11
Peter te Jerusalem Khriccaawbuu
1 Judea ram kya um hae paw locceihtu hae te zyntu hae nynh Zenta hae mah Pachia bya a lawkuh bua vae hae cipaw a thae hae.
2 Peter tuh Jerusalem kya he yn thua tuh, vingdungawkuh hae paw nynh,
3 “Nang tuh vingdungawkuh leipaw ccungccaw hae kalan na cceih zah minmin ryte na aekheih oh,” cite a seisah hae.
4 Thuasalama Peter nynh tuh-e konglang tuh athonaw te athangnaw cia hynhte a hopya hae:
5 “Joppa khua kya saw ka sang lyakhe mangccang lante vizin ka muih. Myarya lepaw boei te alokuhpaw uccaw ccangkheit tuh aki ki pali kyate vaawlang te oun sahbung hae zah ka pe khe yn thua.
6 Tuh-e tuh hoyte ka do tuh, ccupali asaepaw sarangpaw hae, sarepaw hae, avawpaw sarangpaw hae te azouthyapaw pavaw hae kha ka muih.
7 Roi ccangkheit ka thae zah tuh-e roi nynh, ‘Peter, thokuh, theih lah ae,’ yn cipya.
8 Thuasalama kae nynh, ‘Bawipaw, thua kho lan khyh; pawccecize anungsikuhpaw te athyaa leipaw uccaw tuh ka khalang lungkhu lang tee boi khyh,’ ka cipya.
9 Thuasalama vaawlang te roi nynh, ‘Pachia nynh a thyaasah vae paw kha nang nynh anungsikuh ci nan,’ cite bua yn khung.
10 Tuhcite vae thum cia acyikuh koute tuh-e hae balyn tuh vaawlang bua lawthung athua.
11 Tuh ccyh lyakhe Sisaria khua kyate ka kalan oun saw hae paw ccungccaw hae lu thum tuh ka umnaw inn kya oun thua hae.
12 Muisaw nynh kae kha rarymamaw um leite minmin ryte cciakheih lan yn hopya. E uno hae lu taruh mah ka kya cceihbua hae zah Kornelias inn kya kae tee.
13 Vaawpaw nynh a inn kya thadyn zah Kawnelia kha, ‘Joppa khua lang ccungccaw hae saw lah, Peter a ci hae paw Simon kha kosah hae.
14 Tuh-e Peter nynh ae hopya oh paw bya liate nang te na inn kya um hae paw balyn tuh khum na thua cih oh,’ cite a hopyapaw kha aning nynh bua oun hopya.
15 Kae nynh phungho he ka tho tuh, atakaw lya aening tungvaw a ccaw hawte Thyaa Muisaw tuh mih tungvaw kya a ccahbua.
16 Bawipaw nynh, ‘Johan nynh tuh tui te baptisma a pya hae, thuasalama nanning tuh Thyaa Muisaw te baptisma pya na thua cih oh,’ cite a hopaw bya kha ka liathui vae.Ref 11.16: Loc 1.5
17 Bawipaw Jesu Khri kha ah zyn oh zah Pachia nynh lasung oun pya hawte minmin kha mah a pyabua hae ze, kae tahawpaw nynh Pachia kha ka khee kho cih zawtou?” cite Peter nynh a ci.
18 Minmin nynh hynh-e bya he a thae hae tuh zya dae hae zah, “Pachia nynh Zenta hae kha mah hiinnaw muesah bua lan ngaesikunaw a pyabua vae hae,” ci hae zah Pachia kha the a hoysah hae.
19 Stefen konglang te athopaw tuaasahnaw keiccuze phiariphiarae a um hae paw ccungccaw hae tuh Foenisia, Saipras te Antiok khua kyacia thua hae zah thehoypaw kha hum kya sanmah ho leite, Judah hae kya rou nynh a ho hae.Ref 11.19: Loc 8.1-4
20 Tuh-e hae kyaze abang tuh Saipras ram te Sairin khua e ccungccaw hae thua hae zah Antiok khua kya he a thua hae te, Grik bya a ho hae paw kha Bawipaw Jesu kong a hopya hae.
21 Bawipaw kuih tuh minmin ryte um zah ccungccaw patae nynh zyn hae zah Bawipaw kalan a paleihkuh hae.
22 Tuh-e thongpang tuh Jerusalem kya umpaw khriccaawbuu nynh thae zah, minmin nynh Barnabas kha Antiok khua lang a saw hae.
23 Tuin kya thua zah Pachia thawccinaw kha he a muih tuh a lungtua; zynnaw thinlung te Bawipaw tungvaw kya lungzinaw po a hoi nawlan hae minmin balyn kha thawzung a pya hae;
24 pawccecize Barnabas tuh ccungccaw hoypaw thua zah Thyaa Muisaw te thuasah, zynnaw te thuasah phe beihpaw nynh thua. Ccungccaw patae kha Bawipaw kalan a thuakhae hae.
25 Te Barnabas tuh Saul kha ccung khylan Tarsas khua lang a cceih;
26 Saul kha he a muih te, Antiok khua lang a cciakhae. Minmin tuh khriccaawbuu ryte kum kheit lungkhu umkheih hae zah ccungccaw patae kha leih a ccangpya hae. Antiok khua kyakhe zuitu hae kha Khriccaaw hae cite masaty ko athua hae.
27 Tuh ccyh lyakhe profeh hae abang tuh Jerusalem kyate Antiok khua lang oun thua hae.
28 Minmin lakuze lu kheit, Akabus a ci hae paw nynh thadyn zah, “Laephi vaw balyn kya myarya lepaw ccakannaw yn thua cih,” cite Muisaw liate a hodae; tuh-e ccakannaw tuh Sizar siapharan Klaudias ccyh lya nynh a thua.Ref 11.28: Loc 21.10
29 Zuitu hae nynh mawmaw lu raveih taeningnaw thyhte Judea ram kya um hae paw zyntu hae kalan bawmnaw kybua lan hae cite bya a paeku hae.
30 Tuhcite cyih hae zah, tuh-e bawmnaw tuh Barnabas te Saul kyate Khriccaaw piccan hae kalan a ky hae.