19
Efesa Khua kya Paul
1 Apollos tuh Korin khua kya a um lyakhe, Paul tuh tuin ram lungkhu kya khua po ccong zah Efesa khua kya a thua, tuin kyakhe zuitu hae abang kha muih hae zah,
2 “Zyntu lang he na tang oh te, Thyaa Muisaw na mue vae oh tou?” cite a khia hae. Minmin nynh, “Thyaa Muisaw a um cipaw sanmah kae thae boi khyh,” cite a khung hae.
3 Paul nynh, “Tuhteze pawcihawpaw baptisma mou na in oh?” cite a khia hae. Minmin nynh, “Johan kya-e baptisma,” a ci hae.
4 Paul nynh, “Johan nynh tuh ngaesikunaw te asekuhpaw baptisma kha pya hae zah amaw koute yn thua cih paw kha a zyn nawlan hae ccungccaw hae kha a hopya hae, tuh-e paw tuh Jesu nynh thua,” a cipya hae.Ref 19.4: Mat 3.11; Mar 1.4, 7-8; Luk 3.4, 16; Joh 1.26-27
5 Tuh-e bya he a thae hae te, Bawipaw Jesu min te baptisma a in hae.
6 Paul nynh minmin tungvaw a kuih he a khang tuh, mih tungvaw kya Thyaa Muisaw yn thua; te minmin tuh bya ccangpaw te ho hae zah profehbya a ho hae.
7 Tuh-e hae tuh mih balynte lu haw lae ning loukaw acih hae.
8 Paul tuh sinakok kalan tee zah sawpaw sah thum cia rawhoyte a hopya hae, Pachia peenaw kong kha hokhae hae zah a hyy hae.
9 Thuasalama ccungccaw abang tuh mih lungkhung zah zyn khyh hae, minmin nynh ccungccaw zapi malang khe Bawipaw Laanpi kong kha thethya he a ho hae tuh, Paul nynh minmin kha cciataw hae zah zuitu hae kha a hoeibua hae, te Tirannas a ci hae paw siainn kyakhe nin takyh a ccangpya hae.
10 Tuhcite kum ning lungkhu a cyi keiccuze Asia ram a um hae paw Judah hae te Grik hae balyn nynh Bawipaw bya kha a thae hae.
11 Pachia nynh Paul kha mangte acyihkuh boi leipaw ngaeangnaw hae kha a rae.
12 Paul a pyn kya-e pavua hae tuhkhyhze taeccia uccaw kha ngeccih hae kalan ccyngpah hae zah mih ccinaw tuh a dan hae, te ahoy leipaw muisaw hae mah a toikuh hae.
13 Ahoy leipaw muisaw hae a deethya hae paw, a khiavuikuh hae paw Judah hae abang nynh, “Paul nynh a hopaw Jesu liate nanning kha kae dee oh,” cite ahoy leipaw muisaw hae nynh a ccungnua hae paw tungvaw khe Bawipaw Jesu min kha mang lan a zuaku hae.
14 Judah ranpibawi lupi Skeva cikuhpaw a ccaaw hae lu sari nynh tuhte a cyihbua hae.
15 Ahoy leipaw muisaw nynh, “Jesu tuh ka nyh, Paul mah ka nyh; thuasalama nanning tuh hum hae mou na thua oh?” cite a khung hae.
16 Ahoy leipaw muisaw bahkuhpaw ccungccapaw nynh minmin tungvaw thohnuakuh hae zah phe a tae hae keiccuze tuh-e inn kyate mih sasete ccue hae zah vaemaw a muebia hae.
17 Tuh-e kong tuh Efesa kya um hae paw Judah hae te Grik hae balyn nynh he a thae hae tuh, rih hae zah Bawipaw Jesu min kha the a hoysah hae.
18 Zyntu hae patae oun thua hae zah mih cyisahnaw kha langsakute a phyku hae.
19 Mitleihthya hae paw patae nynh mih ccauh hae kha suelua hae zah zapi malang khe maee te a soi hae; tuh-e ccauh hae mee tuh tuaa hae zah ngunphuanote19.19 Ngunphua phe kheit tuh ccungccaw lu kheit nin kheit ninro mee nynh athua. thong sung pangaw mee acih cipaw a muih hae.
20 Tuhcite Pachia bya tuh a thaw houhouh sae zah taenaw a mue.
21 Hynh-e hae acyikuh koute, Paul nynh Mesidonia ram te Akhai ram lang khua po ka ccong koute Jerusalem lang ka sulue cih cite a noukuh. Aning nynh, “Tuhlang ka cceih koute Rom khua mah ka muih hahe aho,” a ci.
22 Tukeiccuze amaw a bawmtu hae lu ning, Timote te Erastas kha Mesidonia ram lang saw hae zah, amaw tuh Asia ram kya sosoh a umhy ung.
Efesa Khua kya Byalungnaw
23 Tuh ccyh lyakhe Bawipaw Laanpi konglang te myarya lepaw byalungnaw a um.
24 Pawccecize Demetrias a ci hae paw phualaeetupaw lu kheit nynh Artemis khozinung kya-e beikinn zohtuh hae kha rae zah phualaeetu hae kha patae leih a muesah hae.
25 Tuh-e paw nynh phualaeetu hae te tuhcihawpaw rya a lah hae paw kha ko hae zah, “Uteno hae, hynh-e ryalaw kyate nynh sisua ah mue oh cipaw na ny oh.
26 Hynh-e Paul nynh, ‘Kuih te raepaw tuh pachia thua khyh,’ cite ho zah Efesa khua kya kyalya thua leite Asia ram balyn mah ccungccaw patae kha soih hae zah a paleihsaku hae paw kha mah na muih oh zah na thae oh.
27 Tukeiccuze aening ryalaw hynh a min yn thu cih cipaw kyalya thua leite, alesaepaw khozinung Artemis kya-e beikinn mah pawlang oun ria vae lan khyh hae zah Asia ram balynte laephi nynh a beik hae paw khozinung a lesaenaw mah yn zo vae cih cipaw mah thinphang lan a um,” cite a hopya hae.
28 Minmin nynh tuh-e bya he a thae hae tuh, myarya mih bungpaw zah, “Efesa hae kya-e Artemis tuh myarya alesae!” cite a sia hae.
29 Khualae balyn tuh byalungnaw te phe abeih; ccungccaw hae nynh Paul ryte khua a ccongkheih hae paw Mesidonia ccungccaw hae Kaias te Aristarkhas kha kyng hae zah poi donaw inn lungkhu langkhe po a teekhae hae.
30 Paul nynh zapi hae kalan teebua lan ry salamah zuitu hae nynh ua khyh hae;
31 Asia ram kyaze uktu bawi athua hae paw, Paul a ruiban hae abang nynh poi donaw inn lungkhu lang a phungkuh bua khyh nawlan Paul kalan ccungccaw saw hae zah a soihbia sah hae.
32 Ccungccaw a sueluakuh hae paw tuh keisukeilae pong a um keiccuze abang nynh ccangte sia hae zah, abang nynh phuinccangte a sia hae; ccungccaw alunghua tuh paw keiccu nynh kae sueluaku cipaw mah nyh tutae khyh hae.
33 Judah hae nynh Alexanda kha malang a toisaku hae keiccuze ccungccaw abang nynh hynh-e byalungnaw a pousahtu hynh Alexanda nynh athua cih cite a tua hae. Te Alexanda nynh zya a dae nawlan hae a kuih te tangpah hae zah ccungccaw hae malang khe amaw athua khyhnaw kong ho lan a zuaku.
34 Thuasalama minmin nynh aning tuh Judah paw cipaw he a nyh hae tuh, mih balynte, “Efesa hae kya-e Artemis tuh myarya alesae!” cite suimilan ccangning loukaw cia ngingtenging lan a sia hae.
35 Khua ccazipaw nynh ccungccaw hae kha a daesah kou hae te, “Efesa khuaccaaw hae, Efesa khua tuh alesaepaw Artemis khozinung a beikinn te vaawlang te yn ccahpaw zohtuh a rintupaw khua nynh thua cipaw a nyh leipaw hummou a um?
36 E konglang hynh ei kho leipaw athua keiccuze daebabi lan um oh lah, tuaty leite pawsang mah cyih nan oh.
37 Pawccecize beikinn uccaw mah lawde khyh hae zah nae khozinung mah thethya a ho lei hae pite hynh-e ccungccaw hae hynh hynhlang nae thuakhae oh.
38 Tukeiccuze Demetrias te a umkheih hae paw phualaeetu hae nynh lukhakheit tungvaw byalungnaw a hoi hae ze, byapianaw zung um zah mangki bawi hae mah a um hae; mimaw te mimaw tuh-e zung kya kaethekuh hae sah.
39 Thuasalama ccangpaw kong na ho ry oh paw a um ze, aphung thyhte khuaccaaw hae pumkunaw kya byapae lanpaw nynh thua.
40 Pawccecize atunin e byalungnaw keiccuze aening hynh oun kaethe cih hae cipaw ri lan a um, pawccecize hynh-e siaruanaw kyahin aening hanlan daangsaku khonaw laanpi um khyh,” a ci.
41 Tuhte a ho koute a pumkuh hae paw kha a pousah hae.