2
Grawng Rawg Hanax Bwan
1 Hanax rawg bwan ah nin, “Aux kied gaux rhawm mai kied ting riang daux Simiang Siyiex, jheeh aux yaw rangdi tix ka pui pa koeng aux, mawh kheu aux gaux rhawm daux pa taoh Maix Cao.
2 Ang koe pui pa singax singeh awm Simiang Siyiex, lheu khaing Maix ang lai koe Siyiex mai rang dee een ex rhawm awm Maix ang koe.
3 Paw lai krai lox ting lhaong mai paw kieh lox ca nyhau lih khaing jheeh tix, mawh kheu Simiang Siyiex mawh pa tawng mai Nawh Cao mawh pa ciang ka kaing kuceu.”
4 Ak pui ting riang khankix, hoik graig mai pui pa awn riang khankix, tak deeh koe riang.
5 Pui pa kub ih tak deeh cang, pui pa cai rhawm tak yaox ti sak, pui neh tak keh kawn aliah kaux mai pui koe kawn tom nie tak deeh iak riang.
6 Siyiex pon kieh yum mai pon kieh deeh im, Nawh Cao pon kieh hu meung yum mai pon kieh deeh kaoh,
7 Simiang Siyiex chix kieh pui hot mai chix kieh pui mi, Nawh chix kieh tiem mai chix kieh lhaong.
8 Nawh Cao yaog pui hot khaing phawng tiex mai yaog pui caung khaing pum nyhee mai kieh ngawm tau mai cao Simiang mai pon dee ngawm dangngeung pa koe min mawh sinngao tix. Mawh kheu rong haktiex mawh cie Siyiex mai Nawh deuh haktiex piang an.
9 Nawh Cao kia ngien ka caong pui pa singax tix, pui pa ang rahsee tak ot jiiep ka daux pa faik, pui ang chix pex ka riang rao cao tix.
10 Pui pa koeng Simiang Siyiex ka khankix tak laux phawng vid, Nawh Cao kieh sinum praix khaing raoma tuh ka kix, Simiang Siyiex ciyang tom sidah haktiex, Nawh tak mawh riang rao ka simiang Nawh Cao mai yaog siawp sibrawm pui pa hoik groi Nawh Cao bee ka.”Ref 2:1-10 Luk 1:46-55.
11 Khaix an Elakanax deeh ing ka nyiex tix, ka Ramax, mai kawn nyawm an yuh kaing jhaw Simiang Siyiex ka sivoe Elix cao giex kaing li.
Kawn Simex Elix Cao Giex Kaing Li
12 Kawn simex Elix khankiex mawh pui caox mai kiex ang nab yam ka Simiang Siyiex.
13 Been pa deuh cao giex kaing li son pui hun mawh nin, yam yuh pui tix kaux kaux krax tan pa appong, kawncau cao giex kaing li tak viex lawk tuh koe kak loe mu hoek ka taix tix yam kawn ngaik ka nex.
14 Khaix an nawh tak cih lawk tuh koe kak loe mu ka daux aw khang, aw ting mai aw iak khankix, phan lawk tuh koe kak loe mu caw ti pug patix ang ah, cao giex kaing li tak teei ti cie ka an, kix yuh ceu an ka pui Isarelax pa hoek ka daux Shilaw.
15 Sivoe sang gleeing, kix tik khlawp bee, kawncau cao giex kaing li hoek ah nin ka pui pa yuh krax tan, “Tawx nex pa sang tong cao giex kaing li ti ih, mawh kheu nawh ang teei nex hoik ngaik ka maix, teei ngie nex im.”
16 Mai phan pui an ah nin ka nawh, “Kieh kix gleeing khlawp bee sivoe, khaix an maix pon teei tom nie awm pa koe rhawm tix, ” mai nawh ah nin, “Ang chix, maix caw ti tawx yam in, phan ang mawh nan aux tak yuh tom pon teei tix an.”
17 Mai phimap pui awn ju an kiex kied ting sivoe Simiang Siyiex, mawh kheu kiex map ka krax tan ka Simiang Siyiex.
Samoelax Yuh Kaing Jhaw Siyiex
18 Samoelax ceep sibex dhah dawd taix mai yuh kaing jhaw sivoe Siyiex, yam mawh kawn nyawm.
19 Miex nawh caing sibex iak tix pheen mai viex ti tawx ka nawh ku num, yam hu nawh yuh krax tan pa appong mai miex tix ku num.
20 Elix nawb bwan ka Elakanax mai moeng nawh ah nin, “Kieh Simiang Siyiex tawx ru ka khaing bun in, sonsang ap kawn nyawm pa hoik rawg tix ka Simiang Siyiex, khaix an kix deeh ing ka nyiex tix.
21 Simiang Siyiex hoek kia ngien ka Hanax, nawh baox koe kaux mai keh kawn simex loe kaux kawn bun ra kaux mai kawn nyawm pa mawh Samoelax ting hwan sivoe ngai Simiang Siyiex heue.
Lox Jhai Son Kawn Praix Elix
22 Elix hoik kied kuad mai nawh mhong can pa yuh kawn simex tix ka pui Isarelax, grawng it kiex mai bun yuh kaing jhaw ka diang siviex laig nyiex gox bwan man bang kum,
23 nawh ah nin ka kiex, “Pax lai yuh ceu in yuh ka mawh? Mawh kheu aux hoik mhong grawng pa caox yuh pax ka pui khankix.”
24 Kawn simex aux eue, ang mawh, pa mhong aux grawng kieh pui hun Simiang Siyiex lud ang lai mawh pa mhawm.
25 Phan pui tix kaux lud ka paox kawn pui tix Simiang Siyiex tak prawng ca ka nawh mai phan pui tix kaux lud ka Simiang Siyiex, pui mawx pa sang khyox khaw ka son nawh? Viang mawh nan kiex ang nghiet ka lox keeing tix, mawh kheu Simiang Siyiex koe rhawm ti sang pah kiex yum.
26 Samoelax hwan ting lhaong mai koe min pakngai ka sivoe Simiang Siyiex mai sivoe ngai pui khankix.
27 Pui Siyiex tix kaux lih bleeh ka Elix ah nin ka nawh, “Siyiex ah nin, aux hoik jhi tokaux Cao tix sidawng, ka nyiex ma keeing pex khankix, yam ot kix ka nyiex Pharaw meung Ejiptux.
28 Aux hoik laug nawh khaing doeh nyiex ma pui Isarelax, sonsang mawh cao giex kaing li Aux, sonsang yuh krax tan piang khu dee tan Aux mai gleeing kix nyawng bhawng mai ceep sibex dhah dawd taix plak sivoe Aux, Ref 2:28 Lih 28:1-4. Aux hoik ap krax tan pa yuh ka ngu khaing pui Isarelax ka doeh nyiex ma keeing maix.Ref 2:28 Krub 7:35-36.
29 Kheu maix lai dig krax tan mai can pa tan pa hoik tawm Aux mai tawx min ka kawn tix lheu ting khaing Aux mai kieh cao tix kluing ka krax tan pa kied mhawm khaing pui Aux, pui Isarelax lie?
30 Siyiex pui Isarelax ah nin, Aux hoik krai tete, doeh ru maix mai doeh ru keeing maix tak hu ing sivoe ngai Aux leeing ju, Simiang Siyiex ah nin, kieh an singai khaing Aux, pui pa tawx min ka Aux mai pui pa nunai ka Aux, tak pon krax nunai.
31 Jhak heue, sang hoek singaix tat Aux ka plawng taix maix mai plawng taix doeh nyiex ma keeing maix mai pui riex ju ang lai koe daux doeh nyiex ma maix.
32 Maix tak koe krax khi rhawm mai khoi rhawm yam yaox ti nawb Siyiex bwan ka pui Isarelax, mai pui riex ju tak ang koe ka daux doeh nyiex ma maix leeing ju.
33 Pui maix pa ang Aux nyang tat ti tik khaing khu dee tan Aux, Aux tak deuh ju sonsang yiiem tom uah ngai mai kieh maix voe rhawm mai doeh nyiex ma maix tak yum mai yam awn ju tix,
34 in tak mawh mhai rug ka maix, pa sang lih mawh ka kawn maix Hawphanix mai Phinehat ra kaux, khawm ra kaux tak yum daux tix ngaix khaing.
35 Aux tak kieh cao giex kaing li pa kaux sijax lih hoek, pa hoek yuh awm alo rhawm Aux, Aux tak sum doeh ru nawh kaux cong mai nawh tak hu ing sivoe ngai pui pa hoik groi Aux rawm bee ka leeing ju.
36 Pui pa kawn deuk ka daux nyiex ma maix khankix hoek krub ka nawh, sonsang rawg mau tix piak mai blah tix lon ah nin yuh bwanson yaog aux mawh ara cao giex kaing li sonsang yaox aux ti ih blah tix lon heue.”