24
Davit Koh Pui Isarelax Mai Yudax
(1Been 21:1-27)
1 Krax song rhawm Simiang Siyiex deeh lih piang pui Isarelax mai Nawh Cao so rhawm Davit sonsang puing ka kix ah nin ka nawh, “Lih hu heue, simin ti yaox pui Isarelax mai pui Yudax khankix.”
2 Simiang ah nin ka Yuabax, cao kaing naing ting piang kru naing pa ot mai nawh, “Hu ka sinax doeh ru pui Isarelax, jhak ka veng Dan tom hoek ka veng Berashebax, simin ti yaox ka ding koe pui, sonsang tawng aux ka koe pui miex ding.”
3 Mai Yuabax ah nin ka simiang, “Kieh Simiang Siyiex maix baox pui tix yieh son, piang pui pa hoik koe khankix mai kieh Nawh Cao kieh simiang aux, yaox ceu an kix ka ngai tix, viang mawh nan, cao simiang aux lai khaw rhawm ti yuh kaing ceu in jao patix.”
4 Viang mawh nan, lox tawm simiang hoik pex piang Yuabax mai piang cao kaing naing khankix, mawh kheu nan, Yuabax mai cao kaing naing khankix lih hu plak sivoe simiang sonsang hu simin ka pui Isarelax.
5 Mai kix tiang rawm klawng Yawdan mai hu bang ka veng Araw, ka plak khawn dawm veng, pa koe daux ngawd Gat ka see veng Yaza.
6 Khaix an kix deeh hoek ka haktiex Gilat mai haktiex Tathin Hawdashi, kix kaoh khaing tan mai hoek ka veng Daya mai hawt vung viang veng Sidon,
7 Mai kix hu bleeh ka tab pa kaux cong Turux mai ka veng pui Hiwix mai ka veng pui Khanan, khaix an kix deeh lih hu ka baoh seh haktiex Yudax tom hoek ka veng Berashabax.
8 Khaix hoik sidah hu kix ka haktiex an, hoik koe dim khix mai tixnga ngaix, kix deeh hoek ka veng Yerusaliem.
9 Khaix an Yuabax tawx carang pui pa hoik koh tix ka simiang, ka daux pui Isarelax pui naing pa vao pa giex vaig pliah khankix, koe daix sien kaux mai pui naing pui Yudax koe phwan sien kaux heue.
Pa Prawng Ca Phimap Davit
10 Khaix hoik koh Davit carang pui, nawh deeh doh keud ka krax lud tix ah nin ka Simiang Siyiex, “Can pa hoik yuh aux khankix hoik mawh phimap pa kied ting, yam in aux rawg bwan ka Maix Simiang Siyiex, rawg Maix pluat ploi ka phimap kawncau Maix liak, mawh kheu hoik yuh aux pa caox caig.”
11 Yam kaoh Davit khaing it tix ponngawb, lox Simiang Siyiex hoek ka cao jhai Gat, pa mawh cao pa chix yaox ka son Davit ah nin,
12 “Hu krai ka Davit Simiang Siyiex ah nin, Aux koe pa sang krai ka maix loe ceu, laug ti teei tix ceuceu, sonsang yuh Aux ceu an piang maix.”
13 Mai Gat hoek ka Davit krai grawng an ka nawh ah nin, “Mawh sang kieh maix krax hot sibhawm hoek piang haktiex tix, phan ang mawh nan, mawh sang to maix khaing sivoe pui koeng pa pheet maix loe khix, phan ang mawh nan, mawh sang kieh maix jhawm saux preng lih ka haktiex tix loe singaix lie? Yam in keud tix yaox mhawm mhawm mai deeh pawk lox pa sang caw aux tix viex ing ka Nawh Cao, pa ploi aux hoek ka maix.”
14 Mai Davit pawk lox ah nin ka Gat, “Aux hoik tug rhawm ka tete, kieh yix hoek daux tawm taix Simiang Siyiex, mawh kheu krax caux rhawm Nawh Cao hoik kied ting lhaong, paw doh kieh aux hoek ka daux tawm taix kawn pui liak.
15 Mawh kheu nan, Simiang Siyiex ploi jhawm saux preng hoek piang pui Isarelax, jah ponngawb tom hoek bawg yam pa deuh Nawh Cao, jah ka veng Dan tom hoek ka veng Berashebax, pui hoik yum aliah mheen kaux.
16 Yam hoik nyeu kawncau Siyiex taix tix piang veng Yerusaliem, sonsang yuh veng an laux leeing, Simiang Siyiex deeh doh keud ka daux rhawm tix mai Nawh Cao ah nin ka kawncau Siyiex, pa sang hu yuh pui laux leeing, naox heue yoi taix Maix, ” mai kawncau Siyiex an ot hawt biang pah nghox Arawrax pui Yebusix.
17 Yam yaox Davit kawncau Siyiex, pa lih hoek ciyang ka pui khankix, Nawh ah nin Aux hoik yuh ceu pa caox, cub yuh in khankix mawh yuh ceu patix, Aux rawg bwan ka Maix Cao kieh taix Maix hoek ngie piang aux mai ka doeh nyiex ma keeing aux khankix.”
Khu Dee Tan Glah Nghox
18 Ka daux singaix an Gat deeh hoek ka Davit ah nin ka nawh, “Hu mai sum khu dee tan tix lhang son Simiang Siyiex, ka glah nghox cie Arawnax pui Yebusix.”
19 Davit lih hu mai yuh awm lox pa tawm Simiang Siyiex ka lox pa krai Gat ka nawh.
20 Yam maong Arawnax tix jhak ka plak sivoe tix, nawh yaox hoek simiang tau mai kawncau tix ka plak sivoe nawh, mawh kheu nan, Arawnax lih plak praix mai gup ngai tix piang tiex sivoe simiang.
21 Mai Arawnax ah nin, “Mawh hoek simiang aux ka kawncau tix kheu jao tix?” Mai Davit deeh ah nin ka nawh, “Mawh sonsang liag aux glah nghox maix, sonsang sum khu dee tan son Simiang Siyiex, sonsang luan pui khankix khaing jhawm saux preng.”
22 Mai Arawnax deeh ah nin ka Davit, “Kieh simiang aux teei mai tan can pa yaox maix mawh pa mhawm, jhak heue, mawie hoik koe tin, sonsang yuh krax tan pa gleeing kah, koe kraung pa shiao mai iak mawie ka glah nghox sonsang yuh khix taung kah.”
23 Simiang eue, ceu inkix aux hoik ap ka maix simiang, mai Arawnax deeh ah nin ka simiang, “Kieh Simiang Siyiex maix, rieb ti teei ka maix.”
24 Simiang deeh ah nin ka Arawnax, “Ang mawh nan, aux tak liag ka maix, aux ang rhawm tan krax tan pa gleeing ka Simiang Siyiex aux, ka pa ang koe ngawh tix ceu kawx, ” mawh kheu nan, Davit liak glah nghox an mai mawie ka mau shekhe tix phwan plah.
25 Mai Davit sum khu dee tan, son Simiang Siyiex ka dee an mai tan krax tan pa gleeing mai krax tan pa nhim, Simiang Siyiex nghiet lox rawg nawh bwan, son haktiex an mai jhawm saux preng hoik grai khaing pui Isarelax heue.