10
Kornelias Vizin A Muih
1 Sisaria khua kya Italy rhawkawphu acikuhpaw kyaze rhawkaw za kheit uktu rhawbawipaw Kornelias a ci hae paw lu kheit a um.
2 Tuh-e paw tuh beiknaw lang a zuakuhpaw thua zah a inn kya um hae paw balyn ryte Pachia raw a rih hae paw nynh thua; aning tuh ccungccaw hae kha hysahte patae bawm hae zah Pachia kalan tyty saw a sangpaw nynh thua.
3 Nin kheit tuh zete suimilan ccangthum loukaw khe Pachia vaawpaw nynh a kalan yn cceih zah, “Kornelias!” cite a kopaw kha a vizin kya ccaerarih lan a muih.
4 Vaawpaw kha riri he a do tuh rih zah, “Bawipaw, pawmou?” cite a khia. Vaawpaw nynh, “Na sawsangnaw te ryachi hae na bawmnaw tuh Pachia malang khe liathuinaw lante phe a thua vae.
5 Atu Joppa khua lang ccungccaw hae kha saw lah Peter a ci hae paw Simon kha kokuh.
6 Aning tuh saphua uccaw a raepaw Simon inn kya nynh a thua, a inn tuh rili kin nynh a um,” a cipya.
7 Bya a hopahpaw vaawpaw he a pou koute, Kornelias nynh a see hae lu ning te amaw rya a lawpah hae paw kyaze beiknaw lang a zuakuhpaw rhawkawpaw kha a ko hae.
8 Tuh-e konglang balyn kha a hopah kou hae te, Joppa khua lang a saw hae.
Peter Vizin A Muih
9 Awkhualan kya minmin tuh cceih hae zah Joppa khua a thuadyn hae khe, Peter tuh sawsang khylan ninthuccynglyn loukaw khe inn tungvaw lang a kae.
10 Peter tuh a vuelaw zah hankhakheit a ae ry; aepaw a dopya lya hae khe Peter nynh mangccang lante muih zah,
11 vaawlang yn hungkuh zah myarya lepaw boei te alokuhpaw uccaw ccangkheit tuh aki ki pali te laekhu lang yn sawbung hae paw kha a muih.
12 Tuh-e uccaw lungkhu khe ccupali asaepaw sarangpaw phuin, avawpaw sarangpaw phuin te azouthyapaw pavaw hae phuin a um.
13 Roi ccangkheit nynh a kyakhe, “Peter, thokuh, theih lah ae,” a cipya.
14 Thuasalama Peter nynh, “Bawipaw, thua kho lan khyh; pawccecize anungsikuhpaw te athyaa leipaw tuh ka ae boi khyh,” a ci.
15 Vaeningnaw roi nynh, “Pachia nynh phe a thyaasah vae paw kha nang nynh anungsikuhpaw ci nan,” a cipya.
16 Hynhcite vae thum cia acyikuh koute tuh-e uccaw tuh vaawlang bua lawthung athua.
17 Peter nynh a muihpaw vizin hynh paw suilan vema athua cite a tuaku cciamang lyakhe, Kornelias nynh yn saw hae paw ccungccaw hae tuh Simon inn kha oun zahbia hae zah sakoih malang khe a thadyn hae.
18 Peter a ci hae paw Simon kha hein kya a thua tou cite khia khylan a ko hae.
19 Peter nynh vizin kong a tua cciamang lyakhe, Thyaa Muisaw nynh, “Dotua, ccungccaw lu thum nynh nang kha ae ccung hae.
20 Tukeiccuze thokuh lah rungbung, rarymamaw um leite minmin ryte cceihbua; pawccecize kamaw nynh kae saw hae paw nynh thua,” a cipya.
21 Tukeiccuze Peter tuh minmin kalan yn rungbung zah, “Na ccung oh paw tuh kae hynh nynh ka thua, paw konglang mou nae thua oh?” cite a khia hae.
22 Minmin nynh, “Pachia rawrih zah adingpaw, Judah minphuin balyn kya thehoy a ccoupaw, rhawbawipaw Kornelias tuh nang kha a inn lang kosah lan zah na bya thae khylan Pachia nynh athyaapaw vaawpaw kyate a hopya vae,” a cipya hae.
23 Peter nynh minmin kha inn lungkhu lang ko hae zah tuin kya a thuasah hae.
Awkhualan khe Peter tuh minmin ryte cceih hae zah Joppa khua e uno hae abang mah a zuikuh bua hae.
24 Sarukheih khe minmin tuh Sisaria khua lang a tee hae. Kornelias nynh minmin kha la ngaw hae zah a vaeccaw hae te a ruiban hae kha a kobua hae.
25 Peter he yn tee tuh Kornelias nynh cciadue zah a cculeihpaw khe bakhung zah a beik.
26 Thuasalama Peter nynh aning kha tho zah, “Thadyn, kae mah ccungccaw nynh ka thua,” a cipya.
27 Kornelias ryte byahokuh hae zah he a tee tuh, a sueluakuh hae paw ccungccaw patae kha a muih.
28 Peter nynh, “Judah ccungccaw lu kheit nynh Zentapaw kalan paebua lanpaw te vaeccawku lanpaw tuh aphung thua khyh cipaw na ny oh; thuasalama hum ccungccaw kha sanmah anungsikuhpaw te athyaa leipaw cite ka ci vae khyh nawlan Pachia nynh yn muihsah vae.
29 Tukeiccuze kae kha he yn ko hae tuh, mya leite kae cceih; tukeiccuze pawccemou kae hynh nae kosah oh cipaw kae khiatua ry oh?” a cipya hae.
30 Kornelias nynh, “Nin pali aro vae, atu ccyh, zete suimilan ccangthum ccyh lyakhe ka inn kya saw ka sang, vaekheihmawte boeining phaephae akpaw a lawkuhpaw ccungccapaw nynh ka malang yn thadyn zah,
31 ‘Kornelias, na sawsangnaw tuh thaepya thua zah ryachi hae na bawmnawpaw tuh Pachia malang nypya athua vae.
32 Tukeiccuze Joppa khua lang ccungccaw saw lah Peter a ci hae paw Simon kha kokuh; aning tuh rili kin kya saphua uccaw a raetupaw Simon inn kya nynh a thua,’note10.32 Abang Ccathyaa kya tuh, ‘Aning nynh he yn thua vae ze nang kha ae hopah cih,’ cite a umbia. yn cipya.
33 Tukeiccuze kae nynh na kalan arangte kae saw hae zah, nang nynh mah thaw nae ccih zah nae thua. Tukeiccuze Pachia nynh ho lan kaw ae pyapaw balyn kha ngae khylan kaening balyn tuh atu Pachia malang hein kya kae um vae,” a cipya.
Zenta hae Thehoypaw Thaenaw
34 Peter nynh a khalang kha aw zah, “Pachia tuh ccungccaw maedo khyh cipaw ka ny ccaccing.Ref 10.34: Deu 10.17
35 Minphuin takyh kya Pachia rawrih zah ahmepaw rya a lahpaw miakaw tuh Pachia nynh leh a khan.
36 Ccungccaw balyn Bawipaw athuapaw Jesu Khri liate daenaw thehoypaw tuh Pachia nynh Israel hae kya a pya hae cipaw kha na ny oh.
37 Johan nynh a hopaw baptisma koute Galilee ram kyate tho zah Judea ram balyn kya po azeihkuhpaw kong kha na ny oh.
38 Tuh-e tuh: Pachia nynh Thyaa Muisaw te thuasah, thungnaw te thuasah Nazareth khuapaw Jesu kha chitui a thuh; Pachia nynh a umkhae keiccuze aning tuh ahoypaw rya kha lah zah, Satan nynh vawsaw a pya hae paw balyn kha dansah te khua a ccong cipaw na ny oh.
39 Judea ram kya te Jerusalem kya Jesu nynh a cyipaw miakaw elang kaening tuh ccaekia hae nynh kae thua; amaw kha thing vawlan sae hae zah a chia hae.
40 Thuasalama Pachia nynh amaw kha nin thumnaw kya thoosah zah a langsaku;
41 ccungccaw balyn kya langsakuh khyh, thuasalama Pachia nynh ccaekia lang oun popaw kaening kya nynh a langku; chinaw kyate a thoothui koute amaw ryte kae aekheih zah kae neihkheih.
42 Ccungccaw hae kha phunghopya khylan te Pachia nynh amaw kha a hiin hae paw te a chih hae paw kya byapiatu lang a nung cipaw kha ccaekiakhan khylan aning nynh kaening hynh kaw oun pya.
43 Humhung zemah amaw a zynpaw tuh a min liate seingaethyanaw a mue cih cite profeh hae balyn nynh amaw kong kha ccaekia a khan hae,” a ci.
Zenta hae Thyaa Muisaw Muenaw
44 Peter nynh bya a ho cciamang lyakhe tuh-e bya a thaepaw ccungccaw hae balyn tungvaw kya Thyaa Muisaw accah.
45 Zenta hae kya mah Thyaa Muisaw lasung tuh bu athuabua keiccuze Peter ryte oun cceihkheih hae paw vingdungawkuh hae paw zyntu hae tuh mih ngaeangthua.
46 Pawccecize tuh-e hae nynh bya ccangpaw te ho hae zah Pachia the a hoysah hae paw kha a thae hae.
47 Peter nynh, “Aening hawte Thyaa Muisaw a muebua hae paw hynh-e ccungccaw hae nynh baptisma a in khyh nawlan hae hum nynh mou tui kha a khee kho cih?” a ci.
48 Tukeiccuze Jesu Khri min te baptisma in lan minmin kha kaw a pya hae. Minmin nynh Peter kha nin sosoh um hin lan a kangku hae.