2
Ruthax Sipub Ka Bawzax
1 Ka daux pux aik mex Nawmix doeh ru Elimaliet koe pui pa kied mi tix kaux, ceu kaux nawh mawh Bawzax heue.
2 Ruthax pui Mawbax ah nin ka Nawmix, “Yuh bwanson kieh aux hu ka daux kaung mai sut sigleem nghoxRef 2:2 Krub 19:9-10; Pi 24:19. pa cod pa khrum khaing pui pa sang pon aux krax pa caux rhawm ka plak sivoe ngai nawh, ” mai Nawmix ah nin ka nawh, “Kawn bun aux eue, hu heue.”
3 Khaix an Ruthax hu sawg ti sut sigleem nghox pa kawn deuk khaix cao pa vawg nghox mai nawh hoek daux kaung Bawzax, pa mawh doeh ru Elimaliet pa ang nawh keud ce ka heue.
4 Yam an, Bawzax hoek khaing veng Bieliehiem ah nin ka cao vawg nghox, “Kieh Siyiex ot tau mai pex.” Mai kix pawk ah nin, “Kieh Siyiex nawb bwan ka piang maix heue.”
5 Bawzax ah nin ka cao kaing vawg nghox, “Bun awn ju an mawh pui mawx lie?”
6 Kawncau nawh cao kaing vawg nghox pawk ah nin, “An mawh bun awn ju pui Mawbax, pa hoek tau mai Nawmix khaing haktiex Mawbax heue.”
7 Mai Ruthax ah nin, “Yuh bwanson kieh aux sut sigleem nghox pa cod pa khrum sinax lhiem nghox plak khaix cao pa vawg nghox liak, ” Mawh kheu nan jah ponngawb tom hoek yam in, nawh ca yuh kaing in lheu khaing laux lee ti daux nyiex gox tivud ticu ngie heue.
8 Khaix an Bawzax ah nin ka Ruthax, “Kawn bun aux eue, nghiet ha, paw sut nghox pa deuk ka kaung tang dah mai paw hu khaing tin, ot hawt dex kawncau bun aux khankix heue.”
9 “Hawt jhak daux kaung dee vawg kix mai hawt khaix kix, aux hoik tawm lox ka kawncau simex awn ju an khankix, sonsang ang kix yux pa ang ceu ang mhawm ka maix heue. Yam sang nyaux nie maix rawm hu pug ti nyaux daux aw rawm pa kin kawncau simex awn ju an khankix ti deuh heue.”
10 Khaix an Ruthax gup pakngai tix ka piang tiex ah nin, “Kheu aux lai pon krax caux rhawm, plak sivoe ngai maix, daux pa mawh tix pui tang praix tang klawng lie?”
11 Bawzax deeh pawk ah nin, “Aux hoik mhong can pa yuh maix ka miex tix, khaix hoik yum mex maix, maix hoik prah miex keeing tix mai haktiex dee keh dee kung tix mai maix hoek ka ceu pui pa ang maix sax tawng glang ka in heue.”
12 “Kieh Siyiex deeh pawk bwanson ka kaing jhaw pa yuh maix mai kieh Siyiex pui Isarelax pa hoek maix ti paung greem pruik, tawx bwanson pa grum naog ka maix heue.”
13 Khaix an Ruthax ah nin, “Cao simiang aux eue, kieh aux koe min pakngai sivoe maix, mawh kheu hoik tawx maix krax nyawm rhawm, viang aux ang mawh kawncau bun maix kawx maix hoik krai lox pa caux rhawm ka aux heue.”
14 Yam hoek bawg priex ngaix Bawzax ah nin ka nawh, “Hoek tin, hoek ih blah mai cux blah pa ih maix ka daux rawm pa niex, ” Ruthax ngawm hawt praok cao vawg nghox khankix mai Bawzax tawx blah ka nawh, nawh ih tom sak mai kawn deuk tiblah heue.
15 Yam kaoh nawh ti sang hu sut sigleem nghox, Bawzax tawm kawncau simex awn ju khankix ah nin, “Kieh nawh sut sinax lhiem nghox mai paw sibriem ka nawh awx.”
16 Ploi sigleem nghox cod khaing vien nghox tiblah son nawh, prah nawh sut mai paw deuh phimap ka nawh heue.”
17 Mawh kheu nan Ruthax sut nghox pa cod pa khrum ka daux kaung tom sidah plak bo mai pah nghox pa sut tix an, pon nghox ca tix epha heue.
18 Nawh viex nghox ca an ing daux veng mai jhi miex tix yaox ka nghox ca pa pon sut tix heue. Mai teei ti tawx priex lheu khaing pa hoik sak ih tix ka miex tix heue.
19 Mai miex nawh ah nin “Mawh hu sut maix nghox dee mawx daux in singaix? Maix hu yuh kaing dee mawx? Kieh bwanson koe ka piang pui pa koe bwanson ka maix. “Mai Ruthax krai ah nin ka miex tix, “Ceu kaux pui pa yuh aux kaing tau mai nawh daux in singaix mawh Bawzax heue.”
20 Khaix an Nawmix ah nin ka mun tix, “Kieh Siyiex pa koe krax caux rhawm ang jut ang jai ka piang pui pa im ju mai ka piang pui pa hoik yum nawb bwan ka nawh, ” “Pui an mawh paox nyiex dex mai ru ex tix kaux heue.”
21 Ruthax pui Mawbax ah nin, “Lheu khaing an nawh ah nin ka aux maix ot dex kawncau aux, tom hoik vawg kix nghox aux heue.
22 Mai Nawmix deeh ah nin ka mun tix Ruthax, “Kawn bun aux eue, mhawm, hu tau maix mai kawncau bun awn ju nawh khankix, phan maix hu daux kaung tang dah ha pui kox yu pa ang ceu ang mhawm ka maix heue.”
23 Mawh kheu nan nawh ot dex kawncau bun awn ju Bawzax khankix sonsang sut sigleem nghox pa cod pa khrum khankix, tom hoik sidah vawg kix nghox cao mai nghox ca mai nawh ot tau mai miex tix heue.