7
Gumlox Sijax Mukheu Mai Davit
(1Been 17:1-27)
1 Simiang Davit hoik laux lee yiien yawg daux nyiex haw tix, kheu hoik kieh Simiang Siyiex nawh luad luan khaing pui koeng, pa koe hawt rawb rim nawh khawmuik,
2 Simiang Davit ah nin ka cao jhai Natan, “Jhak heue, aux yaox ti ot nyiex haw khaox gix, viang mawh nan, teug bwan sijax mukheu Siyiex kawn ca yaox ti ot ka daux nyiex gox man.”
3 Natan deeh ah nin ka simiang, “Hu heue, yuh awm pa koe rhawm maix, mawh kheu Simiang Siyiex tak ot tau mai maix.”
4 Viang mawh nan, daux sawm an, gumlox Simiang Siyiex hoek ka Natan ah nin,
5 “Hu mai krai grawng in ka kawncau Aux Davit, awm pa hoik krai Simiang Siyiex, mawh sang yaox maix ti sum nyiex sonsang ot Aux lie?
6 Aux ang nyang yaox ti ot daux nyiex, glang bawg yam hoik viex Aux pui Isarelax lih khaing daux meung Ejiptux, tom hoek ka daux in singaix, Aux hoik vung viang ti ot daux nyiex gox man.
7 Can dee hoik hu Aux tau mai pui Isarelax, hoik sax krai Aux ka cao prawng see doeh ru pui Isarelax, pa hoik tawx priex ih ka pui Aux Isarelax, yuh ka mawx maix lai ang sum nyiex khaox gix son Aux.”
8 Mawh kheu nan maix ah nin ka kawncau Aux Davit, Simiang Siyiex Cao pa ting piang khawmuik ah nin, Aux hoik teei maix lih khaing dee pa liang maix yung, sonsang mawh maix cao pa kwang piang pui Aux Isarelax.”
9 Aux hoik ot tau mai maix, ka can dee hu maix kudah mai hoik yuh pui koeng maix laux plak sivoe maix mai Aux hoik yuh min ceu kaux maix ting lhaong awm min ceu kaux pui pa kied ting lhaong pa ot piang haktiex in.
10 Lheu khaing an Aux tak laug dah dee tix dah ka son pui Aux Isarelax mai Aux tak kieh kix ot kaux cong tan mai kix tak yaox ti ot ka daux dee cie cao kix mai ang lai yaox ti gah tix, tix bawg kawx mai pui caox caig tak ang lai pon tuktiak kix tix bawg kawx, awm bawg yam pa hoik luan,
11 Daux bawg yam hoik ap Aux cao prawng see, mawh cao pa kwang piang pui Aux Isarelax, Aux tak kieh maix yiien yawg tix khaing pui koeng pex, lheu khaing an Simiang Siyiex baox krai grawng pa sang kieh Nawh Cao mawx koe nyiex haw.
12 Yam hoik naog singaix ju maix, maix tak yaox ti laux lee tix tau mai cub keeing maix, Aux tak yaog ti deuh doeh ru pa lih khaing cao maix mai Aux tak kieh meung haktiex nawh kaux cong.
13 Nawh tak sum nyiex tix lhang ka son min ceu kaux Aux mai Aux tak pang ti deuh dang ngeung meung haktiex nawh leeing ju.
14 Aux tak mawh keeing nawh mai nawh tak mawh kawn simex Aux, Ref 7:14 2Kaw 6:18; He 1:5; Jhi 21:7. phan nawh lud, Aux tak sivied ti gau nawh ka khaox puat awm sidiex kawn pui kawn tix.
15 Viang mawh nan, krax pa caux rhawm Aux tak ang lai gah tix khaing nawh, awm hoik teei Aux ti tik Sawlux khaing ka plak sivoe pex.
16 Mai doeh nyiex ma maix khawm meung haktiex maix, tak mawh pa kaux leeing ju ka plak sivoe maix, dang ngeung maix tak mawh pa kaux cong leeing ju”
17 Mawh kheu nan, Natan hoik krai grawng pa plak jhi Simiang Siyiex ka Davit.
Davit Yaogyaw Bwanson Siyiex
18 Yam an simiang Davit laig ka plak daux mai ngawm ka plak sivoe Simiang Siyiex ah nin, “Simiang Siyiex eue, mawh aux pui pa yuh ka mawx? Mai nyiex ma aux mawh pa yuh ka mawx? Maix Cao hoik yaog aux hoek ka dee pa kied ting lhaong in yuh ka mawx?”
19 Simiang Siyiex eue, in mawh ceu pa iak plak sivoe ngai Maix Cao, Maix Cao baox krai grawng in, ka doeh nyiex ma kawncau Maix, son bawg yam pa tak sang hoek, Simiang Siyiex eue, mawh in grawng pasax yuh kawn pui lie?
20 Yam in Davit kawn sang pon ah patix ka Maix Cao lie? Maix Cao hoik tawng ka kawncau Maix.
21 Son min plakngai gumlox Maix Cao mai awm pa koe alo Maix Cao, Maix hoik yuh ceu pa ting lhaong inkix, sonsang kieh Maix kawncau tix tawng grawng ceu in.
22 “Mawh kheu nan, Simiang Siyiex eue, Maix Cao mawh pa ting lhaong, mawh kheu ang lai koe Siyiex pa awm Maix tix kaux kawx, awm pa hoik sax mhong yix ka yhaok tix, lheu khaing Maix Cao Siyiex tang kaux ang lai koe.”
23 Mawh pui mawx pa sang awm pui Maix pui Isarelax, pa hoik taoh Maix mawh pui tix khaing piang haktiex in? Maix hoik jhi min ceu kaux tix daux kaing jhaw pa ting lhaong, khawm ceu pa kied lhat graung ka son haktiex Cao tix ka plak sivoe pui Maix, pa hoik taoh Maix ka son Cao tix khaing meung Ejiptux mai khaing sinax pui khankix mai khaing sinax siyiex kix.
24 Mawh kheu Maix Cao hoik yuh pui Isarelax mawh pui tix, sonsang mawh kix pui Maix leeing ju, Maix Cao hoik mawh Simiang Siyiex kix.”
25 Simiang Siyiex eue, lox pa hoik krai Maix Cao grawng pa dex mai kawncau Maix Cao mai pa dex mai doeh nyiex ma nawh, kieh mawh pa kaux leeing ju awm pa hoik krai Maix Cao.”
26 Kieh min ceu kaux Maix Cao mawh pa yaogyaw ting lhaong leeing ju, tau mai pa ah nin, kieh Simiang Siyiex Cao pa ting piang khawmuik mawh Siyiex ka piang pui Isarelax mai kieh doeh nyiex ma kawncau Maix Davit mawh pa kaux cong ka plak sivoe Maix Cao.
27 Grawh grawng nawh, Simiang Siyiex Cao pa ting lhaong piang mai pa mawh Siyiex pui Isarelax khankix eue, Maix Cao hoik plak jhi grawng ceu inkix ka kawncau Maix ah nin, “Aux tak sang kieh nyiex haw koe ka son Maix, ” kheu hoik kieh Maix Cao aux yaox ceu in ka daux rhawm cao tix, aux tom rawg bwan ka Maix Cao.”
28 “Yam in kawx Simiang Siyiex eue, Maix Cao mawh Siyiex tete mai gumlox Maix kawx, mawh pa mawh meh, Maix Cao hoik yuh gumlox pa kaux sijax tix ka kawncau Maix Cao.
29 Mawh kheu nan, kieh ceu in mawh pa khaw rhawm Maix Cao, nawb bwan piang doeh nyiex ma kawncau Maix, Simiang Siyiex eue, awm pa koe rhawm Maix Cao, kieh doeh nyiex ma kawncau Maix mawh pa pon bwanson Maix Cao leeing ju plak sivoe Maix Cao liak.”