8
Zohtuh hae kalan Looh Pyanaw
1 Atu zohtuh hae kalan pyapaw looh konglang ho lanze: “aening balyn tuh nynaw ah hoi oh” cipaw ah ny oh. Nynaw tuh a lysakuh, thuasalama sungsakunaw nynh tuh thawzung kha a tynsah.
2 Lukhakheit nynh ccangkhakheit ka nyh cite a tuaku lanze, ny lan accan zeih kha nyh loh khyh.
3 Thuasalama Pachia a sungsahpaw ccungccaw kha Pachia nynh a ny.
4 Tukeiccuze zohtuh kalan a pya hae paw looh aenaw konglang ho lanze, laephi kya zohtuh um ccaccing khyh cipaw te Pachia ccangkheit laelan ccangpaw um vae khyh cipaw kha ah ny oh.
5 Pawccecize “pachia hae” patae te “bawi hae” patae a um a ci hae hawte, vaawlang kya thuasah, laephi vawlan thuasah pachia hae a ci hae paw kha a la um hae zemah,
6 aening hanlan tuh Paaw, Pachia ccangkheit rou nynh a um, pawpaw balyn tuh amaw kyate oun um zah, aening tuh amaw hanlan nynh ah hiin oh. Bawipaw lu kheit, Jesu Khri rou nynh a um. Pawpaw balyn tuh amaw liate um zah, aening mah amaw liate nynh ah um oh.
7 Tuhzemah tuh-e nynaw tuh ccungccaw miakaw kya um khyh. Abang ccungccaw tuh atu cia zohtuh beiknaw kya a ciaku hae keiccuze zohtuh kalan pyapaw looh kha a ae hae ze, zohtuh looh nynh thua cite a tua hae; mimaw te mimaw nykunawpaw thinlung tuh a thawzya keiccuze tuh-e looh nynh oun thusah cite a tua hae.
8 Looh nynh aening hynh Pachia kalan oun naesakuh hua lan khyh. Ah ae khyh oh zemah ah shunghua lae khyh oh, ah ae oh zemah ah miahua lae khyh oh.
9 Thuasalama nae kya-e hynh-e luenaw hynh thawzya hae paw hanlan thyku nawlan a tang khyh nawlan raeringkuh oh.
10 Pawccecize nynaw na hoi oh paw nanning nynh zohtuh beikinn kya looh na ae oh paw kha mingccang hae nynh ae muih oh ze, mimaw nykunawpaw thinlung thawzya hae paw nynh zohtuh hae kalan pyapaw looh kha ae lan mih rawthung lan khyh tou?
11 Tukeiccuze nae kya-e nynaw keiccuze, Khri nynh mih hanlan a chipya hae paw, thawzyapaw zyntu hae tuh arohhang cih hae tou?
12 Tuhcite nae uno hae tungvaw na sei oh zah mimaw nykunawpaw thinlung a thawzya ccyh lyakhe vaemaw he na muesah oh tuh, Khri tungvaw na sei vae oh.
13 Tukeiccuze looh nynh ka uno kha a khuliasaku lanze, ka uno kha ka khuliasaku khyh nawlan, saw kha kharouh ka ae vae lan khyh.