20
Mesidonia te Grik lang Paul A Cceih
1 Tuh-e byalungnaw adae koute Paul nynh zuitu hae kha ko hae zah thawpyanaw bya hopyate a beihsya kou hae te, Mesidonia ram lang a cceih.
2 Tuin ram hae kya khua po ccong zah zyntu hae kha thawzung pyanaw bya patae a hopah kou hae te, Grik ram kya a thua,
3 tuin kya sawpaw sah thum a um. Siria ram lang sanphalung te ccia lan vae cite a nouku lyakhe Judah hae nynh aruh lante phee lan a paccynnuaku hae, tukeiccuze Mesidonia ram langte ki lan a tuakuh.
4 Berea khuapaw Pirras ccapaw Sopater, Thesalonika khuapaw Aristarkhas te Sekundus, Derbe khuapaw Kaias te Timote, te Asia ram e Taikhikas te Trofimas tuh Paul kya Asia ram lang a cceihbua hae.
5 Minmin tuh malang la cceih ty hae zah Troas khua kya kaening kha oun la ngaw hae.
6 Ransi phing leipaw Sanlou Poi athang koute kaening tuh Filipi khua kyate sanphalung te kae cceih zah nin pangaw cihte minmin umnaw hae Troas khua kya kae thua, tuin kya nin sari kae um.
Troas Khua kya Paul
7 Lonaw kyaze masaty nin kyakhe kaeningnote20.7 Abang Ccathyaa kya ‘zuitu hae’ cite a um. tuh zerya mangkheih khylan kae sueluakuh; Paul tuh awkhualan thoku lan a nouku vae keiccuze minmin kha ziraccyng cia phung hopah hae zah a ccangpah hae.
8 Palung khaan kae pumkunaw kya maeekhua patae a aw hae.
9 Utikhas a ci hae paw ccangvaepaw tuh thanlan-aw kin kya dahung zah, Paul nynh khaw cia phung he a ho tuh a ngawphukuh; te marya a itheih keiccuze khang thumnaw kyate laekhu lang ccah zah a chihpaw kha a khuin hae.
10 Paul nynh rungbung zah tuh-e paw tuh a bakhung thin koute varyng pom zah, “Nae bungzou nan sah, mang a hiin,” a ci.
11 Paul tuh palung khaan lang kaethung zah sanlou kha eih zah a ae hae, khua phe dae lang khaw cia bya a ho koute a pou.
12 Tuh-e ccangvaepaw tuh a hiin te cciakhae hae zah myarya mih ngaengan.
Miletas lang Paul Khuaccong
13 Kaening tuh sanphalung kalan kae cceih lalo zah Assos khua lang sanphalung te kae cceih, tuin khua kya-e Paul kha kopaw lan cite kae noukuh; pawccecize aning tuh mua langte ccia lan a tuaku vae keiccuze tuhcite a paccynpaw nynh thua.
14 Assos khua kya aning ryte he kae tungkuh te, sanphalung kalan kae hoeibua zah Mitylen khua lang kae cceih.
15 Tuin kyate sanphalung te kae cceih zah awkhualan tuh Khios tuikoih te arawsekunaw kya kae thua. Sarukheih tuh Samos tuikoih kya kae thua,note20.15 Abang Ccathyaa kya, ‘Trokilliam tuikoih pe kae haeung,’ cite a umbia. te ccangpaw nin kya Miletas khua kae thua.
16 Paul nynh Asia ram kya khaw aro ry khyh pawte Efesa khua kha po sulue lante a tuaku. Athuathya ze Pentekos Nin tuh Jerusalem kya thua lan a ry.
Efesa Piccan hae Byatawnaw
17 Paul nynh Miletas khua kyate Efesa khua lang ccungccaw saw zah khriccaawbuu kya-e piccan hae kha a kosah hae.
18 Minmin nynh a kalan he oun thua hae tuh, Paul nynh, “Asia ram lungkhu lang kae thua takaw nin kyate nae kya ka um lungkhu balyn pawtemou ka um cipaw na ny oh,
19 myarya zakawsangsakute, mitphi luate, Judah hae nynh yn phee hae keiccu ka tungvaw yn thuapaw syntawnaw patae kha teing biate Bawipaw rya ka lawpaw kha na ny oh.
20 Nae hanlan athane lanpaw kha pawsang mah ka thuruh bang khyh, ccungccaw zapi kya thuasah, inn kheit koute inn kheit thuasah kae hopah oh zah kae ccangpya oh.
21 Pachia kalan ngaesikunaw kong te ah Bawipaw Jesu kya zynnaw kong kha Judah hae kalan te Grik hae kalan ccaekia ka khanpaw kha na ny oh.
22 Atu lya kae tuh Muisaw cciakhaenaw kha zuite Jerusalem lang ka cceih cih, tuin kya ka tungvaw paw nynh yn cyihkuh cih cipaw ka nyh khyh.
23 Thongccawnaw te tuaasahnaw nynh kae kha phang yn ngaw cite Thyaa Muisaw nynh khua takyh kya raeringnaw yn pyapaw rou nynh ka ny.
24 Thuasalama Pachia thawccinaw te asekuhpaw thehoypaw kha ccaekiakhan khylan Bawipaw Jesu kyate ka muepaw ka ryalaw kha ka lyn kho nawlan ka hiinnaw mah ka duakuh vae khyh.Ref 20.24: 2 Tim 4.7
25 “Atu ka cceih bungthung zah Pachia peenaw kong kae hopya oh paw nanning balyn nynh ka mae hynh nae muih vae lan khyh oh cipaw ka ny.
26 Tukeiccuze kae tuh ccungccaw balyn chii kyate ka thyaa cipaw atunin nae kya ccaerarih lan kae thaesah oh.
27 Pawccecize Pachia paccynnaw balyn kha nae kalan phy lan ka synkuh khyh.
28 Tukeiccuze naemaw te naemaw kha raeringkute do-oihkuh oh lah, Pachia nynh a Ccapaw chii te a repaw Pachia khriccaawbuu kha do-oih khylan Thyaa Muisaw nynh nanning kha do-oihtu lang ae khangnua oh paw tuuphu hae balyn kha mah raeringte do-oih oh.
29 Pawccecize ka cceih koute arepaw suizaw hae nynh tuuphu hae kha ngaethyaumsah leite nae laku lang oun tee cih hae cipaw kha ka ny.
30 Zuitu hae kha mih kalan soih khylan hynbya a hopaw ccungccaw abang kha naemaw kyate heize oun langkuh cih hae.
31 Tukeiccuze raeringkuh oh lah, kum thum lungkhu khuazi khuadae mitphi ryte ccungccaw miakaw raeringnaw pya khylan ka dae khyhpaw kha la liathui oh.
32 Uteno hae, atu nanning kha Pachia kalan te a thawccinaw bya kalan kae ap vae oh; tuh-e bya nynh nanning kha ae lethungsah kho oh zah thyaasah athua vae hae paw balyn ryte rho kha ae pya kho oh.
33 Kae tuh milae kya-e phua, sui te boeining mah ka duaa khyh.
34 Kamaw ka kuih te rya ka lah zah kamaw te ka ban hae elang ahoboupaw kha ka poukhae cipaw tuh naemaw ccaccei nynh na ny oh.
35 Tuhcite atyn-are kya thawte ryalaw lan zah anyaa hae paw kha bawm lan hae cipaw tuh marya kae muihsah vae oh; Bawi Jesu nynh, ‘Muenaw kya laeze pyanaw kya hythuanaw a umhua,’ a cipaw bya kha la liathui oh,” cite a hopya hae.
36 Paul nynh tuhte a ho koute a ccukharutung zah minmin balyn ryte saw a sang hae.
37 Minmin balyn tuh thawmawte a rah hae; Paul kha pom hae zah a myng hae.
38 Kae hynh nae muih vae lan khyh oh, cite a hopaw bya keiccuze mih ngae houh athah. Te Paul kha sanphalung kyacia a dohaw hae.