1 Bawipaw nynh Moses kha, 2 “Israel hae kha nulang ki oh lah Pi-hahiroth malang, Migdol khua te rili laku, Baal-zefon khua te arawsekunaw malang, rili kin khe rya oh cite hopah hae. 3 Faro nynh, ‘Israel hae tuh ram lungkhu kya eenaw hoi leite a khiavuikuh vae hae; laesia ram nynh minmin kha phe a koihlu vae,’ cite a ho cih. 4 Faro te a rhawkaw hae balyn kya phu-enaw ka mue nawlan Faro thinlung kha ka khungsah cih zah Israel hae kha aning nynh a deehui cih hae, kae tuh Bawipaw nynh ka thua cipaw kha Izip hae nynh yn nyh cih hae,” a cipya. Te Israel hae nynh tuhcite a cyi hae. 5 Ccungccaw hae phe ccue vae hae cipaw kha Izip siapharan kya he a hopah hae tuh, Faro te a ryalahtu bawi hae thinlung tuh phe paleihkuh zah, “Israel hae kha ah ryalaw kyate pawcce ah la cciasah oh?” a ciku hae. 6 Tukeiccuze Faro nynh a marangle kha paccyn zah a rhawkaw hae kha a ko hae; 7 a popaw marangle za taruh te Izip ram e ccangpaw marangle hae balyn kha marangle a uktu lang bawi lu kheit cci ryte a ko hae. 8 Bawipaw nynh Izip siapharan Faro kha a lungkhung sah zah rawhoyte a pou hae paw Israel hae kha a deehui hae. 9 Izip hae, Faro marang hae balyn, marangle hae, a marangle a mawngtu hae te a rhawkaw hae nynh deehui hae zah rili kin a ryanaw hae Pi-hahiroth khua pe Baal-zefon khua malang khe a phya hae. 10 Faro nynh houhouh yn naekuh lyakhe Israel hae nynh he do hae tuh, Izip hae nynh oun naangku hae paw kha a muih hae. Israel hae tuh myarya rih hae zah Bawipaw kalan a sia vae hae. 11 Minmin nynh Moses kha, “Izip ram kya shawku a um khyh keiccu tou laesia ram kya chi khylan nae cciakhae? Pawcce kae tungvaw hynhte na cyih zah Izip ram kyate nae poukhae? 12 ‘Kaening hynh oun cciataw, Izip hae see lang kae la tang sah,’ cite Izip ram kya kae hopyapaw kha hynh-e hynh thua khyh tou? Ramkaw kya chi laeze Izip ram kya see lang tangpaw tuh kaening hanlan ahoyhua,” a ci hae. 13 Thuasalama Moses nynh ccungccaw hae kha, “Nae thinphang nan sah, tynkaring lan thadyn oh lah Bawipaw nynh nae hanlan atunin a raepaw khumnaw kha dotua oh. Atunin na muih oh paw Izip hae kha na muih boi vae lan khyh oh. 14 Bawipaw nynh nae hanlan rhaw ae tukpah cih oh; nanning nynh daebabi lan na um cih oh,” a cipya hae. 15 Oute Bawipaw nynh Moses kha, “Pawcce kamaw kalan na sia? Israel hae kha malang ccia lan hopah hae. 16 Na hoitang kha hang lah rili vawlan khe na kuih kha dyng lah rili kha thoh phiatua. Israel hae nynh rili lungkhu aroupaw laelung vawlan khe a cceih cih hae. 17 Izip hae kha mih lung ka khungsah cih hae zah Israel hae kha a dee cih hae; te Faro te a rhawkaw hae balyn, a marangle hae te a marangle a mawngtu hae liate phu-enaw ka mue cih. 18 Faro te a rhawkaw hae balyn, a marangle hae te a marangle a mawngtu hae liate phu-enaw he ka mue tuh, Izip hae nynh kae tuh Bawipaw nynh ka thua cipaw yn nyh vae cih hae,” a cipya. 19 Israel rhawkaw hae malang a cceihpaw Pachia vaawpaw tuh nuekuh zah mih nulang khate a zuikuh; maeking tung tuh mih malang te nuekuh zah mih nulang khe a thadyn. 20 Maeking tung tuh Israel rhawkaw te Izip rhawkaw hae laku khe a um. Tuh-e maeking nynh Izip hae kyakhe mohsah zah Israel hae kyakhe khuazi ccyh kya a awsah; tukeiccuze khuazi zidae phu kheit te phu kheit naekuh kho khyh hae. 21 Oute Moses nynh a kuih kha rili vawlan a dyng. Bawipaw nynh athawsaepaw nithua lang e khisan khate rili kha khuazi zidae mungsah zah rili tui tuh phiakuh zah aroupaw laephi lang a tang vae. 22 Israel hae tuh rili lungkhu aroupaw laephi kyakhe a cceih hae, tui tuh mih ranglang te mih voilang khe pang hawte a thungkuh.Ref 14.22: 1Ko 10.1-2; Heb 11.29 23 Izip hae, Faro a marang hae balyn, marangle hae te marangle a mawngtu hae nynh Israel hae nulang khate rili lungkhu khe a dee hae. 24 Bawipaw nynh khuadae dyn khe maee te maeking tung kyate Izip rhawkaw hae kha dobung hae zah a siisaku hae. 25 Bawipaw nynh mih marangle a ccu hae kha miaku aru ccaw cite phang a tawsah hae. Izip hae nynh, “Israel hae kyate ccue ccavae oh sih, pawccecize Bawipaw nynh minmin hanlan aening kha oun tuk vae,” a ciku hae. 26 Oute Bawipaw nynh Moses kha, “Izip hae, mih marangle hae te marangle a mawngtu hae kha tui nynh a luathin ccaw hae, na kuih kha rili luki lang dyngtua,” a cipya. 27 Tukeiccuze Moses nynh a kuih kha rili luki lang a dyng, te khuadaetakaw khe rili tuh amaw mamin hawte bua yn tungkuh. Izip hae nynh a ccue lya hae khe Bawipaw nynh minmin kha rili lungkhu lang pong a phung hae. 28 Rili lungkhu lang Israel hae a deehui hae paw Faro rhawkaw hae balyn, marangle hae te marangle a mawngtu hae kha tui nynh bua yn tungkuh ki zah pong a vu hae; lu kheit sanmah lue khyh hae. 29 Thuasalama Israel hae tuh aroupaw laephi vawlan cciate rili kha zua hae zah tui tuh mih ranglang te mih voilang khe pang hawte phang a thungkuh. 30 Tuh-e nin khe Bawipaw nynh Israel hae kha Izip hae kuih kyate a khum hae; te rili kin kya a chih hae paw Izip hae kha Israel hae nynh a muih hae. 31 Bawipaw nynh Izip hae kha rawsete ryalaw lepaw a lawpaw kha Israel hae nynh a muih hae. Tukeiccuze ccungccaw hae nynh Bawipaw kha rih hae zah Bawipaw tungvaw te a ryalahtu Moses tungvaw zynnaw a hoi hae.