33
Sinai Mua te Pou lan Kawpyanaw
1 Bawipaw nynh Moses kha, “Namaw te Izip ram kyate na poukhae hae paw ccungccaw hae nynh e hmin hynh cciataw oh lah, ‘E ram hynh na ciihan hae ka pya cih hae,’ cite Abraham, Isak te Jakob kya bya ka kinpyaku hae paw ram lang cceih oh.Ref 33.1: Gen 12.7, 26.3, 28.13
2 Vaaw ccungccapaw lu kheit kha na malang ka saw cih zah Kanaan hae, Amor hae, Hit hae, Periz hae, Hiv hae, te Jebus hae kha ka dee cih hae.
3 Mateitui te khoilutui a luanaw ram lang cceih oh; thuasalama nanning laku ka cceihbua lan khyh, nanning tuh lungkhung hae paw na thua oh keiccuze laanryng khe kae maemihsei cih oh,” a ci.
4 Ccungccaw hae nynh tuh-e byaccih paw kha a thae hae tuh, myarya mih ngaethah zah hung sanmah ccaankuh khyh hae.
5 Bawipaw nynh Moses kha, “Israel hae kyakhe, ‘Nanning tuh lungkhung hae paw nynh na thua oh; nanning laku sohsoh ka cciabua lanze, phe kae maemihsei cih oh. Tukeiccuze nae tungvaw pawmou ka cyih cih cipaw ka ny nawlan, na ccaankunaw oh paw uccaw hae kha khahkuh oh,’ cite hopah hae,” a cipya.
6 Tukeiccuze Israel hae nynh Horeb Mua kyakhe a ccaankunaw hae paw uccaw hae kha a khahku vae hae.
Ryahmin Atolang e Buu
7 Moses nynh bu kha leih lah zah ryahmin atolang asawnaw khe a sak; aning nynh bu kha tungkunaw bu cite min a phu. Te Bawipaw a ccungpaw miakaw nynh ryahmin atolang umpaw tungkunaw bu kalan khe a cceih hae.
8 Moses nynh bu kalan a ccia takyh vae ze, ccungccaw balyn nynh thokuh hae zah lu kheit ccite mih bu thuakaw kyakhe thadyn hae zah Moses nynh bu lungkhu lang a tee mawlaezung amaw kha a do hae.
9 Moses nynh bu lungkhu lang he a tee tuh, maeking tung nynh yn rungbung zah bu thuakaw kyakhe a thadyn, te Bawipaw tuh Moses te bya a hokuh hae.
10 Ccungccaw balyn nynh bu thuakaw kya a thadynpaw maeking tung kha he a muih hae tuh, mih balynte thokuh hae zah mih bu thuakaw kyakhe pong a bakhung hae.
11 Te Bawipaw nynh Moses kha ruiban lu kheit te byahoku hawte hawiliakute bya a hokhae. Tukoute Moses tuh ryahmin lang a ki; thuasalama a rya bawmtu, ccangvaepaw Nun ccapaw Joshua tuh bu kyate pou khyh.
Moses kyate Hopianaw
12 Moses nynh Bawipaw kha, “ ‘E ccungccaw hae hynh cciakhae hae,’ cite nae hopya; thuasalama kamaw ryte hummou na saw cih cipaw nae nysah khyh. Tuhzemah, ‘Nang kha na min te phe kae ny, ka malang maehoynaw na mue vae,’ cite nae hopya.
13 Atu namaw malang maehoynaw ka mue vae lan athua ze, namaw kha kae ny nawlan te na malang maehoynaw ka mue nawlan, na laanpi kha yn muihsah. E minphuin tuh na ccungccaw hae nynh thua cipaw kha tuabia tua,” a cipya.
14 Te Bawipaw nynh, “Nang kha kae cciakhae cih zah lung ngaengannaw kae pya cih,” a cipya.
15 Te Moses nynh, “Na cciabua khyh zetuh, e hmin kyate kaening kha oun cciasah nan.
16 Kaening kha nae cciakhae khyh zetuh, kae te na ccungccaw hae nynh na malang maehoynaw kae mue cipaw kha pawtemou ny kho a thua cih? Tuhcite kae te na ccungccaw hae tuh laephi vawlan umpaw ccungccaw miakaw te kae lae cih,” a cipya.
17 Bawipaw nynh Moses kha, “Nae ngia hawte ka cyih cih; pawccecize ka malang maehoynaw na mue zah nang kha na min te kae ny,” a cipya.
18 Moses nynh, “Na phu-enaw kha beih yn muihsah tua,” cite a ngia.
19 Bawipaw nynh, “Ka hoynaw balyn kha na malang ka cciasah cih, te ‘Bawipaw’ min kha na malang ka siakhae cih; thaw ka cci rypaw kha thaw ka ccih cih zah, ngaethya ka umsah cih paw kha ngaethya ka umsah cih.Ref 33.19: Rom 9.15
20 Thuasalama ka mae kha na muih kho lan khyh; pawccecize ka mae a muihpaw tuh humhung zemah hiin lan khyh,” a ci.
21 Tukoute Bawipaw nynh, “Lung vawlan na thadyn cihnaw ka pe khe hmin san kheit a um.
22 te ka phu-enaw po a ccia lyakhe nang kha lungpi laku kya kae nung cih zah, ka ccia kou makhia ka kuih te phang kae bong cih;
23 oute ka kuih kha ka lah cih zah ka nulang khate nae muih cih; thuasalama ka mae tuh nae muih lan khyh,” a cipya.