22
Yesux Sang Khran Deeh Hoek
1 Nawh jhi aux yaox rawm klawng ting rawm pa im ju tix klawng,Ref 22:1 Yez 47:1; Zak 14:8. pa pruh awm simaox plaung, pa lih hoek khaing dang ngeung Siyiex mai kawn Yung,
2 ka daux sigreung krax veng an heue. Ka khawm ra plak rawm klawng ting an, koe khaox pa im ju,Ref 22:2 Jah 2:9. pa plix, plix kao ceu ra, pa plix, plix nawh ku khix mai lhax khaox an mawh sonsang kieh ceu pui kuceu moi heue.
3 Ceu pa jhax lawg tak ang lai baox koe khaix, Ref 22:3 Zak 14:11.mai dang ngeung Siyiex mai kawn Yung tak koe ka daux veng an mai siliex Nawh khankix tak sang yuh kaing krub ka Nawh Cao heue.
4 Kix tak sang yaox ka pakngai Nawh mai ceu kaux Nawh tak sang koe ka dong re kix heue.
5 Tak ang lai baox koe pon sawm tan khaix. Kix tak ang lo pa riang kawk ngu, viang pa riang singaix kawx ang lo, grawh grawng nawh Siyiex tak tawx pa riang ka kixRef 22:5 Isa 60:19.mai kix tak sang giex kaing ku ju leeing ju heue.Ref 21:5 Dan 7:18.
6 Nawh ah nin ka aux, “Gumlox in khankix mawh pa kaux sijax mai pa mawh meh mai Simiang pa mawh Siyiex khwan cao jhai khankix, hoik ploi kawncau Siyiex cie tix, sonsang jhi ceu pa dex sang hoek ti mawh khankix ka siliex Nawh khankix heue.
7 Jhak heue, Aux tak sang khran hoek laung laung, kaw pa priex ti hawt gumlox jhai phuk lai in khankix ting bwanson heue.”
8 Aux Yohan mawh kaw pa hoik mhong mai hoik yaox ceu in khankix heue. Yam mhong yam yaox aux, aux goh gup mai krub sivoe caong kawncau Siyiex pa hoik jhi ceu an khankix ka aux heue.
9 Nawh ah nin ka aux, “Maix paw vi yuh nan. Aux mawh nang paox siliex tau mai maix mai tau mai puxaik pa mawh cao jhai khankix mai tau mai kix pa priex ti hawt gumlox phuk lai in khankix heue. Krub ka Siyiex heue.”
10 Nawh baox ah nin ka aux, “Paw vi tawk cum ti nyeep ka gumlox jhai phuk lai in khankix, grawh grawng nawh bawg yam dex sang hoek heue.
11 Kaw pa ang rahsee, kieh nawh kawn ca yuh pa ang rahsee awx. Kaw pa seeing brai, kieh nawh kawn ca yuh mawh pa seeing brai awx. Kaw pa rahsee, kieh nawh kawn ca yuh pa rahsee awx. Kaw pa singax singeh, kieh kawn ca yuh nawh mawh pa singax singeh awx.Ref 22:11 Dan 12:10.
12 Jhak heue, Aux tak sang khran hoek laung laung mai Aux viex ngawh riang mai Aux,Ref 22:12 Isa 40:10; 62:11. ti sang tawx ka kaux pui mawx kaux pui an awm pa khaw mai kaing pa yuh tix heue.Ref 21:12 Yaog 28:4.
13 Aux mawh Alaphax mai Omegax, pa mawh pa liang phaox ka mai pa ghoik khaixRef 22:13 Jhi 1:8. mai pa mawh pa jah mai pa sidah heue.Ref 21:13 Isa 44:6; 48:12; Jhi 1:17; 2:8.
14 Kix pa sigrhah kraung ceep tix mai pa koe akhwang ti hoek ka khaox pa im ju Ref 22:14 Jah 2:9; 3:22.mai pon ti laig ka siviex khankix ka daux veng an, ting bwanson heue.
15 Ka plak praix koe sox khankix mai pui pa mawh cao yuh simeed yuh sat khankix mai pui pa lud vao khankix mai pui pa pah pui yum khankix mai pui pa krub riang grang khankix mai can pui ku kaux pa moh ka ceu pie lhen mai pa yuh ceu pie lhen heue.
16 “Aux Yesux, hoik ploi kawncau Siyiex tix hu sonsang kham mhai sakse ka maix grawh grawng ceu in khankix, son ceucao khankix heue. Aux mawh riah mai ru Davit, Ref 22:16 Isa 11:1.pa mawh Simuing Griang pa pruh heue.”
17 “Khwan Cao mai bun pa sang koe mex ah, “Hoek heue, kaw pa mhong kieh nawh ah, hoek heue, kaw pa sang nyaux nie rawm, kieh nawh hoek heue. Kaw pa koe rhawm ti teei, kieh nawh teei giex ka rawm pa im ju heue.”Ref 22:17 Isa 55:1.
18 Aux kham mhai sakse ka can pui ku kaux pa mhong gumlox jhai phuk lai in khankix, phan pui tix kaux kaux baox tiien lox ka khankix, Siyiex tak sang baox tiien preng ceu pa hoik tiiem ka daux phuk lai in khankix ka nawh heue.
19 Phan pui tix kaux kaux teei tix tieh lih khaing gumlox jhai phuk lai in khankix,Ref 22:18-19 Pi 4:2; 12:32. Siyiex tak sang teei ti tik nyum son cie nawh pa dex mai khaox pa im ju mai pa singax singeh, pa hoik tiiem ka daux phuk lai in heue.
20 Kaw pa kham mhai sakse grawh grawng ceu in khankix ah nin, “Mawh heue, Aux tak sang khran hoek laung laung.” Amen. Simiang Yesux eue, hoek heue.
21 Kieh bwanson Simiang Yesux koe tau mai pui pa singax singeh khankix liak. Amen.