5
Teug Sijax Mukheu
1 Yam giex pui Philitix ka teug sijax mukheu Siyiex, kix viex lih hu khaing Ebaneza ka veng Ashadok.
2 Pui Philitix teei teug sijax mukheu Siyiex mai viex hu daux nyiex bwan siyiex Dagon mai deuh ka praok Dagon.
3 Yam kaoh pui Ashadok ponngawb cao singaix khaix jhak heue, siyiex Dagon goh piang tiex sivoe ngai teug sijax mukheu Simiang Siyiex. Mai kix deeh yaog ti deuh siyiex Dagon ka deeh ot nawh.
4 Yam kaoh kix caocao ponngawb singaix khaix, jhak heue, siyiex Dagon goh piang tiex sivoe ngai teug sijax mukheu Siyiex, kaing siyiex Dagon mai taix nawh khawm ra hoik pot piang sikun siviex, mawh ngie tokaux pa deuk nong nong.
5 Mawh kheu jao in cao giex kaing li siyiex Dagon mai pui laig daux nyiex bwan siyiex Dagon ang pon dig ka sikun siviex nyiex bwan Dagon tom in singaix.
6 Taix Siyiex hoik cien piang pui Ashadok mai Nawh Cao yuh kix laux leeing mai kieh krax kham geu jhawm saux muad hoek piang pui veng Ashadok mai haktiex baoh an khankix.
7 Yam yaox pui Ashadok ceu an, kix ah nin ka paox tix, “Teug sijax mukheu Siyiex pui Isarelax ang khaw tix ot mai ex, mawh kheu taix nawh cien piang ex mai piang siyiex ex Dagon.”
8 Kix ploi pui hu kok ka cao kaing pui Philitix mai khrawm kix chawk paox tix ah nin, “Ex sang yuh ka mawx ka teug sijax mukheu Siyiex pui Isarelax?” kix pawk lox ah nin, “Kieh ex viex teug sijax mukheu Siyiex Isarelax hu ka veng Gata. “Khaix an, kix viex teug sijax mukheu Siyiex pui Isarelax hu tan.
9 Khaix viex kix an hu, taix Simiang Siyiex yuh veng an laux leeing ka krax kha rhawm pa kied ting mai kieh kix kham geu ka jhawm saux muad pui ting khawm pui iak ku kaux.
10 Mai kix tawx teug sijax mukheu Siyiex ka Ekaron, yam hoek teug sijax mukheu Siyiex ka Ekaron mai pui Ekaron yiiem yo ah nin, “Kix viex teug sijax mukheu Siyiex pui Isarelax hoek sonsang pah ka ex mai pui hun khankix.”
11 Kix ploi pui hu kok cao kaing pui Philitix mai khrawm kix chawk paox ti ah nin, “Tawx teug sijax mukheu Siyiex pui Isarelax hu singai, deeh ing ka dee ot tix, son ang lai pah ka ex mai pui hun, mawh kheu taix Siyiex cien ka dee an, krax yum mai krax laux leeing hoik tah hu daux veng khawmuik.”
12 Pui pa ang yum kawx pon jhawm saux muad mai lox yiiem yo pui veng an hoek tom ka raoma heue.