4
Peter te Johan Thongsaw hae
1 Peter te Johan nynh ccungccaw hae kya a hopya lya hae khe ranpibawi hae, beikinn ngawtu bawi te Sadusi hae tuh oun thua hae,
2 locceihtu hae nynh ccungccaw hae kha ccangpah hae zah Jesu kong a honaw hae kyakhe chinaw kyate thoothuinaw kong a ho hae keiccuze tuh-e hae tuh myarya mih lungvawsaw.
3 Tukeiccuze locceihtu hae kha kyng hae zah khua azi vae keiccuze awkhualan cia thong a saw hae.
4 Tuhzemah mih phunghopaw a thaepaw ccungccaw patae nynh a zyn hae; tuhte a zyn hae paw tuh milu lante thong pangaw loukaw acih hae.
5 Awkhualan khe uktu hae, piccan hae, kawbya sazae hae,
6 ranpibawi lupi Annas, Kaiafas, Johan, Alexanda te ranpibawi ciihan hae balyn tuh Jerusalem kya a tungkuh hae.
7 Minmin nynh Peter te Johan kha angaelung kya nung hae zah, “Paw thungnaw te mou, tuhkhyhze hum min liate mou hynh-e hynh na cyi oh?” cite a khia hae.
8 Peter tuh Thyaa Muisaw te phe beih zah minmin kha, “Ccungccaw uktu hae te piccan hae,
9 a ccukhoupaw ccungccapaw hanlan kae raepaw ahoypaw ryalaw keiccu thuasah, aning tuh pawtemou a dan cipaw keiccu thuasah atunin akaw-aleih bya nae khia oh athua ze,
10 nanning nynh vaelantung kya na khiade oh zah Pachia nynh chinaw kyate a thoosahpaw Nazareth khuapaw Jesu Khri min liate hynh-e ccungccapaw tuh nanning malang ngedante a thadyn cipaw hynh nanning balyn te Israel hae balyn nynh nyh oh.
11 Jesu kong kha Ccathyaa nynh,
‘Inn saktu hae nanning nynh
na nuee oh paw lung tuh
apaki lang e abyapi huapaw
lung lang yn tang,’ a ci.
12 Mingccangpaw kya khumnaw um khyh; pawccecize vaawlui zakaw e ccungccaw hae kya aening oun khum kho lanpaw ccangpaw min um khyh,” cite a hopya hae.
13 Minmin nynh Peter te Johan kya-e rawthungnaw kha muih hae zah minmin tuh ccawthya lei hae paw, ccungccaw huataw hae cipaw kha he a nyh hae tuh mih ngaeangthua. Minmin lu ning tuh Jesu ban hae cipaw kha bua a nythui hae.
14 Dansah athuapaw ccungccapaw nynh mih pe kya phang a thadynpaw kha a muih hae tuh, rawsenaw byaho ngan vae khyh hae.
15 Tukeiccuze locceihtu hae kha kungsi zung kyate pousah hae zah mimaw lalouhte bya a hokuh hae.
16 “E ccungccaw hae hynh pawte ah cyih cih oh? Minmin nynh raerae alangkuhpaw muihsahnaw kha a rae hae cipaw tuh Jerusalem kya um hae paw balyn nynh ccaerarih lan a ny vae hae; aening nynh tuh-e tuh ah ei kho vae khyh oh.
17 Thuasalama tuh-e tuh ccungccaw hae laku kya houh a pazaeku khyh nawlan, hynh-e min te hum sanmah a hopya vae khyh ccaw hae thawte khee oh sih,” cite a hoku hae.
18 Minmin nynh locceihtu hae kha ko hae zah Jesu min te kharouh a ho khyh nawlan hae te a ccangpya khyh nawlan hae kaw a pya hae.
19 Thuasalama Peter te Johan nynh, “Pachia kawngae laeze nanning kawngae hua lanpaw tuh Pachia malang akyh cih tou, kyh lan khyh tou cipaw naemaw nynh byapia oh;
20 pawccecize kaening tuh kae muihpaw te kae thaepaw kong kha ho leite kae um kho khyh,” cite a khung hae.
21 Minmin nynh locceihtu hae tungvaw detahnaw lanpaw pawsang a muih khyh hae keiccuze huraw hae zah a cciasah hae. Pawccecize tuh-e acyikuhpaw hanlan ccungccaw balyn nynh Pachia kha the a hoysah hae keiccu nynh thua.
22 Hynh-e dannaw muihsahnaw a raepya hae paw ccungccapaw tuh kum sung pali lae acih vae.
Zyntu hae Sawsangnaw
23 Peter te Johan tuh a lue kou hae te, mih ban hae kalan cceih hae zah ranpibawi lepaw hae te piccan hae nynh a hopya hae paw balyn kha a thaesah hae.
24 Minmin nynh tuh-e bya he a thae hae te, Pachia kalan pynkheihlan roisaw hae zah, “Bawipaw, nang tuh vaaw te laephi te rili te tuh-e hae kya umpaw miakaw a raetupaw nynh na thua.
25 Thyaa Muisaw kha mangte na ryalahtu kae minpaaw David kyate bya na ho zah:
‘Pawccemou minphuin hae nynh
mih bungpaw zah
ccungccaw hae nynh
accakaepaw kha a paccyn hae?
26 Laephi siapharan hae nynh
thadyn hae zah uktu hae nynh
Bawipaw te a Messiah kha
rawsete a pumnuaku hae,’ na ci.
27 Pawccecize Herod, Pontias Pilat, Zenta hae te Israel hae nynh chitui na thuh vae paw Athyaapaw na Ccapaw Jesu kha dou khylan hynh-e khua kya a pumnuaku hae,
28 na kuih te cyi lan na paccyn vae paw te na la khyaty vae paw miakaw kha ccingsah khylan tuhte a cyi hae paw nynh thua.
29 Pou Bawipaw, atu minmin kya-e hurawnaw hynh dotua. Na ryalahtu hae nynh na bya hynh rawhoyte kae ho kho nawlan rawthungnaw oun pyatua.
30 Ccinaw dansah khylan na kuih yn dyngtua, athyaapaw na Ccapaw Jesu min te muihsahnaw hae te ngaeangnaw hae kha rae khonaw beih oun pyatua,” cite saw a sang hae.
31 Saw a sang kou hae te, a sueluakunaw hae inn tuh ahy; te minmin balyn tuh Thyaa Muisaw te beih hae zah Pachia bya kha rawhoyte a ho hae.
Zyntu hae Uccaw Hoikheihnaw
32 Zyntu hae balyn tuh thinlung ccangkheit te tuanaw ccangkheit kyalya hoi hae zah hum nynh sanmah a uccaw hankhakheit kha ka uccaw nynh thua ci vae khyh; a hoi hae paw uccaw miakaw kha a mangkheih hae. Ref 4.32: Loc 2.44-45
33 Locceihtu hae nynh Bawipaw Jesu thoothuinaw kong kha myarya lepaw thungnaw huhan te ccaekiakhan hae zah myarya lepaw thawccinaw tuh mih balyn tungvaw kya a um.
34 Minmin kya ahoboupaw ccungccaw lu kheit san um khyh; pawccecize laephi hoi hae paw te inn hoi hae paw nynh tuh-e hae tuh zua hae zah, a zuanaw hae mee phua kha oun ccyng hae zah,
35 locceihtu hae cculeihpaw khe a pum hae; te lukhakheit hanlan ahobou thyhte ccungccaw miakaw kha a nee hae.
36 Locceihtu hae nynh Barnabas cite minphu hae paw, Saipras ram e Levi ciihan athuapaw Josef nynh
37 a hoipaw laephi kha zua zah a zuanaw mee phua tuh yn ccyng zah locceihtu hae cculeihpaw khe a nung. (Barnabas cipaw tuh ‘Thawzung pyanaw ccapaw’ cipaw nynh thua.)