naeku hae zah Moses nynh minmin kha bya a beih hae.
32 Tukoute Israel hae balyn tuh Moses pe lang a naekuh hae, te Bawipaw nynh Sinai Mua kya a hopyapaw kawbya balyn kha a pya hae.
33 Moses nynh bya he a hopah kou hae te, mae bongkupaw boei khate a mae kha a bongku;
34 Thuasalama Moses nynh byahoku khylan Bawipaw malang he a tee takyhte, yn toiku makhia mae bongkupaw boei kha a lyngku; te aning nynh he yn toikuh te, Bawipaw nynh kaw a pyapaw balyn kha Israel hae kya a hopya hae,
35 Israel hae nynh Moses mae a akpaw kha a muih hae; Bawipaw te byahoku khylan a tee makhia tuh, Moses nynh mae bongkupaw boei kha a mae kya bua a bongku.