15
Jerusalem Kungsi
1 Judea ram kyate Antiok khua lang oun thua hae paw ccungccaw abang nynh zyntu uno hae kha, “Moses phungbya thyhte vingdungaw na thua khyh oh ze, khum na thua kho lan khyh oh,” cite a ccangpya hae.Ref 15.1: Lev 12.3
2 Tukeiccuze Paul te Barnabas tuh tuh-e hae ryte myarya lepaw lungloku leinaw hoi hae zah a eikuh hae, tukeiccuze Paul, Barnabas te ccangpaw ccungccaw abang kha Jerusalem lang cciasah lan hae zah tuh-e konglang tuh locceihtu hae te piccan hae ryte hotua lan bya a pae hae.
3 Khriccaawbuu nynh saw hae zah Foenisia te Samaria ram kya po a ccia lya hae khe, Zenta hae mih lungpaleihkunaw kong kha a hopya hae; zyntu hae balyn kha myarya mih lungtuasah hae.
4 Jerusalem he a thua hae te, locceihtu hae, piccan hae te khriccaawbuu nynh minmin kha a cciadue hae, te Pachia nynh minmin mangte rya a lawpaw balyn kha a hopya hae.
5 Thuasalama Farasi hae phu kya-e zyntu hae abang nynh thadyn hae zah, “Zenta hae tuh vingdungawku ho zah Moses Kawbya zui lan ccangpya hae aho,” cite a ho hae.
6 Locceihtu hae te piccan hae tuh tuh-e kong tuakheih lan a sueluakuh hae.
7 Eikunaw patae a um koute Peter nynh thadyn zah, “Uteno hae, Zenta hae nynh thehoypaw a thae nawlan hae te a zyn nawlan hae, anulang lyakhe nanning laku kyate Pachia nynh kae kha yn po cipaw na ny oh.Ref 15.7: Loc 10.1-43
8 Thinlung a nyhpaw Pachia nynh Thyaa Muisaw kha aening oun pya hawte minmin kha mah pya hae zah minmin hanlan ccaekia a langsah.Ref 15.8: Loc 2.4, 10.44
9 Zynnaw liate Pachia nynh mih thinlung kha thyaasah hae zah, aening te minmin laku laesahnaw umsah khyh.
10 Tukeiccuze atu ah minpaaw hae te aening nynh ah phu kho lei oh paw phupaw kha zuitu hae raw vawlan khangte pawccemou Pachia kha na syntawtua oh?
11 Thuasalama Bawipaw Jesu Khri thawccinaw liate minmin tuh khum athua hae hawte aening mah khum ah thua cih oh cite ah zyn oh,” a cipya hae.
12 Te ccungccaw zapi balyn tuh daebabi lan um hae zah, Barnabas te Paul nynh mimaw kha Pachia nynh mangte Zenta hae laku kya muihsahnaw hae te ngaeangnaw hae a langsahkupaw kong a ho hae paw kha a ngae hae.
13 Minmin nynh bya a ho kou hae te, James nynh tho zah, “Uteno hae, ka bya hynh yn ngaepya tua oh:
14 Pachia nynh amaw min hanlan Zenta hae kyate ccungccaw abang kha po khylan Zenta hae kalan masaty a paebuanaw kong kha Simeon nynh phe a ho vae.
15 Tuh-e bya te profeh hae bya tuh phe lokuh; Ccathyaa kyaze:
16 ‘Hynh-e koute ka ki cih zah
phe a pu vae paw David bu kha
ka sakthui cih, tuh-e aronahpaw kha
ka sakthui cih zah
bua ka thadynsah cih,Ref 15.16-18: Amos 9.11-12 (LXX)
17 tuhteze nynh ccangpaw
minphuin hae balyn te
ka min te ko athua hae paw
Zenta hae balyn nynh
Bawipaw kha a ccung cih hae.
18 Laephi thotakaw te hynh-e bya oun nysahtu Bawipaw nynh a ci,’ cite azeikuh.
19 Tukeiccuze ka ho rypaw tuh, Pachia kalan oun paleihkuh hae paw Zenta hae kha vawsaw pya nan oh sih.
20 Thuasalama zohtuh hae kalan pyapaw looh anungsikuhpaw kha thuasah, nopi pise seinaw kha thuasah, nging-ote a chia hae paw kha thuasah, chii kha thuasah minmin nynh a sung nawlan hae aening nynh ccaw ky oh sih.Ref 15.20: Exo 34.15-17; Lev 17.10-16, 18.6-23
21 Pawccecize langmawlya mawte Moses kawbya kha khua takyh kya ho thua zah, sinakok hae kyakhe sabbath nin takyh a kawbya tuh ria athua,” a ci.
Zenta Zyntu hae kalan Ccaky
22 Te locceihtu hae, piccan hae te khriccaawbuu pynpi nynh mih memba hae lungkhu e pise hae kha po hae zah Paul te Barnabas ryte Antiok khua lang saw lan bya a pae hae. Uno hae lakuze cciakhaetu athua hae paw Barsabbas a ci hae paw Judas te Silas kha
23 akawlan e ccaw hynh phusahte a saw hae: “Nae uno hae kae thuapaw kaening locceihtu hae te piccan hae nynh Antiok khua, Siria ram te Silisia ram kya na um oh paw thokeinaw lante Zenta na thua oh paw zyntu hae kha kae beihlang oh!
24 Kaw kae pya lei hae te kae kyate oun cceih hae paw ccungccaw abang nynh mih bya te vawsawnaw ae pya oh zah nae lungria ae thaesah oh cite kae thae.note15.24 Abang Ccathyaa kya tuh, ‘Vingdung na awku oh ho zah kawbya na zui oh aho,’ cite a umbia.
25 Tukeiccuze locceihtu hae kha po lan zah tuh-e hae tuh kae sungsah hae paw Paul te Barnabas ryte nae kalan saw lan hae cite kae balynte bya kae pae.
26 Minmin tuh ah Bawipaw Jesu Khri min hanlan mih hiinnaw a pyakuh ngan hae paw nynh athua hae.
27 Tukeiccuze Judas te Silas kha nae kalan kae saw hae, minmin nynh ccaw kya kae zeipaw konglang kha mih mung te ae la hopah cih oh.
28 Akawlan e ahoboupaw phung hae laelan ccangpaw phupaw kha nae tungvaw khang lanpaw tuh Thyaa Muisaw te kaening nynh kae ry vae khyh.
29 Tuh-e ahoboupaw phung hae tuh: zohtuh hae kalan silawnaw hae paw looh thuasah, chii thuasah, nging-ote a chia hae paw saw thuasah, nopi pise seinaw thuasah nanning nynh la sungkuh oh. Tuh-e hae tuh na sungku oh ze, kou ahoypaw nynh thua. Ngedante,” cite a zei hae.
30 Tuhte minmin kha saw hae zah Antiok khua a thua hae; ccungccaw zapi kha suelua hae zah ccaky kha a pya hae.
31 Tuh-e ccaw he a ria hae tuh, thawzung pyanawpaw bya athua keiccuze mih lungtua.
32 Judas te Silas tuh profeh hae athua hae keiccuze zyntu hae kha bya patae hopyate thawzung pya hae zah mih lungthaw a saesah hae.
33 Minmin tuh tuin kya ccyh khuekheih a um kou hae te, zyntu hae nynh a sawtu hae kalan ngaengante a kisah hae.
34 Tuhzemah Silas tuh tuin kya a umhy.note15.34 Abang Ccathyaa kya tuh, ‘byatue 34’ hynh um khyh.
35 Paul te Barnabas tuh Antiok khua kya um hae zah mingccang hae patae ryte Bawipaw bya kha ccangpah hae zah a hopya hae.
Paul te Barnabas Phiakunaw
36 Nin beihtaraw aro koute Paul nynh Barnabas kha, “Bawipaw bya ah honaw khua takyh kya um hae paw zyntu hae nynh pawtemou a um hae cipaw dotua khylan bua cceih sih lah paebua sih,” a cipya.
37 Barnabas nynh Marka a ci hae paw Johan kha mih kya hoeibua lan a ry.
38 Thuasalama Pamfilia ram kya minmin kha kitaw hae zah ryalawnaw kalan mih kya a cceihbua vae leipaw Marka kha hoeibua lan ccan khyh cite Paul nynh a tua.Ref 15.38: Loc 13.13
39 Tuhte minmin laku lungloku leinaw tuh myarya le zah phe a phiakuh hae; Barnabas nynh Marka kha hoeikuh zah Saipras tuikoih kalan sanphalung te a cceih hae.
40 Paul nynh Silas kha pokuh zah zyntu hae nynh Paul kha Bawipaw thawccinaw kalan a ap kou hae te, a cceih hae.
41 Paul tuh Siria ram te Silisia ram lang po cceih zah khriccaawbuu hae kha thawzung a pya hae.