1 Samoelax pa mawh kawn nyawm yuh kaing jhaw Simiang Siyiex sivoe ngai Elix. Yam an gumlox Siyiex hoek ngie ceeix, riang susai ang hoek sijheeng. 2 Daux tix ngaix Elix it ka dee it tix, ngai nawh jah tix vu vi ang chix yaox, 3 kawk ngu Siyiex ang nyang yeet, daux nyiex bwan Simiang Siyiex ka dee koe teug bwan sijax mukheu Siyiex, Samoelax hoik laig it dee it tix. 4 Khaix an Simiang Siyiex kok ka Samoelax, Samoelax ah nin, “Aux ot tin.” 5 Mai nawh to hu ka Elix ah nin, “Aux ot tin, mawh kheu kok maix aux. “Mai Elix ah nin, “Aux ang kok maix, baox deeh hu it ha. “Mai nawh kawx deeh hu it. 6 Mai Simiang Siyiex baox ah nin, “Samoelax, mai Samoelax kaoh hu ka Elix ah nin, “Aux ot tin, mawh kheu kok maix aux. “Mai Elix ah nin, “Aux ang kok ka maix, kawn simex aux eue, baox deeh hu it ha.” 7 Samoelax ang nyang sax tawng ka Simiang Siyiex mai gumlox Simiang Siyiex ang nyang sax plak jhi tix ka nawh. 8 Simiang Siyiex baox kok ka Samoelax loe bawg tix bawg. Mai nawh kaoh hu ka Elix ah nin. “Aux ot tin, mawh kheu kok maix aux, ” mai Elix hoik tawng Siyiex kok ka kawn nyawm an. 9 Mawh kheu nan, Elix ah nin ka Samoelax, “Hu it ha, phan nawh deeh kok maix, maix pawk ah nin, Simiang Siyiex eue, krai heue, mawh kheu kawncau Maix hoik mhong, mai Samoelax deeh hu it ka dee it tix. 10 Simiang Siyiex hoek mai cung kok awm phao voe ah nin, “Samoelax, Samoelax, mai Samoelax pawk ah nin, krai heue mawh kheu kawncau Maix hoik mhong.” 11 Simiang Siyiex ah nin ka Samoelax, “Jhak heue, Aux tak yuh tix ceuceu ka daux pui Isarelax mai yhaok pui pa mhong ku kaux tak lak lheet yhaok ka mhong tix khawm ra plak. 12 Daux singaix an Aux tak yuh ceu an ka Elix awm pa hoik krai tix grawng pa dex mai nyiex ma nawh, jah tom yam jah tom hoek dee sidah. 13 Mai Aux tak krai grawng sang ciyang Aux ka doeh nyiex ma nawh leeing ju, kheu pa caox caig pa hoik tawng nawh, mawh kheu kawn simex nawh khawm ra kaux nunai ka Siyiex mai nawh ang ne raw ka kiex. 14 Mawh kheu nan, Aux tom tiextu ka doeh nyiex ma Elix mai phimap pa caox caig yuh doeh nyiex ma nawh tak ang pon pluat ploi tix ka krax tan mai ka ceu pa tan leeing ju. 15 Samoelax laig it tom hoek ponngawb, mai nawh paoh siviex nyiex bwan Simiang Siyiex. Samoelax lhat krai riang susai yaox tix ka Elix. 16 Elix kok ka Samoelax ah nin, “Kawn simex aux Samoelax eue, mai nawh pawk ah nin, “Aux ot tin.” 17 Elix ah nin, “Simiang Siyiex hoik ah ceu patix ka maix? Paw mox an khaing aux. Phan maix mox can pa krai Siyiex ka maix khaing aux khankix kieh Siyiex ciyang ka maix nie lheu khaing an.” 18 Samoelax krai kuceu ka nawh, ang lai mox tix ceu kawx khaing nawh, Elix ah nin, “In mawh Siyiex, kieh Nawh Cao yuh awm pa yaox tix mawh pa mhawm.” 19 Samoelax ting hwan mai Siyiex ot mai nawh mai ang kieh lox nawh cod ka tiex tix gum kawx. 20 Pui Isarelax khawmuik jah ka veng Dan tom hoek ka veng Berashibax hoik tawng yaox ka Samoelax mawh cao jhai Siyiex. 21 Mai Siyiex baox bleeh ka veng Shilaw, mawh kheu Siyiex jhi tokaux tix ka Samoelax ka veng Shilaw ka daux gumlox Simiang Siyiex mai Samoelax krai gumlox inkix tah daux haktiex Isarelax khawmuik heue.