8
Grawng Davit Baox Pex
(1Been 18:1-13)
1 Davit deeh puing pui Philitix mai pex ka kix mai nawh rhim ti teei veng Mategama khaing pui Philitix.
2 Khaix an nawh pex haktiex Mawbax mai khinkix it piang tiex mai tiag ti yaox kix ka maox, khaing daux loe cub nawh pah kix ra cub mai nawh kieh an tix cub klawd, mawh kheu nan, pui Mawbax yuh siliex cawng Davit mai yaox ti tawx keun ka nawh.
3 Davit baox pex ka Hadadeza kawn simex Rehawbax simiang veng Zawbax, yam an mawh bawg yam hu rhim Hadadeza haktiex kwang tix hawt rawm klawng Yufrethix.
4 Davit pon rhim ling lawx brung naing tix rheng lhang mai lien naing brug brung aliah yieh, cub lien piang tiex ra mheen. Davit yuh ling lawx brung naing laux leeing khawmuik mai nawh teei ling lawx brung naing son cao tix, tix yieh lhang khaing.
5 Yam hoek pui Shurix khaing veng Damase ti sang teem ka Hadadeza pa mawh simiang Zawbax, Davit baox pah pui Shurix ra mheen ra rheng kaux.
6 Khaix an Davit deuh cub lien pau veng ot ka daux veng Damase, pa koe daux haktiex Shurix tan mai pui Shurix deeh mawh siliex cawng Davit mai yaox ti tawx keun ka nawh, Simiang Siyiex priex jhung Davit ka can dee hu nawh.
7 Davit rhim ti teei plah khri tiebtie cie kawncau Hadadeza mai viex ing ka veng Yerusaliem.
8 Khaing daux veng Betax mai veng Berawtie pa hoik kwang veng Hadadeza ka, simiang Davit hoik rhim ti teei tawng lheung ing tom nie.
9 Yam mhong Taw-ix pa mawh simiang veng Hamat ka hoik pex Davit ka kru naing Hadadeza khawmuik,
10 khaix an Taw-ix ploi Yawram kawn simex ti hu ka simiang Davit mai Yawram viex kraung mau, kraung khri mai tawng lheung sonsang rieb nawh mai sonsang nawb bwan piang nawh, kheu jao pex Davit ka Hadadeza, mawh kheu Hadadeza hoik yuh naing ka Taw-ix, glang ka singaix an.
11 Simiang Davit hoik appong ceu ankix ka Simiang Siyiex, tau mai mau khri pa hoik pon nawh khaing haktiex pa hoik pex tix khankix,
12 khaing haktiex Shurix haktiex Mawbax, haktiex Amon, haktiex Philitix, haktiex Amaliet kawn simex Rehawbax, pa mawh simiang veng Zawbax.
13 Davit hoik pon min ceu kaux tix, yam deeh ing nawh khaing pah tix pui Shurix, pui Edom tix mheen dim rheng kaux ka daux ngawd kih.Ref 8:13 Yaog 60 Title.
14 Nawh hoik deuh cub lien pa pau veng ka haktiex Edom khawmuik, pui Edom hoik mawh siliex cawng Davit khawmuik mai Simiang Siyiex hoik priex jhung Davit, ka can dee hu nawh.
Grawng Krax Kwang Pang Davit
(2Sam. 20:23-26; 1Been 18:14-17)
15 Mawh kheu nan, Davit kwang piang haktiex Isarelax khawmuik mai prawng rahsee piang pui nawh khawmuik.
16 Yuabax kawn simex Zeruya mawh cao kaing naing ting piang kru naing khankix mai Yehoshaphat kawn simex Ahilut mawh cao kaing pa priex ca rang,
17 Zadok kawn simex Ahitut mai Ahimaliet kawn simex Abyatha mawh cao giex kaing li mai Seraya mawh cao kaing tiiem lai,
18 mai Benaya kawn simex Yehawyadax mawh cao kaing pa kwang piang pui Kherati mai piang pui Pelati khankix, kawn simex Davit mawh cao giex kaing li heue.