16
Mithyaa hae hanlan Ahlu Khoipyapaw
1 Atu mithyaa hae hanlan ahlu khoipyapaw kong lante, Galatia ram e khriccaawbuu hae kya kaw ka pya hae hawte nanning mah la cyihbua oh.Ref 16.1: Rom 15.25-26
2 He kae thua te, ahlu khoi aho vae khyh ccaw, lonaw takyh kyaze masaty nin khe nanning milu raveih nynh na mue oh paw thyhte ccangte la nung oh lah la ccy oh.
3 He kae thua te, ka ccaw te nae lasung kha Jerusalem lang cciakhae khylan nae nawccawpaw ccungccaw hae kha ka saw cih hae.
4 Kamaw ccia lan accan ze, minmin tuh ka kya a cceihbua cih hae.
Khuaccong lan Paccynkunaw
5 Atu Mesidonia ram kya po ka cceih koute nae kalan kae thua cih, pawccecize Mesidonia ram kya po ccia lan ka paccynkuh.Ref 16.5: Loc 19.21
6 Teitei lang ka ccia zemah, khua ka ccongnaw kya nae cciakhae ccaw oh, athua kho ze nae kya sosoh ka umbua kho, khuaccihsaw heize nae kya po ka um kho.
7 Pawccecize nae kalan cciapawte hung muihku kyalya te ka ry khyh; Bawipaw nynh yn ua ze, nanning ryte khaw umkheih lan ka ngaehoi.
8 Thuasalama Efesa khua kya Pentekos poi nin cia kae um ung cih.Ref 16.8: Lev 23.15-21; Deu 16.9-11Ref 16.8-9: Loc 19.8-10
9 Pawccecize athanepaw ryalaw elang akopaw thuakaw kha ka hanlan hungpya athua, rawsetu hae mah patae a um hae.
10 Nae kalan Timote yn thua ze, ri leite nae kya a umbua nawlan pe la ki oh; pawccecize aning tuh kamaw hawte Bawipaw rya a lahpaw nynh thua.Ref 16.10: 1Ko 4.17
11 Tukeiccuze hum nynh sanmah amaw kha dothatheih nan sah. Aning nynh ka kalan yn thua nawlan, khua a ccongnaw kya daebabi lan yn saw oh; pawccecize aning yn thua lanpaw kha kae te uno hae nynh phang kae ngaw.
12 Kae unopaw Apollos konglang tuh, uno hae ryte nae kalan yn cciabua nawlan thawte ka hopah zahmah, atu lya tuh kharouh cceihbua ry khyh; tuhzemah accyh yn ccanthya te yn cceih cih.
Nyathya Hyynaw Bya
13 Raeringkute lungkyhrarih lan um oh, zynnaw kya tynkaring lan thadyn oh, nae rawthung sah, nae thawsae sah.
14 Nanning nynh pawpaw balyn kha sungsakunaw te cyih oh.
15 Uteno hae, Stefanas a innbyn hae tuh Akhai ram kyaze masaty Khriccaaw hae thua hae zah, minmin tuh mithyaa hae ryalaw khylan mimaw te mimaw a pyakuh hae cipaw na ny oh.Ref 16.15: 1Ko 1.16
16 Khahcihawpaw ccungccaw hae te minmin ryte thawte rya a lahkheih hae paw miakaw kalan naemaw te naemaw kha na pyaku nawlan oh thawte kae ngia oh.
17 Stefanas, Fortunatas te Akhaikus oun thua hae paw kong ka lungtua; pawccecize nanning na um khyh lya oh kae kha yn bawm hae.
18 Pawccecize minmin nynh nae thaw ae muinsah oh hawte ka thaw yn muinsah bua hae. Tukeiccuze khahcihawpaw ccungccaw hae kha la luung oh.
19 Asia ram e khriccaawbuu hae nynh nanning kha ae beihlang oh. Akuila te Prisilla nynh mih inn kya apumkuhpaw khriccaawbuu ryte nanning kha Bawipaw kya thinlung ccaccingte ae beihlang oh.Ref 16.19: Loc 18.2
20 Uteno hae balyn nynh nanning kha ae beihlang oh. Lu kheit te lu kheit athyaapaw myngkunaw te byabeihkuh oh.
21 Kae, Paul nynh hynh-e beihlangnaw bya hynh kamaw ka kuih te nynh ka zei.
22 Humhung zemah Bawipaw a sungsah leipaw tuh thyalaw thua sah. Kae Bawipaw, yn thua ccavae!
23 Bawipaw Jesu thawccinaw tuh nae kya la um sah.
24 Khri Jesu kya kae sungsahnaw oh paw tuh nae balyn tungvaw kya la um vae sah. Amen.