13
1 Bawipaw nynh Moses kha,
2 “Ccatawccaw te thanty balyn kha kamaw hanlan na thyaasah cih oh; Israel hae kyaze masaty a puipaw ccungccaw thuasah, masaty a thanpaw sahiin-awvaw thuasah kamaw uccaw nynh thua,” a cipya.Ref 13.2: Nam 3.13; Luk 2.23
Ransi Phing leipaw Sanlou Poi
3 Moses nynh ccungccaw hae kha, “See lang na tangnaw oh inn kyate thuasah, Izip ram kyate thuasah na pou nin oh, hynh-e nin hynh ning nan oh, pawccecize Bawipaw nynh athawsaepaw kuih te Izip ram kyate ae poukhae oh; ransi phingkuhpaw sanlou kha na ae lan khyh oh.
4 Abibnote13.4 Abib sawpaw: hynh March saw angaelung kyate April saw angaelung cia loukaw nynh thua. sawpaw lungkhu atunin kya na pou cih oh.
5 Nanning kha kae pya cih oh cite nae minpaaw hae kya bya a kinpyaku hae paw ram, mateitui te khoilutui a luanaw ram, Kanaan hae, Hit hae, Amor hae, Hiv hae te Jabus hae nynh a umnaw hae ram lungkhu lang Bawipaw nynh he ae teekhae oh te, e sawpaw kya hynh-e naawpawphung hynh na zui cih oh.
6 Nin sari lungkhu ransi phing leipaw sanlou kha na ae cih oh, te nin sarinaw nin kya Bawipaw hanlan poi na tua cih oh.
7 Ransi phing leipaw sanlou kha nin sari lungkhu na ae cih oh; ransi phingkuhpaw sanlou kha na hoi oh paw uccaw kya na nung lan khyh oh zah ransi kha na umnaw oh kya balyn naemaw kya na nung lan khyh oh.
8 ‘Izip ram kyate la pou lyaze Bawipaw nynh kamaw hanlan yn la cyipya keiccu nynh hynhte ah cyi oh,’ cite khah-e nin khe na ccaaw kha na hopah cih.
9 Bawipaw kya-e ccangpyanaw kha na mung kya atyn nawlan hynh-e hynh na kuih kya na khiikupaw muihsahnaw hawte thuasah, na terui kya na heedekupaw nysakunawpaw hawte thuasah a thua cih; pawccecize athawsaepaw kuih te Bawipaw nynh nang kha Izip ram kyate ae poukhae vae.
10 Tukeiccuze e phungzae hynh kum takyh, amaw accyh takyh kya na zui cih.
Ccatawccaw
11 “Bawipaw nynh nang te na minpaaw hae kya bya a kinku thyhte nang kha Kanaan ram lungkhu lang ae thuakhae zah khah-e ram kha he ae pya te,
12 na ccatawccaw pise balyn kha Bawipaw kalan na pya cih. Na sahiin kyaze thanty pise balyn tuh Bawipaw kya-e a thua cih.Ref 13.12: Exo 34.19-20; Luk 2.23
13 Thuasalama masaty a thanpaw lann taw kha tuh tuutaw te na shawkhaw cih; na shaw ry khyh ze a nging kha na khya cih. Nae ccatawccaw pise miakaw kha na shawkhaw cih.
14 Malang ccyh kya na ccaaw hae nynh, ‘E hynh asuilan pawmou athua?’ cite ae khia hae ze nang nynh, ‘Bawipaw nynh athawsaepaw kuih te Izip ram seetangnaw kyate aening kha oun pousah.
15 Faro nynh a lungkhung zah aening kha cciasah lan he a ei tuh, Bawipaw nynh Izip ram e ccatawccaw balyn te sahiin thanty balyn kha pong a chia. Tukeiccuze thanty pise miakaw khate Bawipaw kha si ka law, thuasalama ka ccatawccaw pise miakaw kha ka shaw,’ cite na hopah cih hae.
16 Tuh-e phungzae tuh na kuih kya na khiikupaw muihsahnaw hawte thuasah, na terui kya na heedekupaw nysaku nawpaw hawte thuasah athua cih; pawccecize athawsaepaw kuih te Bawipaw nynh aening kha Izip ram kyate oun poukhae vae,” a ci.
Maeking Tung te Maee Tung
17 Faro nynh Israel hae kha he a cciasah hae tuh, Pachia nynh minmin kha anae huanaw Filistia ram lang a cceihpaw laanpi kyate cciakhae khyh hae; pawccecize, “Minmin nynh rhawtuk kha a tung hae ze mih thinlung a paleihkuh cih zah Izip ram lang a kisei cih hae,” cite Pachia nynh a tua.
18 Tukeiccuze Pachia nynh minmin kha laesia ram e avoikuhpaw laanpi khate Rili Se langkhe a cciakhae hae. Israel hae tuh rhawtukkunaw hanlan paccynkute Izip ram kyate a cceih hae.
19 Josef nynh Israel hae kha tynkaring lan byakinsakuh hae zah, “Pachia nynh nanning kha ae bawm ccaccing cih oh, e hmin kyate ka ru kha nae la cciakhae hahe cih oh,” cite a la hopya hae thyhte Moses nynh Josef a ru kha a cciakhae.Ref 13.19: Gen 50.25; Jos 24.32
20 Minmin nynh Sukkoth khua kyate pou hae zah laesia ram pe umpaw Etham khua kya a rya hae.
21 Minmin nynh khuazi khuadae a ccia kho ccaw hae cite, Bawipaw nynh minmin kha cciakhae khylan khuadae ccyh kyaze maeking tung te thuasah, khuazi ccyh kyaze minmin kha awnaw pya khylan maee tung te thuasah mih malang khate a cciakhae hae.
22 Khuadae ccyh kya maeking tung tuh thuasah, khuazi ccyh kya maee tung tuh thuasah Israel hae malang kyate zo khyh.