3
Ccukhoupaw Dansahnaw
1 Nin kheit tuh Peter te Johan tuh zete suimilan ccangthum sawsang ccyh lyakhe beikinn lang a cceihthung hae.
2 A pui takaw te a ccukhoupaw lu kheit kha oun puih hae; beikinn lungkhu lang a tee hae paw kha phua ngiaku khylan ‘Puithya’ a ci hae paw sakoih pe khe tuh-e paw tuh nin takyh leih a nung hae.
3 Beikinn lungkhu lang tee lan a cih vae hae paw Peter te Johan kha tuh-e paw nynh he a muih hae tuh, ‘Yn pyabua oh,’ cite a ngiaku hae.
4 Peter te Johan nynh tuh-e paw tuh riri do hae zah, “Kaening hynh oun dotua,” a cipya.
5 Aning nynh minmin kyate ccangkhakheit ka mue vae cih cite ngaehoite minmin kha a do hae.
6 Peter nynh, “Phua te sui ka hoi khyh; thuasalama ka hoipaw kha kae pya; Nazareth khuapaw Jesu Khri min te thokuh lah cceih,” a cipya.
7 A ranglang kuih te kyng zah a tho; te vaekheihmawte a ccu te a ccumali hae tuh thawzung a mue hae.
8 Aning tuh thohkuh zah a thadyn, te cceih zah minmin ryte beikinn lungkhu lang a tee hae; laanpi cciate, thohkute Pachia kha the a hoysah.
9 Tuhte ccia biate Pachia thehoysah te a umpaw kha ccungccaw balyn nynh a muih hae.
10 Minmin nynh aning tuh beikinn kya-e Puithya Sakoihzung khe phua ngiaku lan leih a dahungpaw nynh thua cipaw a ny hae, a tungvaw kya acyikuhpaw kong kha mih khuaruaru zah mih ngaeangthua.
11 Tuh-e paw nynh Peter te Johan kyakhe phang a bekuh tuh ccungccaw balyn nynh myarya mih ngaeangthua zah minmin a umnaw hae Solomon Maepaw a ci hae paw maepaw langkhe a ccue hae.
12 Tuh-e tuh Peter nynh he a muih tuh ccungccaw hae kha, “Israel hae, pawccemou hynh-e hynh nae ngaeangthua? Hynh-e paw hynh kaemaw thungnaw te, Pachia phe kae zyn keiccuze kae cciasah khopaw hawte pawccemou mitvoh leite nae do oh?
13 Abraham, Isak te Jakob Pachia, ah minpaaw hae Pachia nynh a Ccapaw Jesu kha a phu-esah vae; nanning nynh tuh-e Jesu tuh Pilat kuih kalan na pya oh zah, Pilat nynh luesah lan he a noukuh tuh nanning nynh luesah lan phe na ei oh.
14 Nanning nynh Athyaapaw te Adingpaw kha na vua oh zah ccungccaw theihpaw kha nae kalan sawpya lan na ngiaku oh.
15 Pachia nynh chinaw kyate a thoosahpaw hiinnaw Bawipaw kha na chia oh. Tuh-e konglang te kaening tuh ccaekia hae nynh kae thua.
16 Jesu min zynnaw liate tuh-e Jesu min nynh na muih oh zah na ny oh paw hynh-e paw hynh a thawsaesah. Jesu zynnaw nynh hynh-e paw hynh nae balyn malang accingpaw dannaw kha a pya.
17 “Uteno hae, na ny khyh oh keiccuze nae uktu hae nynh a cyi hae hawte hynhte na cyibua oh cipaw ka ny.
18 Thuasalama langmaw lyaze Pachia nynh Messiah tuh a teing cih cite a profeh hae balyn kyate a hoty vae paw kha hynhte a ccingsahpaw nynh thua.
19 Tukeiccuze nae seinaw kha ngaethya athua nawlan ngaesikuh oh lah Pachia kalan paleihkuh oh;
20 tuhteze nynh Bawipaw kyate thawzung thawsahnaw ccyh yn thua cih zah nanning hanlan a poty vae paw Jesu Khri kha nae kalan yn saw cih.
21 Laephi thotakaw te Pachia nynh athyaapaw a profeh hae munglae kyate a ho vae paw uccaw balyn kha athaw lante raenaw ccyh athua mawlaezung Jesu tuh vaawlang khua kya a um cih.
22 Pawccecize Moses nynh ah minpaaw hae kyakhe, ‘Bawipaw nae Pachia nynh kamaw yn lopaw profeh lu kheit kha naemaw minphuin kyate nae hanlan yn pousah cih; aning nynh ae hopya oh paw miakaw kha na la ngae cih oh.
23 Tuh-e profehbya a ngae leipaw miakaw tuh Pachia minphuin kyate vua athua cih,’ a cipya hae.
24 Profeh Samuel kyate tho zah amaw koute oun thua hae paw profeh hae balyn nynh mah hynh-e nin hae kong hynh a hoty hae.
25 Nanning tuh profeh hae ciihan nynh na thua oh, Pachia nynh Abraham kha, ‘Na ciihan liate laephi vaw e minphuin balyn tuh hythuanaw a ccou cih hae,’ cite hopah zah, nae minpaaw hae kya a la raepaw byakinnaw te asekuh hae paw nynh na thua oh.
26 Nanning milu raveih nynh nae hoyleinaw kyate na paleihkuh oh zah hythuanaw na ccou nawlan oh, Pachia nynh a Ccapaw Jesu kha thoosah zah masaty nae kalan yn saw,” cite Peter nynh a hopya hae.