3
Haman nynh Judah hae kha A Ro Ry hae
1 Tukoute Siapharan Ahasuerus nynh Agag ccungccaw Hamedatha ccapaw Haman kha a ryalaw kaesah zah, amaw kya um hae paw bawi hae balyn laeze ahangnaw kya a nung.
2 Te siapharan sakoih kya um hae paw siapharan a ryalahtu hae balyn nynh Haman kha bakhungpah hae zah sawtuanaw a pya hae; pawccecize tuhcite cyi lan siapharan nynh kaw a pya hae. Thuasalama Mordekai nynh tuh bakhungpah khyh zah sawtuanaw mah pya khyh.
3 Tetuh siapharan sakoih kya um hae paw siapharan a ryalahtu hae nynh Mordekai kha, “Pawccemou siapharan kaw kha na ei?” a cipya hae.
4 Minmin nynh nin takyh hopah hae zah mih bya a ngae khyh keiccuze Mordekai bya hynh atyn tou tyn khyh tou cipaw ny nawlan Haman kha a hopya hae; pawccecize Mordekai nynh minmin kha, kae tuh Judah ccungccaw nynh ka thua, a cipya hae.
5 Mordekai nynh a bakhungpya khyhpaw te sawtuanaw a pya khyhpaw kha Haman nynh he a muih tuh, myarya a thinria.
6 Thuasalama Mordekai kyalya kha chia lanze zaw khyh cite a tua. Te Mordekai a ccungccaw hae tuh paw minphuin nynh athua hae cipaw kha Haman kya a hopya vae hae keiccuze Haman nynh Ahasuerus a ram pynpi kya um hae paw Mordekai ccungccaw hae, Judah hae balyn kha ro lan a paccyn.
7 Siapharan Ahasuerus nynh siapharan lang a tangnaw kum haw lae ningnaw kum, masaty sawpaw athuapaw Nisan saw khe Haman nynh a paccynnaw kha ccingsah khylan angaekuhpaw anin te asaw kha po khylan Pur cikuhpaw ccungthydungnaw kha Haman malang khe rae hae zah, sawpaw sah haw lae ningnaw Adar saw, nin haw lae thum nin khe accan.
8 Te Haman nynh Siapharan Ahasuerus kha, “Na ram lungkhu e pee hae balyn kya po lekuh lan apazaekuhpaw minphuin phuin kheit a um; mih phunglang tuh ccangpaw minphuin hae phunglang te lae zah, siapharan kawbya kha zui khyh hae, tukeiccuze siapharan nynh mih tungvaw kya ngaesangnaw na hoi lan ccan khyh.
9 Siapharan nynh na nawccaw ze, minmin kha ro lan kawbya thotua, siapharan rya a uktu hae nynh siapharan sisuakhaan lungkhu lang nung lanpaw ngun talent thong haw kha kae nynh ka pya cih hae,” a cipya.
10 Tukeiccuze siapharan nynh a kuihdung kya-e tazeih kuihpu kha lah zah, Agag ccungccaw Hammedatha ccapaw Haman, Judah hae rhawpaw kha a pya.
11 Siapharan nynh Haman kha, “Tuh-e phua tuh nang kha kae pya, tuh-e ccungccaw hae tuh ahoy na ci hawte cyih hae,” a cipya.
12 Tetuh masaty sawpaw, nin haw lae thum nin khe siapharan ccaw a zeitu hae kha ko hae zah, Haman nynh kaw a pya hae paw balyn thyhte siapharan kuihkaw e bawi hae, pee miakaw kya-e uktu hae te ccungccaw balyn a uktu bawi hae kalan khe, pee takyh kalan mimaw ccaw raveihte, minphuin takyh kalan mimaw bya raveihte kawthopaw ccaw kha Siapharan Ahasuerus min te zei hae zah siapharan kya-e tazeih kuihpu khate tazeih a khia hae.
13 Sawpaw sah haw lae ningnaw Adar saw, nin haw lae thum nin khe Judah ccungccaw balyn, adihpaw te alepaw, nopi hae te imua hae kha nin kheit lungkhu kya maemih lan, chia lan, ro lan te mih uccaw hae kha luade lan kawpyapaw ccaw kha ccaw phutu hae nynh siapharan kya-e pee takyh kalan a cciakhae hae.
14 Ccungccaw balyn tuh tuin nin khe paccynkute a um nawlan hae, tuh-e kawpyanawpaw ccaw khawpi tuh pee takyh kalan kawbya lan thaesah lanpaw nynh a um vae.
15 Siapharan kawpyapaw thyhte ccaw phutu hae tuh arangte cceih hae zah Susa khuapi kyakhe tuh-e kawbya tuh a tho hae. Siapharan te Haman tuh misutui nia lan a haung hae; thuasalama Susa khuapi tuh pong anuakhaekuh.