4
Judah hae Bawm lan Esther A Nawccah
1 A cyi hae paw balyn kha Mordekai nynh he a thae te, a boeining kha seii zah buriboei kha lawkuh zah buhhaw a phingku, te khualae lungkhu lang cceih zah roi accae lante thawte a rah;
2 buriboei lawkute humhung mah siapharan sakoih kalan tee phung athua khyh keiccuze siapharan sakoih teenaw kyacia rou nynh a cciathung.
3 Siapharan kawbya te byapaenaw a thuanaw pee miakaw kyakhe Judah hae laku kya myarya ccihpaw rawkhuinaw, looh-aesungnaw, rawnaw te ngaethyanaw um zah, ccungccaw alunghua tuh buriboei lawkute buhhaw kya a toukuh hae.
4 Esther a ryalahtu nopi hae te tinriapaw a ccungccaw hae nynh Esther kha he a hopah hae tuh, siapharannung tuh myaryamaw a lungriathae; Mordekai nynh a buriboei kha khahkuh sah lah, a lawku ccaw cite Esther nynh boeining kha a ky; thuasalama Mordekai nynh lawkuh ry khyh.
5 Tetuh Esther nynh siapharan kya-e tinriapaw ccungccapaw, amaw a do-oihtu lang khang athuapaw Hathak kha ko zah, pawmou acyihkuh cipaw te pawccemou acyiku cipaw kha khiatua khylan Mordekai kalan ccia lan kaw a pya.
6 Hathak tuh siapharan sakoih malang, khualae ngaelung umpaw Mordekai kalan cceih zah,
7 Mordekai nynh a tungvaw acyihkuhpaw balyn kha thuasah, Judah hae ro khylan siapharan sisuakhaan kya Haman nynh nung lan bya a kinkupaw phua abalyn kong kha thuasah a hopya.
8 Judah hae ro nawlan Susa khua kya kaw a tho hae paw ccaw khawpi kha Esther dosah khylan te asuilan hopya khylan Mordekai nynh Hathak tuh a pya, te Esther nynh siapharan kalan la cceih sah lah, a minphuin hae hanlan la ngia sah, cite bya a taw.
9 Hathak nynh cceih zah Mordekai a hopaw bya kha Esther kya a hopya.
10 Tetuh Mordekai kya hopya lanpaw bya tuh Esther nynh Hathak kha taw zah,
11 “Pise thuasah, nopi thuasah siapharan nynh a ko leite, humhung zemah alungkhu lang e voidu lungkhu lang, siapharan kalan a tee zetuh, chia athua cih cipaw phung ccangkheit rou nynh a um. Siapharan nynh a sui ccoi kha a pyalang ze rou nynh tuh-e ccungccaw tuh a hiin cih cipaw kha siapharan a ryalahtu hae te siapharan a pee lungkhu e ccungccaw balyn nynh a ny hae. Kae hynh nin sung thum lungkhu siapharan kalan tee lan ko ka thua vae khyh,” a cipya.
12 Esther nynh a hopaw bya kha Mordekai kya he a hopah hae tuh,
13 Mordekai nynh Esther kalan khungru lanpaw bya kha minmin kya hopah hae zah, “Siapharan inn kya ka um keiccuze ccangpaw Judah hae balyn laeze ka luehua cih cite tuakuh nan.
14 Pawccecize atu ccyh lyahin daebabi lan na um zetuh, Judah hae hanlan khynnaw te luenaw tuh ccangpaw hmin kyate yn langkuh cih, thuasalama nang te na paaw innbyn hae tuh na chih cih oh. Nang nynh siapharannung lang na la tangpaw hynh hynhcihawpaw ccyh hanlan mah athua kho, hummou a nyh?” a cipya.
15 Tetuh Esther nynh Mordekai kalan byataw zah,
16 “La cceih lah, Susa khua kya um hae paw Judah hae balyn kha la pum hae, kamaw ccelang looh-ae la sung oh lah, khuazi khuadae nin thum lungkhu ae mah la ae nan oh, nia mah la neih nan oh. Kae te ka ryalahtu nopi hae nynh mah nanning hawte looh-ae kae la sung cih. Tukoute phung te arawseku zemah siapharan kalan ka la cceih cih; ka chi ze ka chih,” a cipya.
17 Te Mordekai tuh cceih zah Esther nynh kaw a pya thyhte marya a cyi.