1 Yam mhong nang laux simiang Shebax ka grawng pa ao min Sawlamon, nawh hoek ka veng Yerusaliem sonsang cheuk tix yaox Sawlamon ka gumlox chawk pa kied nu mai cub pui pa hawt khaix nawh khankix tom nie, cub kala uk pa tang ti viex ceu pa sioe bhawng, khri tom nie mai siang simaox pa kied laoh lie khankix heue. Yam hoek nawh ka Sawlamon, nawh sikah can grawng ceu pa koe daux rhawm tix khankix mai nawh heue. 2 Mawh kheu nan, Sawlamon deeh pawk lox pa chawk nawh khawmuik; can pa kied nu tix ceu kawx ang koe ka son Sawlamon mai pa ang nawh pon krai ang koe tix ceu kawx heue. 3 Yam yaox nang laux simiang Shebax ka koe pingnya cuyi Sawlamon, grawng pa hoik sum nawh nyiex khankix, 4 pa ih piang pheen sawm nawh, dee ngawm kawncau nawh khankix, kaing jhaw cao pa pau tix khan kheu nawh khankix mai kraung ceep kix, cao pa giex kawk nyaux nawh mai kraung ceep kix mai krax diang laig nawh sonsang hu nawh ka nyiex bwan Siyiex, nawh hoik tua khwan luan paux ka sipiag heue. 5 Khaix an, nawh ah nin ka simiang, “An mawh grawh grawng pa hoik mhong aux ka daux haktiex ot tix, pa mawh lox maix mai pingnya cuyi maix khankix hoik mawh tete heue. 6 Viang yuh ka mawx kawx, aux ang nyang yum rhawm ka gumlox kix, tom ang aux nyang bax hoek yaox ceu inkix ka ngai cao tix; yam in grawng pa kied ting lhaong pingnya cuyi maix khankix tix plak, ang nyang mawh pa hoik krai tix ka aux tete heue. Maix kawn nie blon koe krax pa ao min khaing krax pa hoik mhong aux heue. 7 Kieh pui maix mai kawncau mau soi maix khankix pa cung ti ot sijheeng ka plak sivoe maix mai pa mhong ka gumlox pingnya cuyi maix khankix koe bwanson heue. 8 Kieh yaogyaw bwanson ka Siyiex maix, pa hoik koe krax pa khaw rhawm ka daux maix mai pa hoik yaog ti deuh maix piang dang ngeung Nawh Cao, sonsang mawh maix simiang son Siyiex maix heue. Mawh kheu Siyiex maix hoik moh ka ceu pui Isarelax khankix, sonsang pang Nawh Cao ti deuh kix leeing ju, mawh kheu nan, Nawh Cao hoik kieh maix mawh simiang piang kix, sonsang prawng ca maix kix ka daux pa rahsee heue.” 9 Khaix an, nawh tawx khri tixyieh tixnga talantan mai can ceu pa sioe bhawng tom nie mai siang simaox pa kied koe ngawh koe jum khankix ka simiang; ceu pa sioe bhawng pa awm pa hoik tawx laux simiang Shebax ka simiang Sawlamon, ang lai koe heue. 10 Cub kawncau mau soi Hirix mai kawncau mau soi Sawlamon pa hoik viex khri khaing veng Awphirax, viex khaox Alagum mai siang simaox pa laoh lie khankix baox hoek ka nawh heue. 11 Simiang yuh plawng khaox tieb hawt daux krax ka khaox Alagum, son nyiex bwan Siyiex mai son nyiex haw simiang, nawh baox deeh yuh ting mai ting koe maox khankix ka khaox an son pui pa ah lai rhax khankix mai ceu inkix mawh pa ang sax yaox tix sivoe in ka daux haktiex Yudax heue. 12 Yam in simiang Sawlamon, hoik tawx can ceu pa simie laux simiang Shebax khawmuik, can ceu pa mhaing nawh ti cie khankix, caw tix kied lheu khaing pa hoik viex nawh tix tawx ka simiang heue. Mawh kheu nan, laux simiang deeh veeh ti ing ka haktiex cao nawh mai cub kawncau mau soi nawh khankix heue.

13 Krax cien khri pa hoik hoek ka Sawlamon ku num hoik koe liah yieh tixnga liah talantan, 14 Lheu khaing an can pa hoik viex cao lai pa hu krax mai cao yuh lai geu khankix hoek mai simiang haktiex Arebia, khawmuik mai simiang pa kwang haktiex khankix hoik viex ti tawx khri mai mau ka Sawlamon yam an heue. 15 Simiang Sawlamon, yuh ti deuh plah tiebtie naing pa kied ting ra yieh plah, ka khri pa hoik tawk tix mawh plah khankix; son plah tiebtie naing an khankix ku mu, khri hoik uik ka liah yieh shekhe heue. 16 Nawh baox deeh yuh plah tiebtie naing pa iak an khankix ka khri pa hoik tawk tix mawh plah khankix loe yieh plah, son plah tiebtie naing an khankix ku mu, khri hoik uik ka loe yieh shekhe heue. Simiang hoik deuh tix priex ankix ka daux nyiex pa koe ka daux nong piang gawng Lebanon heue. 17 Lheu khaing an simiang baox yuh dang ngeung pa kied ting ka nga sang tix mu mai hoik om nawh ka khri nawnaw heue. 18 Dangngeung an koe liah glawk tau mai dee dig pa yuh tix ka khri mai plawng khaox neung taix khankix hoik koe ka plaok dee ngawm plak mawx plak an mai sivai sangsi ra mu hoik cung tix ot plaok plawng khaox neung taix an khankix heue. 19 Sivai sangsi kao ra mu hoik cung ti ot piang praok glawk bawng ankix liah glawk, ceu pa awm in mawh pa ang sax yuh tix ka meung haktiex tang dah tang dee pie tix meung kawx heue. 20 Kawk nyaux simiang Sawlamon khankix hoik mawh pa yuh tix ka khri khawmuik mai khawm kawk nyaux pa koe ka daux nyiex daux nong piang gawng Lebanon hoik mawh pa yuh tix ka khri nawnaw heue. Ang mawh pa yuh tix ka mau pie tix mu kawx; mawh kheu hoik sawn mau awm pa ang koe ceu ka daux singaix baux ju kwang Sawlamon ka haktiex yam an heue. 21 Mawh kheu reu ting cub simiang khankix, hoik hu ka veng Tashi, tau mai cub kawncau mau soi Hiram heue. Ka daux loe num tix bawg, reu ting pa yuh lai geu an khankix, hoik bleeh tix hoek mai viex khri, mau, nga sang, rao khaox mai kaong khankix hoek heue. 22 Mawh kheu nan, simiang Sawlamon kied nie blon magmi mai koe pingnya cuyi khaing simiang piang haktiex khawmuik heue. 23 cub simiang piang haktiex khawmuik, sawg tix hoek ka plak sivoe ngai Sawlamon, sonsang nghiet tix ka pingnya cuyi nawh khankix, pa hoik sau Siyiex tix priex ka daux rhawm nawh heue. 24 Pui ku kaux hoik viex totaix tix, kraung mau kraung khri mai kraung ceep, kraung naing mai ceu pa sioe bhawng khankix, brung mai la khankix, awm pa hoik tat kix tix num hoik tix num heue. 25 Simiang Sawlamon koe kawg brung pon rheng lhang son ling lawx naing brung mai khawm pui naing brung khankix tix mheen ra rheng kaux, pa hoik pang nawh ti deuh ka daux veng priex ling lawx naing brung mai pa koe tau mai simiang ka daux veng Yerusaliem heue. 26 Mawh kheu nan, nawh kwang piang cub simiang an khawmuik, jah khaing rawm klawng Yufrethix, tom hoek ka haktiex pui Philitix mai hoek tom dee singai ka mee haktiex meung Ejiptux heue. 27 Simiang yuh mau ang lai koe ngawh jum awm lon simaox ka daux veng Yerusaliem mai nawh yuh pang khaox Arit haoh hun awm khaox ruh, pa koe ka daux lung haktiex heue. 28 Kix viex brung khankix hoek ka simiang Sawlamon, khaing meung Ejiptux mai khaing meung haktiex ku meung khawmuik heue.

29 Yam in grawng kaing pa deuk simiang Sawlamon ti yuh yam jah tom hoek dee sidah khankix, ang mawh pa hoik tiem ti deuh ka daux phuk lai cao jhai Natan, ka daux phuk lai lox jhai Ahiyax pa mawh pui veng Shilaw mai ka daux phuk lai cao pa yaox riang susai Idado, pa dex dawd mai pa plak jhi grawng Yerobom kawn simex Nebat lie? 30 Simiang Sawlamon kwang piang ceu pui Isarelax khankix ka daux veng Yerusaliem tixpon num heue. 31 Khaix an, simiang Sawlamon laux lee tix taux mai keeing nawh khankix mai kix sipaung nawh ka aux veng keeing nawh simiang Davit heue. kawn simex nawh Rehobom deeh plud ti kwang haktiex ka dee ot nawh heue.