1 Rehobom hu ka veng Shekhim, mawh kheu ceu pui Isarelax khawmuik lih hu ka veng Shekhim sonsang deeh yaog nawh mawh simiang heue. 2 Ceu ankix hoik lih ti koe, yam mhong Yerobom kawn simex Nebat ka grawng an, nawh deeh yaog tix ing khaing meung Ejiptux, ka daux dee hoik to nawh mox tix khaing simiang Sawlamon yam an heue. 3 Kix ploi pui hu kok nawh hoek mai Yerobom mai ceu pui Isarelax khankix bleeh tix hoek ma Rehobom ah nin, 4 “Keeing maix hoik yuh beeh glawm yix cien, mawh kheu nan, yam in deeh kieh kaing beeh glawm cien keeing maix mai beeh glawm cien nawh khankix, pa sau nawh ti deuh ka piang yix, deeh kieh chaong liak. yix tak yuh kaing jhaw maix heue. 5 Nawh ah nin ka kix, “Deeh hoek ka aux khaix in daux loe singaix, “mai pui khankix lih hu khaing nawh heue. 6 Khaix an, simiang Rehobom kum tau mai cub kuad song pa cung tix ot ka plak sivoe keeing nawh simiang Sawlamon, glang yam kawn im ju nawh ah nin, “Mawh sang tawx pex krax keud ka aux sonsang pon pawk aux gumlox pui inkix yuh ka mawx lie? 7 Kix krai ah nin ka nawh, “Phan maix koe pa caux rhawm ka pui inkix mai koe pa khaw rhawm ka kix, sikah lox ceu pa mhawm ka kix, kix tak mawh kawncau mau soi maix leeing ju heue. 8 Nawh thiang gumlox krax keud pa tawx kuad riex ju khankix ka nawh mai nawh deeh kum tau mai pui awn ju pa ting lhaong tau mai nawh khankix mai cung ti ot ka plak sivoe nawh heue. 9 Nawh ah nin ka kix, “Mawh sang tawx pex krax keud ceu patix ka aux lie? ex tak sang deeh pawk gumlox pui inkix pa hoik sikah ka aux ka daux krax pa ah kix nin, kieh beeh glawm pa hoik sau keeing maix ti deuh piang yix deeh chaong liak. 10 Khaix an, pui awn ju pa ting lhaong tau mai nawh khankix sikah ka nawh ah nin, “Awm krax pa yuh nin maix tak sikah ka pui pa hoik sikah lox ankix ka maix ka daux krax pa ah nin, keeing maix yuh beeh glawm yix cien, viang mawh nan maix yuh ankix chaong piang yix liak. Mai maix tak ah nin ka kix, giien tiah aux tak mawh pa nie lheu ting khaing nyoi keeing aux heue. 11 Yam in awm hoik sau keeing aux ti deuh beeh glawm pa cien piang pex, aux tak baox naok ti sau khaox glawm pa lheu cien piang pex, keeing aux hoik sivied pex ka khaox puat, viang mawh nan, aux tak sivied pex ka tamtim heue 12 Mawh kheu nan, Yerobom mai pui khawmuik deeh hoek ka Rehobom, daux loe ngaix tix ngaix, awm bawg yam pa hoik tat simiang ti deuh ah nin, “Deeh hoek ka aux ka daux loe ngaix tix ngaix heue. 13 Khaix an, simiang deeh pawk lox kix daux krax pa kied kin sigrien sigre, simiang Rehobom, thiang ka krax keud pa tawx kuad riex ju khankix, 14 mai nawh sikah ka kix awm krax keud pa tawx pui awn ju khankix ka nawh ka daux pa ah nin, keeing aux hoik yuh beeh khaox glawm pex cien, viang mawh nan, aux tak deeh baox naok piang an; keeing aux hoik sivied pex ka khaox puat, viang mawh nan, aux tak sivied pex ka tamtim heue. 15 Mawh kheu nan, simiang ang cu ti nghiet ka gumlox pui khankix, kheu jao hoik mawh grawng pa kaoh khaing Siyiex, sonsang pon Siyiex ti kieh gumlox Nawh Cao grum naog, ka pa hoik sikah Nawh Cao ti deuh ka daux tawm taix Ahiyax pa mawh pui veng Shilaw, ka Yerobom kawn simex Nebat heue. 16 Yam in, yam yaox pui Isarelax khawmuik ka ang simiang lai cu ti nghiet ka gumlox kix, pui khankix hoik deeh pawk ti ah nin ka simiang heue. Nyum cie yix khaing daux Davit mawh ceu patix lie? Yix ang koe krax pa sang pon sinngao ka daux kawn simex Yessie heue. Pui ku kaux deeh ing ka nyiex gox cao tix heue, mawh kheu nan, pui Isarelax khankix deeh ing ka nyiex gox cao kix yam an heue. 17 Viang mawh nan, Rehobom ca kawn kwang piang ceu pui Isarelax, pa ot ka daux veng meung Yudax heue. 18 Khaix an, simiang Rehobom, ploi Hadawram, pa mawh cao kiang pa koh keen hu, viang mawh nan, ceu pui Isarelax khankix dheem nawh ka lon simaox mai nawh yum heue. Mawh kheu nan, simiang Rehobom nied ti haok piang ling lawx naing brung nawh, sonsang to ti ing ka veng Yerusaliem heue. 19 Mawh kheu nan, ceu pui Isarelax khankix hoik tieh feen ka doeh nyiex ma Davit tom hoek daux singaix in heue.