14
Ikonium kya Paul te Barnabas
1 Ikonium khua kya minmin lu ning tuh parouhte Judah hae sinakok lungkhu lang tee hae zah phung a ho hae; Judah hae te Grik hae patae tuh zyntu lang a tang hae.
2 Thuasalama a zyn leipaw Judah hae nynh Zenta hae kha tuhou hae zah uno hae kha rawsete a huasah hae.
3 Tukeiccuze locceihtu hae tuh khaw cia um hae zah Bawipaw hanlan rawhoyte bya a ho hae, Bawipaw nynh a thawccinaw bya hanlan ccaekia pya hae zah, muihsahnaw hae te ngaeangnaw hae kha minmin kyate a langsaku.
4 Khualae e ccungccaw hae tuh thoh phiakuh hae, abang tuh Judah hae kalan pan hae zah abang tuh locceihtu hae kalan a pan hae.
5 Zenta hae te Judah hae nynh mih uktu hae ryte locceihtu hae kha zia lan te lung te deih lan a zuaku hae,
6 tuh-e tuh locceihtu hae nynh nyh hae zah Likaonia ram kya umpaw Lystra khua, Derbe khua te tuin pepan e khua hae kalan a ccue hae.
7 Tuin kya thehoypaw kha a ho hae.
Lystra kya Paul A Deih hae
8 Lystra khua kyakhe a pui takaw te a ccukhoupaw, laanpi kharouh cceih boi leipaw lu kheit tuh a la dahung.
9 Paul nynh a hopaw bya kha aning nynh a ngae. Paul nynh tuh-e paw tuh riri do zah, phe a dan lan ciate zynnaw a hoi cipaw he a nyh tuh,
10 “Thokuh lah lawbabin lan thadyn,” cite roi accae lante a hopya. Tetuh tuh-e paw tuh thokuh zah laanpi a cceih.
11 Paul nynh a cyipaw kha ccungccaw hae nynh he a muih hae tuh, mimaw Likaonia bya te, “Ccungccaw muinsan hawte pachia hae nynh aening kalan oun rungbung hae!” cite a sia hae.
12 Minmin nynh Barnabas kha Zeus cite ko hae zah Paul tuh phunghotu lupi athua keiccuze Hermes cite a ko hae.
13 Tuh-e khua atolang umpaw beikinn a hoitu Zeus a ranpibawi nynh tangnuapaw hae te haetapawsi hae kha koikua kalan yn cciakhae; pawccecize aning te ccungccaw zapi nynh locceihtu hae kalan silawkunaw rae lan a ry hae.
14 Tuh-e tuh locceihtu hae Barnabas te Paul nynh he a thae hae tuh, mih boeining kha seii hae zah ccungccaw hae laku lang ccue hae zah,
15 “Ruiban hae, pawccemou hynhte na cyi oh? Kaening tuh naemaw hawte ccungccaw hae nynh kae thua, nanning nynh hynh-e accakaepaw uccaw hae kyate vaaw te lae te rili te tuh-e hae kya a umpaw balyn a raetu, a hiinpaw Pachia kalan na paleihku oh ccaw cite nae kalan thehoypaw kae hopaw nynh kae thua.Ref 14.15: Exo 20.11; Sam 146.6
16 Langmawlya tuh Pachia nynh minphuin hae balyn kha mih rythyte um lan a la ua hae.
17 Tuhzemah ahoypaw a raenaw kyakhe amaw a um cipaw kha ccaekia langsaku leite um khyh, nanning elang vaawlang te khuaarawsah zah thingthae-eccang a pousahpaw kumvaelori kha ae pya oh, looh ae bynsah oh zah nae thinlung kha lungtuanaw te ae biasah oh,” cite thawmawte a sia hae.
18 Tuh-e bya tuhte locceihtu hae nynh mimaw kalan silawnaw a rae khyh nawlan hae ccungccaw zapi kha kou ru lante a khee kho hae.
19 Antiok te Ikonium khua hae kyate Judah hae abang tuh tuhlang oun thua hae zah ccungccaw zapi kha mih kalan a pansah kho hae. Paul kha lung te a deih hae, a chih vae cite tua hae zah khua atolang khe a sue hae.
20 Thuasalama zuitu hae nynh phang a koihlu lya hae khe, Paul tuh thokuh zah khualae lang bua a tee. Awkhualan tuh Barnabas ryte Derbe khua lang a cceih hae.
Antiok Khua lang Kinaw
21 Paul te Barnabas nynh tuin khua kya thehoypaw ho hae zah ccungccaw patae kha zuitu lang a tangsah hae, minmin tuh Lystra khua, Ikonium khua te Antiok khua lang a ki hae.
22 Zuitu hae thinlung kha thawzung pyate, zynnaw kya po atyn nawlan hae hyy hae zah, “Aening tuh tuaasahnaw patae tung biate nynh Pachia peenaw lungkhu lang ah tee cih oh,” cite a hopya hae.
23 Khriccaawbuu takyh kya piccan hae kha khang hae zah looh-ae sungte saw a sang kou hae te, a zyn hae paw Bawipaw kalan khe tuh-e piccan hae tuh a ap hae.
24 Minmin nynh Pisidia ram kha po a lesakuh kou hae te, Pamfilia ram lang a thua hae.
25 Perga khua kya Bawipaw bya a ho kou hae te, Attalia khua lang a cceihbung hae.
26 Tuin kyate Antiok khua lang sanphalung te a ki hae; Antiok khua tuh a lyn vae hae paw ryalaw hanlan Pachia thawccinaw kalan a apnaw hae khua nynh thua.
27 Antiok khua a thua hae te, khriccaawbuu hae kha suelua hae zah Pachia nynh minmin ryte rya a lawpaw balyn kha thuasah, Zenta hae elang zynnaw thuakaw a hungpya hae paw kong kha thuasah a hopya hae.
28 Minmin tuh zuitu hae ryte tuin kya khaw cia a umkheih hae.