1 In mawh lox pa ghoit Davit tix ah, Davit kawn simex Yessie, pui pa hoik yaog Siyiex Yakop ting lhaong mai pa hoik groi bee ka mai nawh mawh pui pa thut lox rhax yaogyaw pa jiet mhawm son pui Isarelax, 2 Khwan Simiang Siyiex ah nin ka aux mai gumlox Nawh Cao, hoik koe piang dak aux. 3 Siyiex pui Isarelax ah nin, rang ting pui Isarelax ah nin ka aux, pui pa kwang piang pui khankix, tak mawh pa kwang ka daux pa rahsee Nawh Cao, 4 Mai tak kwang ka daux krax pa lhat graung ka Siyiex, nawh tak awm pa riang yam lih singaix plak ponngawb, pa ang paiawm ceep ka mai nawh tak awm rib awn pa kuah khaing daux tiex, pa jhan singaix khaix hoik lih lhiex. 5 Ru aux hoik mawh pa kaux pa cong tau mai Siyiex ang mawh lie? Mawh kheu nan, Nawh Cao hoik yuh gumlox sijax mukheu leeing ju tau mai aux, kuceu hoik mawh pa kaux pa cong khawmuik. Mawh kheu in mawh krax pa taoh ka aux khawmuik mai mawh krax pa fah rhawm aux ka, Nawh Cao sang yuh ceu inkix grum naog ka son aux, 6 Viang mawh nan, can pui pa ang rahsee khankix, tak awm kat lawm pa tik vud ka, mawh kheu pui ang pon teeh ka taix tix. 7 Phan pui sang teeh ka pui an, nawh tak ceep ka kraung naing rhiem mai giex ka pliah mai tak gleeing kix khawmuik ka daux ngu.”

8 Inkix mawh cub pui pa ting riang rao cie Davit, Yawsheba Basahibiet pui Takhawmoni, mawh cao kaing naing ting piang cub cao kaing naing loe kaux, ceu kaux nawh mawh Adinaw pui Ezanix, kheu hoik pon pah nawh pui yum daix yieh kaux tix dom neh. 9 Khaix nawh mawh Elaza kawn simex Dodo kawn saux Ahawhix, nawh mawh pui pa ting riang rao tix kaux ka daux cub kix loe kaux tix kaux, pa ot tau mai Davit, yam tieh kix ka pui Philitix pa khrawm paox tix, sonsang yuh naing, khaix an pui Isarelax deeh gah tix khaing tan. 10 Nawh yaog ti kaoh puing ka pui Philitix khankix tom hoik saux meue taix ti mai ang lai pon yah taix tix khaing vaig, Simiang Siyiex hoik kieh kix koe krax pex pa kied ting daux singaix an mai pui khankix deeh hawt khaix nawh, sonsang tud rhim ngie kraung cie pui koeng. 11 Khaix nawh mawh Shama kawn simex Agix pui Hararix, pui Philitix khankix khrawm paox ka dah dee tix dah, ka dee hoik sum kix nghox mai sivawng khankix, pui Isarelax hoik to khaing pui Philitix. 12 Viang mawh nan, Shama hoik cung ka dee an mai tiebtie ka pui Philitix khankix mai pah pui Philitix khankix, yam an Simiang Siyiex hoik tawx krax pex pa kied ting ka nawh. 13 Ka daux yam vawg nghox, pui loe kaux khaing daux cub cao kaing ting an khankix tixgoe kaux, lih hu ka Davit ka daux rang Adulam, cub pui naing Philitix khankix paung ka daux ngawd Rephem tan. 14 Yam an Davit hoik ot ka daux tab dee pa kaux pa cong tix mai cub pui naing Philitix khankix ot ka daux veng Bieliehiem. 15 Mai Davit ah nin, “Aux kied sang nyaux nie rawm, pui mawx tix kaux kaux pa sang hu kin khaing daux rawm daux veng Bieliehiem, pa koe hawt daux diang siviex veng an mai tawx aux nyaux ka.” 16 Pui kwa pui vao an loe kaux, preeng tix laig ka daux sinax dee bang pui Philitix mai kin rawm khaing daux rawm daux veng Bieliehiem pa koe hawt daux diang siviex veng mai viex hoek ka Davit, viang mawh nan, nawh ang nyaux, nawh see tix tan rawm an ka plak sivoe Simiang Siyiex. 17 Mai nawh ah nin, “Simiang Siyiex eue, kieh in mawh pa singai khaing aux, phan aux nyaux ka rawm in, awm nyaux aux ka nham pui pa ang lai lhawk ka ju tix mai hu kin ka.” Mawh kheu nan, nawh ang nyaux rawm an, grawng ceu in mawh pa yuh pui kwa pui vao an kix loe kaux. 18 Abishie pux Yuabax kawn simex Zeruya, yaox ti mawh cao kaing ting ka daux pui an khankix loe kaux, nawh teei pliah cao ti yuh ka pui loe yieh kaux mai pon pah kix yum khawmuik mai nawh hoik pon pa ao min ka sinax pui loe kaux in. 19 Ang hoik mawh nawh pa kied koe min khaing ka daux sinax kix loe kaux lie? Mawh kheu nan, nawh pon ti mawh cao kaing naing ting tix kaux piang kix, viang mawh nan, nawh ang nyang krup diang pui an sivoe loe kaux. 20 Beneyax kawn simex Yehawyadax mawh pui pa koe rhawm vao tix kaux khaing veng Kazelax mai pa hoik yuh kaing pa ting lhaong, nawh hoik pah pui Mawbax ra kaux, pa kied koe rhawm vao awm sivai sangsi, nawh baox deeh hu tang dah mai hoik pon pah sivai sangsi tix mu ka daux o, bawg yam lih rawm sidap. 21 Nawh pah pui Ejiptux pa ting lhaong tix kaux khaing pui khankix, pui Ejiptux an giex pliah tix mu ka daux taix tix, viang mawh nan, Beneyax lih hu ka nawh tau mai khaox gix mai nawh pon rhim pliah khaing daux taix pui Ejiptux mai deeh pah pui an yum ka pliah cao nawh. 22 Khaix hoik yuh Beneyax kawn simex Yehawyadax ka ceu an khankix, nawh hoik ao min ka daux sinax pui ting riang rao an loe kaux. 23 Nawh nie lheu koe min khaing cub pui an tixgoe kaux, viang mawh nan, nawh ang krup diang pui an kix sivoe loe kaux, Davit yaog nawh mawh cao kaing piang cao pa pau ju tix. 24 Asahelax pux Yuabax mawh ka daux cub pui an kix tixgoe kaux tix kaux, Elahanan mawh kawn simex Dodo khaing veng Bieliehiem, 25 Shama pui Harawdi mai Elika pui Harawdi, 26 Heleza mawh pui Palatix mai Irax mawh kawn simex Ikesha pui Tekaw, 27 Abeza mawh pui Anatawtix mai Mebunie mawh pui Hushatix, 28 Zalamon mawh pui Ahawhix mai Maharie mawh pui Netawphah, 29 Heliep mawh kawn simex Banax pui Netawphah mai Itie kawn simex Ribie khaing veng Gibia pui Binyamin, 30 Beneyax pui Piratawni mai Hidie pa ot daux ngawd Gasha, 31 Abilabon pui Arabat mai Azamaviet pui Bahumix, 32 Eliabax pui Shalabawnix mai khaing cub kawn simex Yashin pa mawh Yawnasan, 33 Shama pui Hararix mai Ahiam kawn simex Shara pui Hararix, 34 Elipheliet kawn simex Ahasabie pui Makhatix mai Eliam kawn simex Ahitawphelax pui Gilawnix, 35 Hezarie pui Kharamelax mai Parie pui Arabix, 36 Igalax kawn simex Natan pui Zawbax mai Banix pui Gat, 37 Zelek pui Amon mai Naharie pui Berawtix Nawh mawh pa klawm kraung naing ceep Yuabax kawn simex Zeruya. 38 Irax pui Itarix mai Gariet pui Itarix, 39 mai Uriyax pui Heta khawmuik koe pui tixgoe aliah kaux heue.