21
Raoma Mai Haktiex Pa Khraox
1 Aux yaox ka raoma pa khraox mai ka haktiex pa khraox,Ref 21:1 Isa 65:17; 66:22; 2Pe 3:13. grawh grawng nawh raoma phao ka an mai haktiex phao ka an hoik grai hu heue. Rawm sigrit sigra ang baox lai koe heue.
2 Aux yaox ka veng pa singax singeh,Ref 21:2 Isa 52:1. pa mawh veng Yerusaliem pa khraox, lih hoek khaing daux raoma khaing Siyiex,Ref 21:2 Jhi 3:12. pa hoik cox khre tix awm bun pa sang koe mex, pa hoik jawg tix son mex nawh heue.Ref 21:2 Isa 61:10.
3 Ref 21:3 Yez 37:27Aux mhong lox pa ting pa sinum pa lih khaing daux dang ngeung ah nin, “Jhak heue, nyiex gox bwan man Siyiex koe tau mai kawn pui mai Nawh Cao tak sang ot tau mai kix mai kix tak sang mawh pui cie Nawh khankix mai tokaux Siyiex tak sang ot tau mai kix mai mawh Siyiex kix heue.
4 Nawh Cao tak sang awt ti tik rawm ngai can pa koe khaing ngai kix heue. Krax yum tak ang lai baox koe khaix heue. Ref 21:4 Isa 25:8.Viang pa khi rhawm mai pa yiiem mai pa saux kawx tak ang baox lai koe khaix,Ref 21:4 Isa 65:19. mawh kheu ceu pa hoik sax mawh phao ka khankix hoik grai hu heue.”
5 Kaw pa ngawm ka piang dang ngeung an ah nin, “Jhak heue, Aux yuh khawmuik mawh pa khraox heue.” Nawh Cao baox ah nin, “Tiiem heue, mawh kheu gumlox in khankix mawh pa kaux sijax mai pa mawh meh heue.”
6 Nawh Cao baox ah nin ka aux, “An khankix hoik lih mawh heue, Aux mawh Alaphax mai Omegax, pa mawh Pa Jah mai pa Sidah heue. Aux tak sang tawx giex rawm keut pa im ju ka kaw pa sang nyaux nie rawm heue.Ref 21:6 Isa 55:1.
7 Kaw pa pex, tak sang pon tix cie sin ceu in khankix heue. Aux tak sang mawh Siyiex nawh mai nawh tak sang mawh kawn Aux heue.Ref 21:7 2Sa 7:14; 1Been 17:13.
8 Viang mawh nan ka son pa lhat pa graung mai pa ang yum rhawm mai pa greeing mai pa mawh pa pah pui yum mai pa mawh pa lud vao mai pa mawh pa yuh simeed yuh sat mai pa mawh pa krub riang grang khankix mai can pa mawh pie lhen khawmuik, nyum cie kix tak mawh ka daux nhawng pa gleeing ka ngu mai mhat, pa mawh krax yum ra bawg tix bawg heue.”
Veng Yerusaliem Pa Khraox
9 Ka daux kawncau Siyiex aliah kaux an, pa koe klong aliah mu pa naog ka preng pa ghoik khaix aliah ceu an, tix kaux hoek mai nawh sikah mai aux ah nin, “Hoek tin mai aux tak sang jhi maix yaox bun pa sang koe mex, pa mawh moeng kawn Yung heue.”
10 Nawh viex aux hu ka daux Khwan Cao, ka gawng pa kied ting lhaong tix mu mai jhi aux yaox veng Yerusaliem pa singax singeh,Ref 21:10 Yez 40:2. lih hoek khaing daux raoma khaing Siyiex,
11 pa koe min pakngai Siyiex mai pa riang nawh awm siang simaox pa kied ngawh, pa awm siang simaox pa toh riang kuceu, pa awm simaox plaung pa singaong,
12 pa koe guh veng pa ting lhaong, pa koe siviex kao ra mu mai ka siviex an khankix koe kawncau Siyiex kao ra kaux mai ceu kaux pui Isarelax kao ra ceu kawx hoik tiiem ti deuh ka siviex an khankix heue.
13 Plak lih singaix koe siviex loe mu mai plak caong ma laong siviex loe mu mai plak caong ma seh siviex loe mu mai plak klip singaix siviex loe mu heue.Ref 21:12-13 Yez 48:30-34.
14 Guh veng an koe jaong num kao ra mu mai ka piang jaong an khankix koe ceu kaux kawncau pa ting cie kawn Yung an kao ra kaux heue.
15 Kaw pa sikah mai aux koe gawng priem khri son diag, sonsang tiag ka veng an mai ka siviex nawh khankix mai ka guh veng nawh heue.Ref 21:15 Yez 40:3.
16 Veng an mawh pa jiet kreng khawm pon daog mai plak lang nawh sidu ting awm plak vieh heue. Kaw an teei gawng priem an mai tiag ka veng an mai koe pon rheng mai phwan yieh lag. Plak lang mai plak vieh mai plak lhaong veng an sidu heue.
17 Nawh tiag ka guh veng an mai koe tix yieh tixpon pon sawk, awm pa khaw mai sawk pa tiag pui, pa mawh sawk pa tiag kawncau Siyiex heue.
18 Guh veng nawh mawh pa hoik tham ka siang simaox, pa mawh siang simaox pa toh riang kuceu mai veng an mawh khri nawnaw, pa awm siliak pa singax heue.
19 Jaong num guh veng an khankix, hoik jawg bre ka can siang simaox pa ngawh kuceu khawmuik heue. Jaong num phao ka tix mu mawh siang simaox pa toh riang kuceu, ra mu tix mu mawh siang simaox pa klai singi pa toh riang awm khri tao tie, loe mu tix mu mawh siang simaox pa paing pau, pon mu tix mu mawh siang simaox pa klai sium,
20 phwan mu tix mu mawh siang simaox pa bawd raoh bawd paing pau, liah mu tix mu mawh siang simaox pa raoh awm nham, aliah mu tix mu mawh siang simaox pa lheung awm khri, daix mu tix mu mawh siang simaox pa klai paing, dim mu tix mu mawh siang simaox pa raoh eem, kao mu tix mu mawh siang simaox pa klai lheung, kao tix mu tix mu mawh siang simaox pa klai singi, mai kao ra mu tix mu mawh sieang simaox pa raoh klai heue.
21 Siviex kao ra mu an, mawh siang pa koe ka daux jawx kao ra mu Ref 21:18-21 Isa 54:11-12.mai siviex mawx siviex an hoik tang mawh siang pa koe daux jawx kumu mai krax veng an mawh khri nawnaw, pa pon yaox phlat awm siliak heue.
22 Ang aux yaox nyiex bwan ka daux veng an, grawh grawng nawh Siyiex cao pa ting sibrawm piang khawmuik mai kawn Yung mawh nyiex bwan nawh heue.
23 Veng an ang lai lo pa jhan riang singaix mai riang khix, grawh grawng nawh mawh min pakngai Siyiex pa kieh nawh riang Ref 21:23 Isa 60:19. mai kawn Yung mawh kawk ngu veng an heue.
24 Ceu pui khawmuik tak sang hu ka greung pa riang veng an mai simiang haktiex khankix kawx tak sang viex min pakngai kix ka daux nawh heue.
25 Siviex veng an khankix tak ang lai nyeep ti yam ponngaix, ponsawm kienie ang lai koe,
26 mai kix tak sang viex min pakngai mai krax yungyi pui kuceu khankix ka daux veng an heue.Ref 21:25-26 Isa 60:11.
27 Ceu pa seeing brai, phan ang mawh nan kaw pa yuh ceu pa greeing mai pa pie lhen ang pon ti laig tan, Ref 21:27 Isa 52:1. viang mawh nan mawh ngie kix pa hoik tiiem ka daux phuk lai pa im ju kawn Yung khaing pa pon ti laig kah heue.