6
Teug Sijax Mukheu Mai Isarelax
1 Teug Simiang Siyiex hoik ot ka haktiex Philitix aliah khix.
2 Pui Philitix kok ka cao giex kaing li mai cao jhai ah nin, “Ex tak sang yuh ka mawx ka teug sijax mukheu Siyiex? ex sang deeh tawx an ing ka dee ot nawh yuh ka mawx krai ex mhong liak.”
3 Kix pawk ah nin, “Phan pex tawx teug sijax mukheu Siyiex pui Isarelax dee singai, paw ploi hu giex, yuh ka mawx kawx, kieh deeh ing mai krax tan pa pluat ploi phimap, khaix an pex tak moi khaing jhawm saux mai an tak kieh pex tawng ka ang Nawh Cao nyang gah taix tix khaing pex.”
4 Mai kix ah nin, “Mawh krax tan pa pluat ploi phimap ceu tix pa sang tawx ex ka nawh, ” kix pawk ah nin, “Rieng saux muad khri phwan mu mai riang kiang khri phwan mu, awm ding koe cao kaing pui Philitix, mawh kheu jhawm saux tix ceu khaing koe piang pex mai piang cao kaing khankix.
5 Mawh kheu nan, pex tak yuh riang saux muad mai riang kiang pa yuh laux ka haktiex mai tawx min plakngai ka Siyiex pui Isarelax, phan pex yuh nan, Nawh tak kieh taix tix chaong khaing pex mai piang siyiex pex mai haktiex pex,
6 kheu pex lai kieh rhawm tix kiien, awm kiien rhawm pui Ejiptux mai Pharaw lie? Yam hoik yuh Nawh Cao ceu pa daox deng ka sinax kix, kix kieh pui hun lih hu ang mawh lie?”
7 “Teei lawx khraox tix lhang mai sau ka mawie miex ra mu, pa koe kawn pa ang nyang sax tok iak ka mai tuk kawn mawie iak deeh ing ka nyiex singai khaing miex tix.
8 Mai teei teug sijax mukheu Siyiex deuh piang lawx mai sau kraung khri pa sang tan ka Nawh Cao, son krax tan pa pluat ploi phimap mai deuh an ka daux praok teug mai ploi an kieh lih hu dee singai.
9 Mai pau ti jhak ka an, phan teug sijax mukheu lih hu ka haktiex cao tix, ka veng Bietshemiet mai Nawh Cao mawh pa yuh ceu pa caox pa kied ting in piang kaux ex mai phan ang cu ti hu ex tak tawng ang mawh taix Nawh Cao pa yuh ex, ex tak tawng an mawh pa tang lih ti mawh piang ex, pa ang ex keud ce.”
10 Pui khankix kawx yuh awm an mai teei mawie miex koe kawn ra mu tok ka lawx an mai laung kawn ka daux kawg,
11 kix sau teug sijax mukheu Siyiex piang lawx, khawm teug mai riang kiang mai riang saux muad.
12 Mawie miex ra mu hu see see ka krax hu ka Bietshemiet mai hu ka krax ting mai bawh tix, mai ang lai veh plak dawm plak gwiex, cao kaing pui Philitix kawx hawt khaix tom hoek ka meu haktiex Bietshemiet.
13 Pui veng Bietshemiet kawn tawk vawk nghox ca ka daux ngawd, yam maong kix ti jhak mai yaox ka teug sijax mukheu, kix gaux rhawm ka yaox tix an.
14 Lawx an hoek daux kaung Yawsux, pui Bietshemiet mai kaog tan praok rang ting. Kix lug khix ka khaox lawx an mai tan mawie miex an ra mu son krax tan pa gleeing ka Simiang Siyiex.
15 Pui Lewix teei teug sijax mukheu Siyiex mai teug koe ka praok an, pa koe kraung khri lih mai deuh an piang rang ting an, pui veng Bietshemiet tan krax tan pa gleeing mai appong ka Simiang Siyiex.
16 Yam hoik yaox cao kaing pui Philitix phwan kaux ka an, kix deeh ing ka Ekaron daux singaix an.
17 In khankix mawh riang saux muad khri pa tan pui Philitix son krax tan pa pluat ploi phimap ka Simiang Siyiex son veng Ashadok tix mu, son veng Gaza tix mu, son veng Ashakelon tix mu, son veng Gata tix mu, son veng Ekaron tix mu,
18 awm riang kiang khri kawx, pa kwang veng pui Philitix mai veng pa kaux cong mai ka yaong pa ang koe guh veng, rang ting pa deuh kix teug sijax mukheu Siyiex ka tong kaung Yawsux, pui veng Bietshemiet kawn koe tom hoek ka daux in singaix.
19 Nawh Cao pah ka pui veng Bietshemiet phwan mheen mai atixgliah kaux, kheu jhak kix teug sijax mukheu Siyiex, pui hun yiiem grai mawh kheu Simiang Siyiex pah ka pui hun tom nie heue.
Teug Sijax Mukheu Koe Kirayatyarim
20 Pui veng Bietshemiet chawk paox tix ah nin, “Mawh pui mawx pa pon cung plak sivoe Simiang Siyiex pa singax singeh in lie? Sonsang lih hu khaing yix mai pui mawx caw ti hu?”
21 Kix ploi pui cau khankix hu ka pui ot ka veng Kirayatyarim ah nin, “Pui Philitix deeh viex teug sijax mukheu Siyiex lih hoek mai deeh viex an ing tau mai pex heue.”