26
Cao Pau Siviex Veng Khankix
1 Grawng gwieh kix cao pa pau siviex veng khankix khaing ceu pui, Korabix, mawh Meshalemix, kawn simex Korax pa kaoh khaing doeh ru kawn simex Asapha heue.
2 Kawn simex Meshelemix khankix, kawn Ai mawh Zakharix, kawn Nyi mawh Yedelax, kawn Sam mawh Zebadix, kawn Sai mawh Yatanilax,
3 Kawn Ngox mawh Elam, kawn Log mawh Yehohanan mai kawn ciiet mawh Elayehonie heue.
4 Lheu khaing an kawn simex Obetdedon khankix, kawn Ai mawh Shemayax, kawn Nyi mawh Yehozabat, kawn Sam mawh Joah, kawn Sai mawh Sakha mai kawn Ngox mawh Netanelax,
5 Kawn Log mawh Amilax mai kawn ciiet mawh Issakha mai kawn cib mawh Pulatie, mawh kheu Siyiex nawb bwan ka Obetdedon heue.Ref 26:4-5 2Sa 6:11; 1Been 13:14.
6 Kawn Ai nawh Shemayax baox koe kawn simex mai kix hoik mawh cao pa kwang ka doeh nyiex keeing kix, grawh grawng nawh, kix hoik mawh cub pui pa kied ting riang rao mai pa koe rhawm kwa heue.
7 Kawn simex Shemayax khankix, mawh Otanix, Rephalax, Obet, Elazabat mai pux kix Elihux mai Semakhix khankiex mawh pui pa koe riang rao ti pon yuh kuceu heue.
8 In khawmuik mawh cub kawn simex Obetdedom mai cub kawn simex kix mai puxaik kix khawmuik mawh pui pa pon yuh kuceu mai pa kied ting riang son kaing jhaw mai kix khawmuik pa mawh kawn simex Obetdedom koe tigliah ra kaux heue.
9 Meshelemix koe kawn simex khankix mai puxaik kao daix kaux pa mawh pui pa kied ting riang rao pa pon yuh kuceu heue.
10 Hosa khaing doeh ru Merarix, baox koe kawn simex Shimarix, viang Shimarix ang mawh kawn liang kawx keeing nawh hoik yaog nawh mawh kawn Ai heue.
11 Kawn Nyi nawh mawh Hilaki, kawn Sam nawh mawh Tebalix mai kawn Sai nawh mawh Zakharix, kawn simex mai puxaik Hosa khankix koe kao loe kaux heue.
12 Cub cao pau siviex veng in khankix mawh cao kaing ting khaing sinax puxaik kix mai lai loh ti teei beeh glawm sonsang yuh kaing ka daux nyiex bwan Siyiex awm yuh puxaik kix heue.
13 Kix khawm pui iak pui ting ku kaux yuh nieb sonsang pau ka siviex veng ku mu, awm pa koe doeh nyiex ma keeing kix heue.
14 Siviex veng plak lih singaix caw ka Shelemix heue. Khaix an, kix baox yuh nieb son kawn simex nawh Zakharix pa mawh pui pa koe pingnya cuyi tix kaux mai caw ka siviex veng plak laong heue.
15 Son Obetdedom caw ka siviex veng plak seh mai kawn simex nawh khankix hoik caw cao pau nyiex Asupim, Asupim mawh nyiex priex kraung heue.
16 Son Shupim mai Hosa nieb hoik caw ka siviex veng plak klip singaix, tau mai siviex veng Shalekhiet hawt krax ting mai kix yaox ti pau khawm ra plak heue.
17 Ka plak lih singaix mawh pui Lewix khankix liah kaux cao pa pau mai ku singaix, plak laong pon kaux mai plak seh pon kaux mai plak Asupim ra kaux mai plak praix nyiex ra kaux heue.
18 Son krax laig plak klip singaix, cao pau koe pon kaux mai plak praix nyiex bwan, cao pau koe ra kaux hawt diang laig pui heue.
19 Inkix mawh pa hoik gwieh kix ti tawx beeh glawm cao pau siviex veng khankix, khaing daux sinax cub kawn simex Korax mai khaing ka daux sinax cub kawn simex Merarix khankix heue.
Sinngao Beeh Glawm Tang Ceu
20 Khaing ka daux ceu pui Lewix khankix Ahiyax mawh cao pa kwang piang sinngao nyiex bwan Siyiex mai khawm piang sinngao ceu pa hoik appong tix khankix heue.
21 Kawn simex Ladan pa kaoh khaing doeh ru Gerashon pa mawh Ladan mai cao kaing nyiex keeing kix Ladan pa mawh ceu pui Gerashon hoik mawh Yehelix heue.
22 Kawn simex Yehelix, Zetam mai pux nawh Yawlax, khankiex mawh cao pa kwang piang sinngao nyiex bwan Siyiex khankix heue.
23 Khaing daux ceu pui Amram, ceu pui Izaha, ceu pui Hebron mai ceu pui Uzilax khankix,
24 Sheboelax, kawn simex Gerashom, pa mawh kawn simex Mose, mawh cao pa kwang ka sinngao khankix heue.
25 khaing puxaik nawh Eliaza, kawn simex nawh mawh Rehabix, kawn simex Rehabix mawh Yeshayax mai kawn simex Yeshayax mawh Yoram mai kawn simex Yoram mawh Zikharix mai kawn simex Zikharix mawh Shelomit heue.
26 Shelomit mai puxaik nawh khankix mawh cao pa kwang piang sinngao can pa appong simiang Davit mai pa appong cao kaing daux doeh nyiex keeing kix mai cao kaing naing piang pui kaing rheng kaing yieh mai cao kaing naing khaing daux cub kru naing khankix heue.
27 Kraung khrai pa pon rhim kix khaing daux naing khankix, kix appong tan sonsang cox ka nyiex bwan Siyiex heue.
28 Can ceu pa appong cao jhai Samoelax, Sawlux kawn simex Kishax, Abena kawn simex Nerax mai Yuabax pa mawh kawn simex Zeruya khankix khawm tang ceu pa hoik appong kix khawmuik hoik ot greem pa kwang Shelomit mai puxaik nawh heue.
29 Khaing daux cub ceu pui Isarelax khankix, Khenanix mai kawn simex nawh khankix hoik teei beeh glawm yuh cao kaing lum mai cao prawng see piang ceu pui Isarelax pa ot plak praix veng Yerusaliem khankix heue.
30 Khaing daux ceu pui Hebron khankix, Hashabix mai puxaik nawh khankix, tix rheng aliah yieh kaux mawh cub pui koe riang rao ti yuh kuceu mai mawh cao kia ngien piang pui Isarelax khankix, pa ot plak toi rawm klawng Yawdan, plak klip singaix mai son kaing jhaw Siyiex khawmuik mai son kaing jhaw simiang khawmuik heue.
31 Khaing daux ceu pui Hebron, Yeriyax mawh cao kaing ceu pui Hebron awm pa hoik koe doeh ru keeing nawh heue. Ka daux baux yam kwang Davit ka haktiex tixpon num, kix teei ka carang pui an khankix mai kix yaox pui pa koe riang rao khankix ka daux veng Yaza pa koe ka haktiex Gilat heue.
32 puxaik nawh khankix koe been ra rheng aliah yieh kaux pa mawh pui pa ting riang rao mai cao kaing doeh nyiex ma keeing kix, pa hoik yaog simiang Davit kix mawh cao kaing piang ceu pui Rubin mai ceu pui Gat mai piang doeh ru Manashe tix plak, grawng pa dex dawd mai kaing jhaw Siyiex kuceu mai grawng kaing jhaw simiang heue.