7
Zuvaw Tangnaw
1 Atu nanning nynh ka kalan nae zei oh paw te asekuh lante: “Pise nynh zudy leite a um ze ahoy,” na ci oh.
2 Thuasalama ohhuakunaw kha sibia khylan pise miakaw nynh amaw a zu hoi sah lah, nopi miakaw nynh amaw a vawpaw hoi sah.
3 Pise nynh vawpaw athuanawpaw a rya kha ccingsah sah lah, nopi nynh mah zu athuanawpaw a rya kha ccingsah sah; mih lu ning te mih rynaw kha lungryachikhaekuh kalang hae sah.
4 Zu nynh amaw a pyn kya kaw hoi khyh, vawpaw nynh a hoi. Tuhawte vawpaw nynh mah amaw a pyn kya kaw hoi khyh, a zu nynh a hoi.
5 Sawsangnaw rae khylan accyh sosoh na khyakuh oh zah nawccawkheih te na sibia oh paw laelan, lu kheit te lu kheit nae rynaw kha myapakuh nan oh; tuh-e ccyh he athang te, bua umkheih oh, tuhteze nynh na sungku kho khyh oh keiccuze Satan nynh ae tuhou lan khyh oh.
6 Thuasalama hynhte ka hopaw hynh kawbya kae pya oh paw thua leite, kae ua oh paw nynh thua.
7 Ccungccaw hae balyn tuh kamaw hawte thua hae sah ci ka ry. Thuasalama ccungccaw miakaw nynh Pachia kyate muepaw lasung alokuh leipaw kha ccarou a hoi hae. Lu kheit nynh phuin kheit hoi zah mingccangpaw nynh ccangpaw phuin kheit kha a hoi.
8 Tukeiccuze zu a hoi leipaw, vawpaw a hoi leipaw te nomae hae kalan ka hopaw tuh: Minmin nynh kamaw hawte a um hae zetuh mih hanlan ahoy.
9 Thuasalama minmin nynh a sungku kho khyh hae ze zu, vawpaw hoi hae sah; pawccecize chiisaw rynaw kha sungku kho khyh ze zu, vawpaw hoi tuh ahoyhua.
10 Zu, vawpaw a hoi hae paw kha kae nynh kaw ka pya hae, thuasalama tuh-e tuh kamaw kyate thua khyh, Bawipaw kyate yn thuapaw nynh thua: Zu nynh a vawpaw kha mah nan sah.Ref 7.10-11: Mat 5.32, 19.9; Mar 10.11-12; Luk 16.18
11 A mya ze vawpaw hoi leite um sah, tuhkhyhze a vawpaw te bua ccawkuhthui hae sah. Vawpaw nynh a zu kha mah nan sah.
12 Tuhlaepaw mingccang hae kalan, Bawipaw nynh thua leite, kae nynh ka hopaw tuh: zyntu lukhakheit nynh zynleitu athuanung kha zu lang hoi zah, tuh-e a zu nynh a vawpaw ryte umkheih lan a nawccaw ze, a zu kha mah nan sah.
13 Tuhawte nopi lukhakheit nynh zynleitu athuapaw vawpaw kha hoi zah tuh-e a vawpaw nynh a zu ryte umkheih lan a nawccaw ze, a vawpaw kha mah nan sah.
14 Pawccecize a zyn leipaw vawpaw tuh a zu liate thyaasah thua zah, a zyn leipaw zu tuh a vawpaw liate thyaasah athua. Tukhyhze nae ccaaw hae tuh thyaa lan khyh hae, thuasalama atu minmin tuh athyaa hae.
15 Thuasalama a zyn leipaw nynh a mya ze, mah ccaleih sah. Zyntu raee thuasah, ccia thuasah tuhcihawpaw byathan kya heedeku lanpaw thua khyh. Pachia nynh nanning kha daenaw te um khylan nynh ae ko oh.
16 Pou zu, na vawpaw kha na khum kho lanpaw te na khum kho lei lanpaw tuh pawtemou na ny? Pou vawpaw, na zu kha na khum kho lanpaw te na khum kho lei lanpaw tuh pawtemou na ny?
Konaw thyhte Hiin Oh
17 Pachia nynh nanning ae ko lya oh ze, Bawipaw nynh ae khyapya oh paw hiinnaw thyhte nanning lu raveih nynh hiin oh. E hynh khriccaawbuu hae balyn kya ka ccangpya hae paw nynh thua.
18 Pachia nynh a ko lya vingdungawkuh vae paw a um tou? Vingdung a awkunaw adaelaepaw kha zosah lan zuakuh nan sah. Pachia nynh a ko lya vingdungawkuh leipaw a um tou? Vingdungawku lan zuakuh nan sah.
19 Vingdungawkupaw tuh paw ccungkia khyh zah vingdungawku leipaw mah paw ccungkia khyh; thuasalama Pachia kawbya hae zuipaw nynh abyapi athua.
20 Pachia nynh ae ko lya oh hawte nanning lu raveih nynh po hiin oh.
21 Pachia nynh ae ko lya kha see na thua tou? Tuh-e kong tuh na thinphang nan sah. Thuasalama nang nynh luenaw na mue kho ze, tuh-e ccyhhoy tuh mangkuh.
22 Pawccecize see athua lyakhe Bawipaw nynh a kopaw ccungccaw tuh Bawipaw ccungccaw a luepaw nynh thua. Tuhawte ko athua lyakhe a luepaw ccungccaw mah Khri see nynh thua.
23 Nanning tuh amee te repaw nynh na thua oh; ccungccaw hae see lang tang nan oh.
24 Uteno hae, Pachia nynh ae ko lya oh ze na thuanaw oh thyhte Pachia ryte po um oh.
Zu, Vawpaw Hoi leipaw te Nomae hae
25 Atu zu, vawpaw a hoi lei hae paw te asekuh lante Bawipaw kawbya ka hoi khyh; tuhzemah kae tuh Bawipaw a ngaethyaumsahnaw kya zyn lan umpaw lu kheit ka thua hawte tuanaw kae pya oh.
26 Tuhte atu lya-e lungriathaenaw keiccuze pise lu kheit nynh tuhmawte po a um ze ahoy cite ka tua.
27 Nang tuh zu te heede na thua tou? Lue lan zuakuh nan. Nang tuh zu dyku leite a luepaw na thua tou? Zu dyku lan zuakuh nan vae.
28 Thuasalama nang tuh zu na hoi ze, na sei khyh; liaccady nynh vawpaw a hoi ze, aning tuh sei khyh. Tuhzemah zu, vawpaw a hoipaw tuh hynh-e hiinnaw kya vawsawnaw a tung cih hae, nanning kha tuh-e vawsawnaw kyate kae luesah ry oh.
29 Thuasalama uteno hae, ka ho rypaw tuh, accyh adyn vae; tukeiccuze atu te vae tuh zu a hoi hae paw nynh zu a hoi lei hae paw hawte um hae sah;
30 a rah hae paw nynh a rah lei hae paw hawte, lungtua hae paw nynh lungtua lei hae paw hawte, uccaw a re hae paw nynh uccaw a hoi lei hae paw hawte,
31 hynh-e laephi uccaw te a ccuepekuh hae paw nynh tuh-e uccaw te a ccuepekuh lei hae paw hawte um hae sah; pawccecize hynh-e laephi muinsan tuh azo cih.
32 Nanning kha lungriathaenaw kyate kae luesah ry oh. Zu hoi leipaw nynh tuh pawtemou Bawipaw kha a lungry ka tung cih cite Bawipaw ryalaw kong kha nynh a lungriathae.
33 Thuasalama zu hoipaw nynh tuh pawtemou ka zu lungry ka tung cih cite laephi uccaw kong kha nynh a lungriathae.
34 Vawpaw a hoipaw te liaccady laku mah alaenaw a um. Vawpaw a hoi leipaw nopi nynh tuh a pyn kya te a muisaw kya athyaa nawlan Bawipaw kya-e uccaw hae kha nynh a tua. Thuasalama vawpaw a hoipaw nopi nynh tuh pawtemou ka vawpaw lungry ka tung cih cite laephi uccaw hae kong kha nynh a tua.
35 Hynhte ka hopaw tuh, nae hanlan athane nawlan nynh thua, nanning kha khee khylan thua leite, nanning nynh kou angaekuh lante na um nawlan oh te Bawipaw kha lungronaw um leite rya na lawpya nawlan oh nynh thua.
36 Thuasalama pise lukhakheit nynh a haaw vae paw a liaccanung tungvaw dohoy lei lante nynh ka um cite a tuaku ze thuasah, a chiisaw rynaw eih le zah umkheih lan accanthya vae ze thuasah a ry hawte zuvaw lang tang hae sah; tuh-e tuh seinaw thua khyh. Minmin tuh zuvaw lang tang hae sah.
37 Thuasalama tynkaring lan tuakuh zah, nangseku leite a rynaw kha a sungku kho keiccuze tuh-e nopinung tuh a liaccanung lante kyalya po nung lan cite a thinlung kya bya a paekuhpaw tuh uccaw hoypaw nynh a rae.
38 Tukeiccuze a haaw vae paw a liaccanung kha zu lang a hoikuhpaw tuh uccaw hoypaw hynh a rae; thuasalama zu a hoi leipaw ccungccaw tuh houh hoypaw uccaw kha a rae.
39 Zu tuh a vawpaw a hiin lungkhu balyn heede athua. Thuasalama a vawpaw tuh a chi lanze, a rypaw pise zu lang tang khylan, Bawipaw kya kyalya nynh aning tuh a lue.
40 Thuasalama kae nynh bya ka paenaw tetuh, aning nynh vawpaw hoi leite khamawte a um lanze a lungtuahua cih. Kae mah Pachia Muisaw ka hoi cite ka tuakuh.