3
Grawng Pa Laug Ka Ruthax
1 Khaix an, Nawmix ah nin ka Ruthax, “Kawn bun aux eue, mawh ang aux pon sawg dee pa yiien yawg sonsang pon maix krax nyawm rhawm lie?”
2 “Bawzax pa mawh cao kawncau bun awn jux pa yuh kaing tau mai maix nawh hoik mawh paox ru ex ang mawh lie? Nawh sang boi nghox daux sawm in daux glah nghox heue.”
3 Khoek maix ka rawm mai kraix bee ka tokaux tix, ceep kraung pa kied mhawm maix mai lih hu ka dee pah kix nghox, paw kieh nawh yaox tokaux maix, tom ang nawh nyang naox ih nyaux tix heue.
4 “Yam hu it nawh ci ti tawng dee it nawh mai laig ka dee it nawh mai plak man lhop piang caong nawh mai it tan mai nawh tak krai ceu pa sang caw maix ti yuh heue.”
5 Ruthax deeh ah nin, “Aux tak yuh awm pa krai maix ka aux khawmuik heue.”
6 Mawh kheu nan nawh lih hu ka dee pah kix nghox mai yuh awm pa hoik tawm miex nawh khankix heue.
7 Khaix hoik ih nyaux Bawzax mai koe krax nyawm rhawm mai nawh hu it praok dee sidah pum nghox mai Ruthax koi mo ti hu mai plak man lhop piang caong nawh mai it tan heue.
8 Kaw simex an siduad greung sawm mai tieh tix, nawh tawng ka hoik it bun tix kaux ka plak caong tix!
9 Mai nawh ah nin, “Mawh maix mawx?” Nawh pawk ah nin, “Aux mawh Ruthax kawn bun cau maix, mai lhop aux ka man lhop maix, mawh kheu maix mawh paox nyiex pa dex ka aux tix kaux heue.”
10 Khaix an nawh ah nin, “Kawn bun aux eue, kieh Simiang Siyiex nawb bwan ka piang maix, mawh kheu sijax pa yuh maix bawg khaix nie lheu ting khaing bawg ka, mawh kheu ang maix lai hawt khaix simex awn ju pa hot ang ah, pa mag mi ang ah heue.
11 “Kawn bun aux eue, paw khi rhawm aux tak yu can ceu pa rawg maix khawmuik ka son maix, mawh kheu pui pa ot daux veng khawmuik, hoik tawng mawh maix bun pa kaux sijax mai pa mhawm jhawm tix kaux heue.”
12 “Aux mawh paox nyiex pa dex mai maix tete, viang mawh nan paox nyiex pa nie lheu dex khaing aux kawn koe tix kaux heue.
13 Ot tin daux bo in tom hoek plak ponngawb, phan nawh sang yuh beeh glawm pa dex mai paox nyiex son maix mawh pa mhawm, kieh nawh yuh ceu an, phan nawh ang yuh beeh glawm pa dex mai paox nyiex son maix, awm im ju Simiang Siyiex aux tak yuh son maix, it tin tom hoek ponngawb heue.”
14 Mawh kheu nan Ruthax it plak caong nawh, tom bah riang praix plak ponngawb mai nawh kaoh sivoe ang pui nyang chix yaox ka paox ti, khaix an nawh ah nin, “Paw kieh pui tawng ka hoek bun ka glah dee pah ex nghox awx”
15 Mai nawh ah nin, “Tawx man fua pa koe ka piang maix mai nih tin, ” Yam hoik nih nawh man an, Bawzax tong nghox ca liah epha mai sau ka piang man an, khaix an Ruthax ing daux veng heue.
16 Yam deeh hoek nawh ka miex tix, miex nawh ah nin, “Kawn bun aux eue, yuh ka mawx?” Nawh krai can pa hoik yuh pui an khawmuik,
17 Mai nawh ah nin, “Nghox ca in liah e pha mawh pa tawx nawh ka aux, mawh kheu nawh ah nin ka aux, paw ing khawm taix yi tix ka miex maix heue.”
18 Miex nawh ah nin, “Kawn bun aux eue, krox jun tom hoek bawg yam lih grawng ceu ankix, mawh kheu kaw simex an tak ang yawg tix tom ang nawh nyang sidah yuh grawng ceu ankix ka daux in singaix heue.”