15
Jesu Thoothuipaw
1 Uteno hae, phe kae hopya vae oh paw thehoypaw kha atu kya nysah thui kae ry oh; tuh-e thehoypaw tuh na lawkuh oh zah tuh-e kya na thadyn oh;
2 kae hopya oh paw bya kha nanning nynh accakaepaw kya zyn leite, varyng na kyngku oh ze, tuh-e thehoypaw liate khum na thua oh.
3 Pawccecize ka muepaw abyapi huapaw kha nae kalan kae hopya pathy oh, tuh-e tuh: Ccathyaa kya azeiku thyhte Khri tuh aening seinaw hanlan a chih,Ref 15.3: Isa 53.5-12
4 aning tuh uh hae zah Ccathyaa kya azeiku thyhte nin thumnaw kya thoothuisah athua,Ref 15.4: Sam 16.8-10; Mat 12.40; Loc 2.24-32
5 te Peter kya a langkuh koute a zuitu hae lu haw lae ning kya a langkuh cipaw kha nynh thua.Ref 15.5: Mat 28.16-17; Mar 16.14; Luk 24.34, 36; Joh 20.19
6 Tukoute uno hae za pangaw lae kyakhe ccyh kheit kya a langkuh. Tuh-e hae kyaze alunghua tuh a hiin ung hae, abang tuh a chih vae hae.
7 Tukoute James kya a langkuh, tukoute locceihtu hae balyn kya a langkuh.
8 Nyathyakou, ninsaw ccing leite a puipaw hawte athuapaw kamaw kya mah a langkuh.Ref 15.8: Loc 9.3-6
9 Pawccecize kae tuh Pachia khriccaawbuu kha a tuaa a sahpaw ka thua keiccuze locceihtu cite ko lan angaekuh bua leipaw, locceihtu hae lakuze anyaa huapaw nynh ka thua.Ref 15.9: Loc 8.3
10 Thuasalama Pachia thawccinaw liate kae tuh atu hawte ka thua kho zah, kae yn pyapaw a thawccinaw tuh alakawpaw lang tang khyh. ccangpaw locceihtu hae laeze ryalaw ka lahhua, tuhzemah kamaw ka lah khyh, ka kya a umpaw Pachia thawccinaw nynh thawte rya a lah.
11 Tukeiccuze kae thuasah, minmin thuasah tuhte phung kae ho zah nanning nynh na zyn oh.
A Chih hae paw Thoothuinaw
12 Atu lya Khri tuh chinaw kyate a thoothui cite ho athua ze, nanning lakuze abang nynh a chih hae paw tuh thoothuinaw um khyh cite pawtemou na ho kho oh?
13 A chih hae paw tuh thoothuinaw a um khyh lanze, Khri tuh thoothui khyh cinawpaw nynh thua;
14 Khri tuh a thoothui khyh lanze, kaening nynh phung kae hopaw tuh accakaepaw thua zah, nanning zynnaw mah accakaepaw nynh thua vae.
15 Kaening tuh Pachia kya-e ahme leipaw ccaekia hae lang nynh oun muih vae hae; pawccecize Pachia nynh Khri kha a thoosah vae cite kaening nynh Pachia kong ccaekia kae khan; a chih hae paw thoothui khyh hae cipaw tuh ahme lanze, Pachia nynh Khri kha thoosah khyh cinawpaw nynh thua.
16 Pawccecize a chih hae paw tuh a thoothui khyh hae ze, Khri tuh thoothui khyh.
17 Khri tuh a thoothui khyh ze, nae zynnaw tuh accakaepaw thua zah, nanning tuh nae seinaw kya nynh na um ung oh.
18 Khri kya a ih vae hae paw mah arohhang vae hae.
19 Aening nynh Khri kya ngaehoinaw ah hoi oh paw hynh hynh-e hiinnaw hanlan kyalya athua lanze, aening tuh ccungccaw hae balyn kyaze ngaethyaum huacce hae paw nynh ah thua cih oh.
20 Thuasalama Khri tuh chinaw kyate thoothui zah a chih vae hae paw kyaze masaty athae lang a tang vae.
21 Pawccecize ccungccaw lu kheit liate chinaw tuh yn thua hawte, a chih hae paw thoothuinaw mah ccungccaw lu kheit liate nynh yn thua.
22 Adam keiccu ccungccaw balyn a chi hae hawte, Khri liate ccungccaw balyn hiinsah athua cih hae.
23 Thuasalama ccungccaw miakaw mawmaw ccyh kya thoosahthui athua cih hae; Khri tuh masaty athae nynh thua, tukoute Khri he yn thua te, Khri a ccungccaw hae tuh a thoothui cih hae.
24 Tukoute laephi she athangnaw ccyh yn thua cih; Khri nynh uktu miakaw, kawhoitu hae te huhan hoitu miakaw kha a roh kou hae te, peenaw kha Paaw Pachia kalan a ap cih.
25 Pawccecize Pachia nynh rhaw hae balyn kha a ccuphe kaw a nung kou hae cia, Khri nynh a uk cih.Ref 15.25: Sam 110.1
26 Ro athua cih paw nyathyakou rhaw tuh chinaw nynh thua.
27 Pawccecize Ccathyaa kyaze, “Pachia nynh pawpaw balyn kha Khri ccuphe kaw a nung vae,” cite a um. Thuasalama, “Pawpaw balyn kha amaw zakaw a nung,” cite a hopaw kya, pawpaw balyn amaw zakaw a nungtupaw Pachia tuh pabua khyh cipaw alang.Ref 15.27: Sam 8.6
28 Pawpaw balyn tuh Khri zakaw kya nung he athua te, pawpaw balyn kha amaw zakaw a nungtupaw Pachia tuh tynre balyn kya tynre athua nawlan, Ccapaw amaw mah Paaw zakaw kya nung athuabua cih.
29 Tuhkhyh lanze, a chih hae paw ccelang baptisma a in hae paw tuh pawte cyih vae cih hae? A chih hae paw tuh a thoothui khyh hae ze, pawccemou minmin nynh a chih hae paw ccelang baptisma a in hae?
30 Pawccemou aening so accyh takyhte rinaw kya palei ah um oh?
31 Uteno hae, kae tuh nin takyhte ka chih! Nanning hanlan ah Bawipaw Khri Jesu kya ka pookunaw liate kae nynh hynhte ka honawpaw athua.
32 Ccungccaw cyisahnaw lante Efesa khua kyakhe sarepaw hae ryte kae douku zeso, ka hanlan pawmou athane cih? A chih hae paw tuh a thoothui khyh hae ze, byaphung kya a um hawte,
“Ae oh sih lah neih oh sih,
pawccecize awkhualan ah chih cih oh.” Ref 15.32: Isa 22.13
33 La lingsakuh nan oh:
“Ahoy leipaw ryte mungkupaw nynh
ahoypaw ziazae kha a rosah.”
34 Nae lungkyhsakuh ccavae oh lah, sei nan vae oh; pawccecize abang ccungccaw tuh Pachia na nyh khyh oh. E hynh nae maethya ccaw cite nynh ka ho.
Pyn Thoothuinaw
35 Thuasalama lukhakheit nynh, “A chih hae paw tuh pawtemou a thoothui cih hae? Pawcihawpaw pyn te mou oun langkuh cih hae?” cite a khia cih.
36 Mingaeepaw! Na tupaw ccacii tuh a chi khyh ze, hiin lan khyh.
37 Ccacii na tu vae ze, yn um lanpaw a pyn kha na tu khyh; chanvuih thuasah, ccangpaw ccacii thuasah ccacii maw kha nynh na tu.
38 Thuasalama Pachia nynh a ry hawte pyn kha a pya, ccacii miakaw kha amaw aphuin thyhte pyn kha a pya.
39 Ngesaw balyn tuh alokuhpaw ngesaw cci thua khyh; ccungccaw ngesaw tuh phuin kheit, sarangpaw hae ngesaw tuh phuin ccangpaw, ngasaw hae ngesaw tuh phuin ccangpaw, te pavaw hae ngesaw tuh phuin ccangpaw nynh thua.
40 Vaawlang te asekuhpaw pyn hae um zah laephi te asekuhpaw pyn hae mah a um; thuasalama vaawlang te asekuhpaw phu-enaw tuh phuin kheit thua zah laephi te asekuhpaw phu-enaw tuh phuin ccangpaw nynh thua.
41 Khuanin phu-enaw tuh phuin kheit, sawpaw phu-enaw tuh ccangpaw thua zah, awsi hae phu-enaw mah ccangpaw nynh thua; pawccecize awsi ccangkheit te ccangkheit mih phu-enaw tuh alae.
42 Tuh-e hawte nynh a chih hae paw thoothuinaw mah athua. Uu athuapaw pyn tuh rohthya zah a thoothuipaw pyn tuh rohthya vae khyh.
43 Uu athua lya tuh a thethah zah, he a thoothui tuh sawtuanaw a ccou. Uu athua lya tuh nyaa zah, he a thoothui tuh thungnaw te a beih.
44 Puikhaepaw pyn tuh uu athua, muisaw pyn tuh thosathui athua; puikhaepaw pyn um zah muisaw pyn a um.
45 Tukeiccuze Ccathyaa kyaze, “Masaty ccungccaw Adam tuh ahiinpaw ccungccaw lang yn tang,” cite azeikuh; nyathyakou Adam tuh hiinnaw a pyapaw muisaw nynh thua.Ref 15.45: Gen 2.7
46 Tuhzemah muisaw pyn hynh masaty thua khyh, puikhaepaw pyn nynh a umty, tukoute nynh muisaw pyn tuh a um.
47 Masaty ccungccaw tuh laephi kyate thua zah laenoi te raepaw nynh thua; lu ningnaw ccungccaw tuh vaawlang te yn thuapaw nynh thua.
48 Laenoi ccungccaw hae tuh laenoi te raepaw ccungccapaw hawte nynh thua hae; vaawlang e ccungccaw hae mah vaawlang te yn thuapaw ccungccapaw hawte nynh thua hae.
49 Aening tuh laenoi te raepaw ccungccapaw muinsan ah ke oh hawte, vaawlang te yn thuapaw ccungccapaw muinsan mah ah ke cih oh.
50 Uteno hae, e hynh kae hopya oh: chii te saw nynh tuh Pachia peenaw kha ccou kho lan khyh; aroh khopaw nynh aroh kho leipaw kha ccou kho lan khyh.
51 Ngaetua oh, byakhupaw ccangkheit kae hopah oh! Aening ah balynte marya chi lei lan, thuasalama aening balyn tuh
52 nyathyakou mungkae yn ccae te, sosohtari kya, mitsiphalah kya marya rulae ah thua cih oh. Pawccecize mungkae roi yn ccae cih zah a chih hae paw kha aroh kho leipaw lante thosathui athua cih hae zah aening tuh rulae ah thua cih oh.Ref 15.51-52: 1Th 4.15-17
53 Pawccecize hynh-e aroh khopaw pyn nynh aroh kho leipaw khate a ccaanku hahe ho zah, hynh-e a chih khopaw pyn nynh a chih kho leipaw khate a ccaanku hahe aho.
54 Tukeiccuze hynh-e aroh khopaw nynh aroh kho leipaw khate ccaankuh zah hynh-e a chih khopaw nynh a chih kho leipaw khate he a ccaankuh te,
“Chinaw tuh taenaw nynh
po a laang vae,”
cite azeikuhpaw Ccathyaa tuh accing vae cih.
55 “Pou chinaw, na taenaw tuh
teimou a um?
Pou chinaw, na zunghe tuh
teimou a um?”
56 Chinaw a zunghe tuh seinaw thua zah, seinaw a thungnaw tuh kawbya nynh thua.
57 Thuasalama ah Bawipaw Jesu Khri liate aening taenaw oun pyatupaw Pachia kya thehoynaw um sah.
58 Tukeiccuze ka sungsahpaw uteno hae, Bawipaw kya nae ryalaw tuh alakawpaw thua khyh cipaw na ny oh keiccuze tynkaring lan, nue kho um lei lante um oh lah, Bawipaw rya kha zungzae lah oh.